സങ്കീർത്തനങ്ങൾ 114 - സത്യവേദപുസ്തകം C.L. (BSI)

ഈജിപ്തിൽനിന്നു പുറപ്പെട്ടപ്പോൾ

¹ ഇസ്രായേൽജനം ഈജിപ്തിൽനിന്ന്, അതേ, യാക്കോബിന്റെ സന്തതികൾ അന്യനാട്ടിൽനിന്നു പുറപ്പെട്ടപ്പോൾ,

² യെഹൂദാ അവിടുത്തെ വിശുദ്ധമന്ദിരവും ഇസ്രായേൽ അവിടുത്തെ രാജ്യവും ആയിത്തീർന്നു.

³ സമുദ്രം അതു കണ്ട് ഓടി; യോർദ്ദാൻ പിൻവാങ്ങി.

⁴ പർവതങ്ങൾ മുട്ടാടുകളെപ്പോലെയും കുന്നുകൾ കുഞ്ഞാടുകളെപ്പോലെയും തുള്ളിച്ചാടി.

⁵ ഹേ, സമുദ്രമേ, നീ ഓടിയകലുന്നതെന്ത്? യോർദ്ദാനേ, നീ പിൻവാങ്ങുന്നതെന്ത്?

⁶ മലകളേ, നിങ്ങൾ മുട്ടാടുകളെപ്പോലെയും, കുന്നുകളേ, നിങ്ങൾ കുഞ്ഞാടുകളെപ്പോലെയും തുള്ളിച്ചാടുന്നതെന്ത്?

⁷ ഭൂമിയേ, സർവേശ്വരന്റെ സന്നിധിയിൽ, യാക്കോബിന്റെ ദൈവത്തിന്റെ സന്നിധിയിൽ തന്നെ വിറകൊള്ളുക.

⁸ അവിടുന്നു പാറയെ ജലാശയവും തീക്കല്ലിനെ നീരുറവും ആക്കിയിരിക്കുന്നു.