സങ്കീർത്തനങ്ങൾ 120 - സത്യവേദപുസ്തകം C.L. (BSI)

വഞ്ചകരിൽനിന്നു വിടുവിക്കണമേ

ആരോഹണഗീതം

¹ എന്റെ കഷ്ടതയിൽ ഞാൻ സർവേശ്വരനോടു നിലവിളിച്ചു. അവിടുന്ന് എനിക്ക് ഉത്തരമരുളി.

² വ്യാജം പറയുന്നവരിൽനിന്നും വഞ്ചന പൊഴിക്കുന്നവരിൽനിന്നും സർവേശ്വരാ, എന്നെ രക്ഷിക്കണമേ,

³ വ്യാജം പറയുന്നവരേ, നിങ്ങൾക്ക് എന്താണു കിട്ടാൻ പോകുന്നത്? ഇനി എന്തു ശിക്ഷയാണ് നിങ്ങൾക്കു കിട്ടേണ്ടത്?

⁴ പോരാളിയുടെ മൂർച്ചയുള്ള അസ്ത്രങ്ങളും ചുട്ടുപഴുത്ത തീക്കനലുമാണ് നിങ്ങൾക്കു ലഭിക്കാൻ പോകുന്നത്.

⁵ മേശെക്കിലെ പ്രവാസവും, കേദാർ കൂടാരങ്ങളിലെ വാസവുംപോലെ എന്റെ ജീവിതം ദുരിതപൂർണമായിരിക്കുന്നു.

⁶ സമാധാനദ്വേഷികളോടൊത്തുള്ള വാസം എനിക്കു മടുത്തു.

⁷ ഞാൻ സമാധാനത്തിനുവേണ്ടി വാദിക്കുന്നു. എന്നാൽ അവർക്കു പോരാണു പഥ്യം.