സംഖ്യാപുസ്തകം 34 - സത്യവേദപുസ്തകം C.L. (BSI)

ദേശത്തിന്റെ അതിരുകൾ

¹ സർവേശ്വരൻ മോശയോട് അരുളിച്ചെയ്തു:

² “ഇസ്രായേൽജനത്തോടു കല്പിക്കുക: ഞാൻ നിങ്ങൾക്ക് അവകാശമായി നല്‌കുന്ന ദേശത്തു നിങ്ങൾ പ്രവേശിക്കുമ്പോൾ അതിന്റെ അതിരുകൾ താഴെ പറയുന്നവയായിരിക്കണം.

³ നിങ്ങളുടെ തെക്കേ അതിര് സീൻമരുഭൂമി മുതൽ എദോമിന്റെ അതിരിൽക്കൂടിയായിരിക്കും. അതു കിഴക്ക് ചാവുകടലിന്റെ തെക്കേ അറ്റത്തുനിന്ന് ആരംഭിക്കും.

⁴ അവിടെനിന്ന് അക്രബീം കയറ്റത്തിനു തെക്കോട്ടു നീണ്ടു സീൻമരുഭൂമിയിൽ കാദേശ് - ബർന്നേയയുടെ തെക്ക് അവസാനിക്കും. അവിടെനിന്നു വടക്കോട്ടു തിരിഞ്ഞു ഹസർ - അദ്ദാറിൽകൂടി അസ്മോനിലേക്കു കടക്കും.

⁵ അവിടെനിന്ന് ഈജിപ്തിന്റെ അതിരിലുള്ള താഴ്‌വരയിൽകൂടി കടന്നു മധ്യധരണ്യാഴിയിൽ അവസാനിക്കും.

⁶ പടിഞ്ഞാറേ അതിര് മധ്യധരണ്യാഴിയായിരിക്കും.

⁷ വടക്കേ അതിര് മധ്യധരണ്യാഴിയിൽ തുടങ്ങി

⁸ ഹോർപർവതം, ഹമാത്ത്, സെദാദ്,

⁹ സിഫ്രോൻ, ഈ സ്ഥലങ്ങളിൽ കൂടി കടന്നു ഹസാർ-ഏനാനിൽ അവസാനിക്കും.

¹⁰ കിഴക്കേ അതിര് ഹസാർ-ഏനാനിൽ തുടങ്ങി

¹¹ ശെഫാമിൽ കൂടി അയീന്റെ കിഴക്കുഭാഗത്തു രിബ്ലാ കടന്നു,

¹² ഗലീലക്കടലിന്റെ കിഴക്കേ തീരത്തുള്ള മലകളിൽകൂടി യോർദ്ദാൻ വഴിയായി ഉപ്പുകടലിൽ എത്തും. നിങ്ങളുടെ ദേശത്തിന്റെ അതിരുകൾ ഇവയായിരിക്കും.

¹³ നിങ്ങളുടെ ഒമ്പതര ഗോത്രങ്ങൾക്കുവേണ്ടി നറുക്കിട്ടു നിങ്ങൾക്ക് അവകാശമായി വിഭജിക്കുന്നതിനു സർവേശ്വരൻ നല്‌കിയിട്ടുള്ള ദേശം ഇതാകുന്നു.

^14-15 രൂബേൻ, ഗാദ്ഗോത്രക്കാർക്കും മനശ്ശെയുടെ പകുതി ഗോത്രക്കാർക്കും അവരുടെ കുലങ്ങളനുസരിച്ചു ലഭിക്കേണ്ട സ്ഥലം യെരീഹോവിനു കിഴക്കു യോർദ്ദാനക്കരെ വീതിച്ചു കൊടുത്തുവല്ലോ.”

ദേശം വിഭജിച്ചു കൊടുക്കാൻ നിയോഗിക്കപ്പെട്ടവർ

¹⁶ സർവേശ്വരൻ മോശയോട് അരുളിച്ചെയ്തു:

¹⁷ “എലെയാസാർപുരോഹിതനും നൂനിന്റെ പുത്രനുമായ യോശുവയുംകൂടി ജനങ്ങൾക്കു ദേശം വിഭജിച്ചുകൊടുക്കണം.

¹⁸ അവരെ സഹായിക്കുന്നതിന് അവരോടൊപ്പം ഓരോ ഗോത്രത്തിൽനിന്ന് ഓരോ നേതാവിനെയും നിയോഗിക്കണം.

¹⁹ അവർ താഴെ പറയുന്നവരാണ്: യെഹൂദായുടെ ഗോത്രത്തിൽനിന്നു യെഫുന്നെയുടെ പുത്രനായ കാലേബ്.

²⁰ ശിമെയോൻഗോത്രത്തിൽനിന്ന് അമ്മീഹൂദിന്റെ പുത്രനായ ശെമൂവേൽ;

²¹ ബെന്യാമീൻഗോത്രത്തിൽനിന്നു കിസ്ലോന്റെ പുത്രനായ എലീദാദ്;

²² ദാൻഗോത്രത്തിൽനിന്നു യൊഗ്ലിയുടെ പുത്രൻ ബുക്കി;

²³ യോസേഫിന്റെ പുത്രന്മാരിൽ മനശ്ശെഗോത്രത്തിൽനിന്ന് എഫോദിന്റെ പുത്രൻ ഹന്നീയേൽ.

²⁴ എഫ്രയീംഗോത്രത്തിൽനിന്നു ശിഫ്ത്താന്റെ പുത്രൻ കെമൂവേൽ;

²⁵ സെബൂലൂൻ ഗോത്രത്തിൽനിന്നു പർന്നാക്കിന്റെ പുത്രൻ എലീസാഫാൻ;

²⁶ ഇസ്സാഖാർഗോത്രത്തിൽനിന്ന് അസ്സാന്റെ പുത്രൻ പൽത്തീയേൽ;

²⁷ ആശേർഗോത്രത്തിൽനിന്നു ശെലോമിയുടെ പുത്രൻ അഹീഹൂദ്.

²⁸ നഫ്താലിഗോത്രത്തിൽനിന്ന് അമ്മീഹൂദിന്റെ പുത്രൻ പെദഹേൽ.

²⁹ കനാൻദേശത്ത് ഇസ്രായേൽജനത്തിനുള്ള അവകാശം വിഭജിച്ചുകൊടുക്കുന്നതിനു സർവേശ്വരൻ നിയമിച്ചത് ഇവരെയായിരുന്നു.