സങ്കീർത്തനങ്ങൾ 132 - സത്യവേദപുസ്തകം C.L. (BSI)

ദൈവവും ദാവീദുമായുള്ള ഉടമ്പടി

ആരോഹണഗീതം

¹ സർവേശ്വരാ, ദാവീദിനെയും അദ്ദേഹം സഹിച്ച കഷ്ടതകളെയും ഓർക്കണമേ.

² അദ്ദേഹം സർവേശ്വരനോടു ശപഥം ചെയ്തതും യാക്കോബിന്റെ സർവശക്തനായ ദൈവത്തോടു നേർച്ച നേർന്നതും സ്മരിക്കണമേ.

³ സർവേശ്വരന് ഒരു സങ്കേതം, യാക്കോബിന്റെ സർവശക്തനായ ദൈവത്തിന് ഒരു വാസസ്ഥലം കണ്ടെത്തുന്നതുവരെ.

⁴ ഞാൻ എന്റെ ഭവനത്തിൽ പ്രവേശിക്കുകയോ, എന്റെ കിടക്കയിൽ ശയിക്കുകയോ ഇല്ല.

⁵ ഞാൻ ഉറങ്ങുകയോ എന്റെ കൺപോളകൾ അടയ്‍ക്കുകയോ ഇല്ല.

⁶ ഞങ്ങൾ എഫ്രാത്തിൽ വച്ചു സർവേശ്വരന്റെ ഉടമ്പടിപ്പെട്ടകത്തെക്കുറിച്ചു കേട്ടു; യആറീം വയലുകളിൽ അതു കണ്ടെത്തി.

⁷ അവിടുത്തെ വാസസ്ഥലത്തേക്കു നമുക്കു പോകാം. അവിടുത്തെ പാദപീഠത്തിൽ നമുക്കു നമസ്കരിക്കാം.

⁸ സർവേശ്വരാ, അവിടുത്തെ ആലയത്തിലേക്കു വരണമേ. അവിടുത്തെ ശക്തിയുടെ പെട്ടകത്തോടൊപ്പം വരണമേ.

⁹ അങ്ങയുടെ പുരോഹിതന്മാർ നീതി ധരിക്കട്ടെ. അവിടുത്തെ ഭക്തന്മാർ ആനന്ദത്തോടെ ആർപ്പുവിളിക്കട്ടെ.

¹⁰ അങ്ങയുടെ ദാസനായ ദാവീദിനെ ഓർത്ത് അങ്ങയുടെ അഭിഷിക്തനെ തിരസ്കരിക്കരുതേ.

¹¹ ദാവീദിനോടു സർവശക്തൻ ഒരു പ്രതിജ്ഞ ചെയ്തു. അതിൽനിന്ന് അവിടുന്നു പിൻമാറുകയില്ല. “നിന്റെ സന്തതികളിൽ ഒരാളെ നിന്റെ സിംഹാസനത്തിൽ ഞാൻ ഉപവിഷ്ടനാക്കും.

¹² നിന്റെ സന്തതികൾ എന്റെ ഉടമ്പടിയും എന്റെ കല്പനകളും അനുസരിച്ചാൽ, അവരുടെ മക്കളും എന്നേക്കും നിന്റെ സിംഹാസനത്തിൽ വാഴും.”

¹³ സർവേശ്വരൻ സീയോനെ തിരഞ്ഞെടുത്തിരിക്കുന്നു. അവിടുന്നു അതിനെ തന്റെ വാസസ്ഥലമാക്കാൻ ആഗ്രഹിക്കുന്നു.

¹⁴ ഇത് എന്റെ ആലയമാകുന്നു. ഇവിടെ ഞാൻ വസിക്കും; അതാകുന്നു എന്റെ ആഗ്രഹം

¹⁵ സീയോനു വേണ്ടതെല്ലാം ഞാൻ സമൃദ്ധമായി നല്‌കും. അവിടെയുള്ള ദരിദ്രരെ ആഹാരം നല്‌കി സംതൃപ്തരാക്കും.

¹⁶ സീയോനിലെ പുരോഹിതന്മാരെ ഞാൻ രക്ഷ അണിയിക്കും, അവിടെയുള്ള ഭക്തന്മാർ ആനന്ദത്തോടെ ആർപ്പുവിളിക്കും.

¹⁷ ദാവീദിന്റെ സന്തതികളിൽനിന്നു ശക്തനായ ഒരു രാജാവിനെ സീയോനിൽ ഞാൻ ഉദ്ഭവിപ്പിക്കും. എന്റെ അഭിഷിക്തനെ ഒരു ദീപംപോലെ എന്നും അവിടെ നിലനിർത്തും.

¹⁸ അവന്റെ ശത്രുക്കളെ ഞാൻ ലജ്ജ ധരിപ്പിക്കും. എന്നാൽ രാജാവിന്റെ ശിരസ്സിലെ കിരീടം എന്നും ശോഭ ചൊരിയും.