സങ്കീർത്തനങ്ങൾ 105 - സത്യവേദപുസ്തകം C.L. (BSI)

ദൈവത്തിന്റെ ജനം

¹ സർവേശ്വരനു സ്തോത്രം അർപ്പിക്കുവിൻ; അവിടുത്തെ നാമം വിളിച്ചപേക്ഷിക്കുവിൻ; ജനതകളുടെ ഇടയിൽ അവിടുത്തെ പ്രവൃത്തികൾ പ്രഘോഷിക്കുവിൻ.

² അവിടുത്തേക്കു സ്തോത്രഗാനം ആലപിക്കുവിൻ; അവിടുത്തെ അദ്ഭുതപ്രവൃത്തികൾ വർണിക്കുവിൻ.

³ അവിടുത്തെ വിശുദ്ധനാമത്തിൽ അഭിമാനം കൊള്ളുവിൻ. സർവേശ്വരനെ ആരാധിക്കുന്നവരുടെ ഹൃദയം ആനന്ദിക്കട്ടെ.

⁴ സർവേശ്വരനെ ആരാധിക്കുവിൻ; അവിടുത്തെ ബലത്തിൽ ആശ്രയിക്കുവിൻ. അവിടുത്തെ സാന്നിധ്യം നിരന്തരം തേടുവിൻ.

^5-6 അവിടുത്തെ ദാസനായ അബ്രഹാമിന്റെ സന്തതികളേ, അവിടുന്നു തിരഞ്ഞെടുത്ത യാക്കോബിന്റെ സന്തതികളേ, അവിടുന്നു ചെയ്ത അദ്ഭുതപ്രവൃത്തികളെ ഓർക്കുവിൻ. അവിടുത്തെ അടയാളങ്ങളും അവിടുത്തെ ന്യായവിധികളും തന്നെ.

⁷ സർവേശ്വരനാണു നമ്മുടെ ദൈവം; അവിടുത്തെ ന്യായവിധികൾ ഭൂമി മുഴുവനും ബാധകമാണ്.

⁸ അവിടുന്നു തന്റെ ഉടമ്പടി എന്നും പാലിക്കും, തന്റെ വാഗ്ദാനം ഒരിക്കലും മറക്കയില്ല.

⁹ അബ്രഹാമിനോടു ചെയ്ത ഉടമ്പടിയും ഇസ്ഹാക്കിനോടു ചെയ്ത പ്രതിജ്ഞയും തന്നെ,

¹⁰ യാക്കോബിന് ഒരു ചട്ടമായി സർവേശ്വരൻ അതു സ്ഥാപിച്ചു. ഇസ്രായേലിനുള്ള ശാശ്വത ഉടമ്പടിയായിത്തന്നെ.

¹¹ ഞാൻ നിനക്കു കനാൻദേശം നല്‌കും. അത് നിനക്കുള്ള അവകാശമായിരിക്കും.

¹² അന്ന് അവർ എണ്ണത്തിൽ കുറഞ്ഞ വളരെ ചെറിയ കൂട്ടമായിരുന്നു. അവർ കനാൻദേശത്തു പരദേശികളായിരുന്നു.

¹³ അവർ ജനതകളുടെയും രാജ്യങ്ങളുടെയും ഇടയിൽ അലഞ്ഞുനടന്നു.

¹⁴ അവരെ പീഡിപ്പിക്കാൻ ആരെയും അവിടുന്നു അനുവദിച്ചില്ല. അവരെ സംരക്ഷിക്കാൻവേണ്ടി അവിടുന്നു രാജാക്കന്മാരെ ശാസിച്ചു.

¹⁵ “എന്റെ അഭിഷിക്തരെ തൊടരുത്. എന്റെ പ്രവാചകന്മാർക്ക് ഒരുപദ്രവവും ചെയ്യരുത്.”

¹⁶ അവിടുന്നു കനാൻദേശത്തു ക്ഷാമം വരുത്തി. അവരുടെ ആഹാരത്തെ നിശ്ശേഷം ഇല്ലാതാക്കി.

¹⁷ അവരെ രക്ഷിക്കാൻ അവിടുന്ന് അവർക്കു മുമ്പായി ഒരാളെ ഈജിപ്തിലേക്കയച്ചു; അടിമയായി വില്‌ക്കപ്പെട്ട യോസേഫിനെ തന്നെ.

¹⁸ കാരാഗൃഹത്തിൽ അടയ്‍ക്കപ്പെട്ട അയാളുടെ കാലുകളിൽ വിലങ്ങു വച്ചു. കഴുത്തിൽ ഇരുമ്പു പട്ട ധരിപ്പിച്ചു.

¹⁹ അയാൾ പ്രവചിച്ചതു നിറവേറുന്നതുവരെ, സർവേശ്വരൻ യോസേഫിനോടറിയിച്ചതു സത്യമെന്നു തെളിയുന്നതുവരെ തന്നെ.

²⁰ ഈജിപ്തിലെ രാജാവ് ആളയച്ചു യോസേഫിനെ മോചിപ്പിച്ചു, അന്യജനതയുടെ അധിപതി അയാളെ സ്വതന്ത്രനാക്കി.

²¹ രാജാവ് അയാളെ കൊട്ടാരത്തിന്റെ അധികാരിയും തന്റെ സർവസമ്പത്തിന്റെയും മേൽവിചാരകനായും നിയമിച്ചു.

²² പ്രഭുക്കന്മാർക്ക് ശിക്ഷണം നല്‌കാനും ഉപദേഷ്ടാക്കൾക്ക് ജ്ഞാനം ഉപദേശിക്കാനും അയാൾക്ക് അധികാരം നല്‌കി.

