ഇയ്യോബ് 7 - സത്യവേദപുസ്തകം C.L. (BSI)

¹ മനുഷ്യജീവിതം നിർബന്ധിതസേവനമല്ലേ? മനുഷ്യന്റെ ദിനങ്ങൾ കൂലിക്കാരന്റെ ദിനങ്ങൾപോലെയല്ലേ?

² അടിമയെപ്പോലെ അവൻ തണൽ കൊതിക്കുന്നു; കൂലിക്കാരനെപ്പോലെ കൂലിക്കു കാത്തിരിക്കുന്നു.

³ എനിക്കു ലഭിച്ചതാകട്ടെ വ്യർഥമാസങ്ങളും കഷ്ടരാത്രികളും മാത്രം,

⁴ കിടക്കുമ്പോൾ ഉറക്കം കിട്ടാതെ എത്രനേരം കഴിയേണ്ടിവരുമെന്നാണ് എന്റെ വിചാരം രാത്രിയോ അതിദീർഘം; വെളുക്കുവോളം കിടന്നുരുളുകതന്നെ എനിക്കു പണി.

⁵ അഴുക്കും പുഴുക്കളും എന്റെ ശരീരത്തെ പൊതിഞ്ഞിരിക്കുന്നു; എന്റെ ത്വക്ക് വ്രണം പൊട്ടി ഒലിക്കുന്നു.

⁶ എന്റെ ദിനങ്ങൾ നെയ്ത്തുകാരന്റെ ഓടത്തെക്കാൾ വേഗത്തിൽ ചലിക്കുന്നു. പ്രത്യാശയില്ലാതെ അവ അവസാനിക്കുന്നു.

⁷ “ദൈവമേ, എന്റെ ജീവിതം ഒരു ശ്വാസം മാത്രമെന്ന് ഓർത്താലും, എന്റെ കണ്ണ് ഇനി ഒരിക്കലും നന്മ കാണുകയില്ല.

⁸ എന്നെ കണ്ടുകൊണ്ടിരിക്കുന്നവന്റെ കണ്ണുകൾ ഇനിമേൽ എന്നെ കാണുകയില്ല; നീ നോക്കിയിരിക്കെ ഞാൻ പോയ്‍ക്കഴിഞ്ഞിരിക്കും.

⁹ മേഘം മാഞ്ഞുമറയുന്നതുപോലെ പാതാളത്തിലേക്ക് ഇറങ്ങുന്നവൻ വീണ്ടും കയറിവരുന്നില്ല.

¹⁰ അവൻ തന്റെ ഭവനത്തിലേക്കു മടങ്ങുകയില്ല. അവന്റെ സ്ഥലം ഇനി അവനെ അറിയുകയില്ല.

¹¹ അതുകൊണ്ട് എനിക്കു മിണ്ടാതിരിക്കാൻ കഴിയുകയില്ല. എന്റെ മനോവേദനയ്‍ക്കിടയിൽ ഞാൻ പുലമ്പിക്കൊണ്ടിരിക്കും. ആത്മനൊമ്പരങ്ങൾക്കിടയിൽ ഞാൻ ആവലാതിപ്പെടും.

¹² അങ്ങ് എനിക്കു കാവലേർപ്പെടുത്താൻ ഞാൻ കടലോ കടൽജന്തുവോ?

¹³ ‘എന്റെ കിടക്ക എന്നെ ആശ്വസിപ്പിക്കും; എന്റെ മെത്ത എന്റെ സങ്കടം ശമിപ്പിക്കും.’

¹⁴ എന്നു ഞാൻ കരുതുമ്പോൾ സ്വപ്നംകൊണ്ട് അങ്ങ് എന്നെ ഞെട്ടിക്കുന്നു; പേക്കാഴ്ചകൾകൊണ്ട് എന്നെ നടുക്കുന്നു.

¹⁵ അതുകൊണ്ട് അസ്ഥിപഞ്ജരം ആകുന്നതിനെക്കാൾ കഴുത്തു ഞെരിച്ചു കൊല്ലപ്പെടാനാണ് എനിക്കിഷ്ടം.

¹⁶ എന്റെ ജീവിതത്തെ ഞാൻ വെറുക്കുന്നു. ഞാൻ സദാകാലവും ജീവിച്ചിരിക്കുകയില്ല. എന്നെ വിട്ടേക്കുക; എന്റെ ജീവിതം ഒരു ശ്വാസം മാത്രമാണല്ലോ.

¹⁷ മർത്യനെ പരിഗണിക്കാനും ശ്രദ്ധിക്കാനും അവൻ എന്ത്?

¹⁸ പ്രഭാതംതോറും നിരീക്ഷിക്കാനും പ്രതിനിമിഷം പരീക്ഷിക്കാനും അവൻ എന്തുള്ളൂ!

¹⁹ എത്രകാലം അവിടുന്ന് എന്റെമേൽ ദൃഷ്‍ടി പതിപ്പിക്കും? എത്രകാലം എന്നെ അങ്ങ് നോക്കിയിരിക്കും?

²⁰ മനുഷ്യന്റെമേൽ കണ്ണുനട്ടിരിക്കുന്നവനേ, ഞാൻ പാപം ചെയ്തിട്ടുണ്ടെങ്കിൽ അങ്ങേക്കെന്താണ്? അങ്ങ് എന്നെ ഉന്നംവച്ചിരിക്കുന്നതെന്തിന്? ഞാൻ അങ്ങേക്ക് ഭാരമായിത്തീർന്നത് എന്തുകൊണ്ട്?

²¹ എന്റെ അതിക്രമം അവിടുന്നു ക്ഷമിക്കുന്നില്ല. എന്റെ അകൃത്യം നീക്കിക്കളയുന്നുമില്ല. ഞാൻ ഇപ്പോൾ പൂഴിയോടു ചേരും, അവിടുന്ന് എന്നെ അന്വേഷിക്കും, എന്നാൽ ഞാൻ ഉണ്ടായിരിക്കുകയില്ല.”