ഇയ്യോബ് 41 - സത്യവേദപുസ്തകം C.L. (BSI)

¹ നിനക്ക് ലിവ്യാഥാനെ ചൂണ്ടയിട്ടു പിടിക്കാമോ? അതിന്റെ നാക്കു കയറുകൊണ്ട് ബന്ധിക്കാമോ?

² അതിന്റെ മൂക്കിൽ കയറിടാമോ? അതിന്റെ താടിയെല്ലിൽ കൊളുത്തു കടത്താമോ?

³ അതു നിന്റെ മുമ്പിൽ യാചന നിരത്തുമോ? അതു നിന്നോടു കെഞ്ചിപ്പറയുമോ?

⁴ എക്കാലവും നിനക്കു ദാസ്യം വഹിക്കാമെന്ന് അതു നിന്നോട് ഉടമ്പടി ചെയ്യുമോ?

⁵ ഒരു കിളിയോടെന്നവിധം നിനക്ക് അതിനോടു കളിക്കാമോ? നിന്റെ ദാസിമാർക്കുവേണ്ടി, അതിനെ പിടിച്ചു കെട്ടിയിടുമോ?

⁶ വ്യാപാരികൾ അതിനു വിലപേശുമോ? കച്ചവടക്കാർക്ക് അതിനെ പകുത്തു വില്‌ക്കുമോ?

⁷ അതിന്റെ തൊലി നിറയെ ചാട്ടുളിയും തലയിൽ മുപ്പല്ലിയും തറയ്‍ക്കാമോ?

⁸ അതിനെ ഒന്നു തൊട്ടാൽ എന്തൊരു പോരായിരിക്കുമെന്ന് ഓർത്തുനോക്കൂ; പിന്നെ നീ അതിനു തുനിയുകയില്ല.

⁹ നോക്കൂ; അതിനെ കീഴ്പെടുത്താമെന്ന ആശ ആർക്കും വേണ്ട; ഒന്നേ നോക്കൂ; അതോടെ നോക്കുന്നവൻ നിലംപതിക്കും.

¹⁰ അതിനെ പ്രകോപിപ്പിക്കാൻ തക്ക ശൗര്യം ആർക്കും ഇല്ല. എങ്കിൽ പിന്നെ എന്നെ നേരിടാൻ ആർക്കു കഴിയും?

¹¹ ഞാൻ മടക്കിക്കൊടുക്കാൻ ആരെങ്കിലും എന്തെങ്കിലും എന്നെ ഏല്പിച്ചിട്ടുണ്ടോ? ആകാശത്തിൻകീഴുള്ള സമസ്തവും എൻറേതല്ലേ?

¹² അതിന്റെ അവയവങ്ങളെയും മഹാശക്തിയെയും വടിവൊത്ത ശരീരഘടനയെയുംപറ്റി മൗനം അവലംബിക്കാൻ എനിക്കു സാധ്യമല്ല.

¹³ അതിന്റെ പുറംചട്ട ഉരിയാൻ ആർക്കു കഴിയും? അതിന്റെ ഇരട്ടക്കവചം തുളയ്‍ക്കാൻ ആർക്കു കഴിയും?

¹⁴ അതിന്റെ വായ് ആരു തുറക്കും? അതിന്റെ പല്ലുകൾ ഭീകരമാണ്.

¹⁵ പരിചകൾ അടുക്കിയാണ് അതിന്റെ പുറം നിർമ്മിച്ചിരിക്കുന്നത്. അവ വിടവുതീർത്തു മുദ്രവച്ചിരിക്കുന്നു.

¹⁶ വായു കടക്കാത്തവിധം അവ യോജിപ്പിച്ചിരിക്കുന്നു;

¹⁷ അകറ്റാൻ അരുതാത്തവിധം അവ പറ്റിച്ചേർന്നിരിക്കുന്നു.