²³ അപ്പോൾ ഇസ്രായേൽ ഈജിപ്തിലേക്കു വന്നു അതെ, യാക്കോബ് ഹാമിന്റെ ദേശത്ത് ചെന്നു പാർത്തു.

²⁴ ദൈവം തന്റെ ജനത്തെ വളരെ വർധിപ്പിച്ചു. അവരുടെ വൈരികളെക്കാൾ അവരെ പ്രബലരാക്കി.

²⁵ തന്റെ ജനത്തെ വെറുക്കാനും, തന്റെ ദാസരായ ഇസ്രായേല്യരോടു വഞ്ചനാപൂർവം വർത്തിക്കാനും, അവിടുന്ന് ഈജിപ്തുകാർക്ക് ഇടവരുത്തി.

²⁶ അവിടുന്നു തന്റെ ദാസനായ മോശയെയും താൻ തിരഞ്ഞെടുത്ത അഹരോനെയും അയച്ചു.

²⁷ അവർ ഈജിപ്തുകാരുടെ ഇടയിൽ അടയാളങ്ങൾ കാണിച്ചു. അവർ ഹാമിന്റെ ദേശത്ത് അദ്ഭുതങ്ങൾ പ്രവർത്തിച്ചു.

²⁸ ദൈവം അന്ധകാരം അയച്ചു ദേശത്തെ ഇരുളിലാഴ്ത്തി. ഈജിപ്തുകാർ അവിടുത്തെ വാക്കു കേട്ടില്ല.

²⁹ അവിടുന്ന് അവരുടെ വെള്ളം രക്തമാക്കി, അവരുടെ മത്സ്യങ്ങൾ ചത്തൊടുങ്ങി.

³⁰ തവളകൾ അവരുടെ ദേശത്തെ മൂടി. രാജാക്കന്മാരുടെ പള്ളിയറകളിൽപോലും തവളകൾ നിറഞ്ഞു.

³¹ അവിടുന്നു കല്പിച്ചപ്പോൾ അവരുടെ ദേശത്ത് ഈച്ചയും പേനും നിറഞ്ഞു.

³² അവിടുന്ന് അവർക്കു മഴയ്‍ക്കു പകരം കന്മഴ പെയ്യിച്ചു. ദേശത്തെങ്ങും മിന്നൽപ്പിണരുകൾ അയച്ചു.

³³ അവിടുന്ന് അവരുടെ മുന്തിരിത്തോട്ടങ്ങളും അത്തിമരങ്ങളും തകർത്തു; അവരുടെ വൃക്ഷങ്ങൾ നശിപ്പിച്ചു.

³⁴ അവിടുന്നു കല്പിച്ചപ്പോൾ വെട്ടുക്കിളികൾ വന്നു. അവ സംഖ്യയില്ലാതെ വന്നു.

³⁵ അവരുടെ ദേശത്തിലെ സകല സസ്യങ്ങളും അവരുടെ വയലിലെ സകല വിളകളും അവ തിന്നൊടുക്കി.

³⁶ അവിടുന്ന് ഈജിപ്തിലെ സകല ആദ്യജാതന്മാരെയും സംഹരിച്ചു; അവരുടെ കടിഞ്ഞൂലുകളെ തന്നെ.

³⁷ പിന്നീട് അവിടുന്ന് ഇസ്രായേല്യരെ സ്വർണത്തോടും വെള്ളിയോടും കൂടി, ഈജിപ്തിൽനിന്നു പുറപ്പെടുവിച്ചു. അവരിൽ ഒരുവന്റെയും കാൽ ഇടറിയില്ല.

³⁸ അവർ പോയപ്പോൾ ഈജിപ്തുകാർ സന്തോഷിച്ചു. അവരെക്കുറിച്ച് ഈജിപ്തു ഭീതി പൂണ്ടിരുന്നല്ലോ.

³⁹ അവിടുന്ന് അവർക്കു തണലിനായി മേഘത്തെ മേല്‌ക്കട്ടിയാക്കി. രാത്രിയിൽ അവർക്കു വെളിച്ചം നല്‌കാൻ അഗ്നി ജ്വലിപ്പിച്ചു.

⁴⁰ അവർ ചോദിച്ചപ്പോൾ അവിടുന്നു കാടപ്പക്ഷികളെ നല്‌കി. അവർക്കുവേണ്ടി ആകാശത്തിൽനിന്നു സമൃദ്ധമായി അപ്പം വർഷിച്ചു.

⁴¹ അവിടുന്നു പാറയെ പിളർന്നു, വെള്ളം കുതിച്ചു ചാടി. മരുഭൂമിയിൽ അതു നദിപോലെ ഒഴുകി.

⁴² അവിടുന്നു തന്റെ വിശുദ്ധവാഗ്ദാനത്തെയും, തന്റെ ദാസനായ അബ്രഹാമിനെയും ഓർത്തു.

⁴³ അങ്ങനെ തന്റെ ജനത്തെ അവിടുന്നു നയിച്ചു. തിരഞ്ഞെടുക്കപ്പെട്ട ജനം ഗാനം ആലപിച്ചു.

⁴⁴ അവിടുന്ന് അന്യജനതകളുടെ ദേശം അവർക്കു നല്‌കി. ജനതകളുടെ അധ്വാനഫലം അവർ കൈവശമാക്കി.

⁴⁵ അവർ അവിടുത്തെ ചട്ടങ്ങൾ പാലിക്കാനും, അവിടുത്തെ നിയമങ്ങൾ അനുസരിക്കാനും വേണ്ടിത്തന്നെ. സർവേശ്വരനെ സ്തുതിക്കുവിൻ.