¹⁸ അതു തുമ്മുമ്പോൾ മിന്നൽപ്പിണർ പ്രസരിക്കുന്നു; അതിന്റെ കണ്ണ് പ്രഭാതകിരണങ്ങൾ പോലെയാണ്.

¹⁹ അതിന്റെ വായിൽനിന്ന് അഗ്നിജ്വാലകൾ പുറപ്പെടുന്നു; തീപ്പൊരികൾ ചിതറുന്നു.

²⁰ അതിന്റെ നാസാരന്ധ്രങ്ങളിൽനിന്ന് കോരപ്പുല്ലു കത്തി വെള്ളം തിളയ്‍ക്കുന്ന കലത്തിൽ നിന്നെന്ന പോലെ പുക ഉയരുന്നു.

²¹ അതിന്റെ ശ്വാസം ഏറ്റ് കനൽക്കട്ട ജ്വലിക്കുന്നു. അതിന്റെ വായിൽനിന്ന് അഗ്നിജ്വാല പായുന്നു.

²² അതിന്റെ ബലം കഴുത്തിൽ കുടികൊള്ളുന്നു. അതിന്റെ മുമ്പിൽ ഭീകരത താണ്ഡവമാടുന്നു.

²³ അതിന്റെ മാംസപാളികൾ ഇളകാത്തവിധം ഉറപ്പായി ചേർന്നിരിക്കുന്നു;

²⁴ അതിന്റെ നെഞ്ച് കല്ലുപോലെ കടുപ്പമുള്ളതത്രേ; തിരികല്ലിന്റെ അടിക്കല്ലുപോലെ ഉറപ്പുള്ളത്.

²⁵ അത് തല ഉയർത്തുമ്പോൾ ബലശാലികൾ പേടിക്കുന്നു; അവർ അന്ധാളിച്ചുപോകുന്നു.

²⁶ വാളോ, കുന്തമോ, അസ്ത്രമോ, ചാട്ടുളിയോകൊണ്ട് അതിനെ നേരിടുക സാധ്യമല്ല.

²⁷ ഇരുമ്പ് അതിനു വൈക്കോൽപോലെയാണ്. ഓട് ചെതുക്കുതടിപോലെയും.

²⁸ അസ്ത്രം എയ്ത് അതിനെ ഓടിക്കുക സാധ്യമല്ല. കവിണക്കല്ല് അതിന് വൈക്കോൽ പോലെയാണ്.

²⁹ ഗദയും അതിന് വൈക്കോൽ പോലെയാണ്. വേൽ പ്രയോഗിക്കുമ്പോൾ അതു പരിഹസിച്ചു ചിരിക്കുന്നു.

³⁰ അതിന്റെ അടിഭാഗം കൂർത്തുമൂർത്ത ഓട്ടുകഷണം പോലെയാകുന്നു. മെതിത്തടിപോലെ അതു ചെളിപ്പുറത്ത് കിടക്കുന്നു.

³¹ കുട്ടകത്തിലെ വെള്ളം എന്നപോലെ അതു സമുദ്രജലത്തെ തിളപ്പിക്കുന്നു. അതു സമുദ്രത്തെ ഒരു കുടം തൈലം പോലെയാക്കുന്നു.

³² അതു മുന്നോട്ടു നീങ്ങുമ്പോൾ പിറകിൽ തിളങ്ങുന്ന പാതപോലെ ജലരേഖ കാണാം. അതു കണ്ടാൽ ആഴിക്കു നര ബാധിച്ചതു പോലെ തോന്നും.

³³ അതിനു തുല്യമായ ഒരു ജന്തുവും ഭൂമിയിലില്ല. അതിനെപ്പോലെ ഭയമില്ലാത്ത വേറൊരു ജീവിയില്ല.

³⁴ ഉന്നതമായതെല്ലാം അതു കാണുന്നു; അത് ഗർവിഷ്ഠരുടെയെല്ലാം രാജാവാകുന്നു.”