ഇയ്യോബ് 39 - സത്യവേദപുസ്തകം C.L. (BSI)

¹ കാട്ടാടുകളുടെ പ്രസവകാലം നിനക്കറിയാമോ? മാൻപേടകളുടെ പ്രസവം നീ കണ്ടിട്ടുണ്ടോ?

² അവയുടെ പ്രസവകാലം നിനക്കു കണക്കുകൂട്ടാമോ? അവയുടെ പ്രസവസമയം നിനക്ക് അറിയാമോ?

³ എപ്പോൾ അവ കുനിഞ്ഞു പ്രസവിച്ച് കുഞ്ഞിനു ജന്മം നല്‌കുന്നു?

⁴ അവയുടെ കുട്ടികൾ ശക്തിനേടി തുറസ്സായ സ്ഥലത്തു വളരുന്നു; പിന്നെ അവ പിരിഞ്ഞകലുന്നു; മടങ്ങിവരുന്നതുമില്ല.

⁵ കാട്ടുകഴുതയെ അഴിച്ചുവിട്ടത് ആര്? അവയ്‍ക്ക് ഓടിനടക്കാൻ അനുവാദം കൊടുത്തത് ആര്?

⁶ ഞാൻ അവയ്‍ക്കു പുൽമേടുകൾ മേയാൻ കൊടുത്തു. ഓരുനിലം അവയുടെ വീടാക്കി.

⁷ പട്ടണത്തിലെ ശബ്ദകോലാഹലം അതു വെറുക്കുന്നു. മേയിക്കുന്നവന്റെ ആക്രോശം അതു കേൾക്കുന്നില്ല.

⁸ പർവതങ്ങൾ അതിന്റെ മേച്ചിൽസ്ഥലങ്ങളാണ്. പച്ചത്തലപ്പുകൾ തേടി അതു നടക്കുന്നു.

⁹ കാട്ടുകാള നിന്നെ സേവിക്കുമോ? നിന്റെ തൊഴുത്തിൽ അതു രാപാർക്കുമോ?

¹⁰ അതിനെ നുകംവച്ച് ഉഴവിനു കൊണ്ടുപോകാമോ? അത് നിന്റെ പിന്നാലെ നടന്നു കട്ട ഉടച്ചു നിലം നിരപ്പാക്കുമോ?

¹¹ അതിന്റെ കരുത്തു വലുതാണെന്നു കരുതി നിനക്കതിനെ ആശ്രയിക്കാമോ? നിന്റെ പണി അതിനെ ഏല്പിക്കുമോ?

¹² അത് നിന്റെ കളപ്പുരയിലേക്കു ധാന്യം കൊണ്ടുവരുമെന്നു നീ വിശ്വസിക്കുന്നോ?

¹³ ഒട്ടകപ്പക്ഷി പ്രൗഢിയോടെ ചിറകടിക്കുന്നു. പക്ഷേ അതിനു കൊക്കിനെപ്പോലെ പറക്കാൻ കഴിയുമോ?

¹⁴ അതു നിലത്തു മുട്ടയിട്ടിട്ടു പോകുന്നു. മുട്ട മണ്ണിന്റെ ചൂടുകൊണ്ടു വിരിയുന്നു.

¹⁵ ആരെങ്കിലും അതു ചവിട്ടിയുടയ്‍ക്കുമെന്നോ, കാട്ടുമൃഗങ്ങൾ അവ ചവിട്ടിക്കളയുമെന്നോ അത് ഓർക്കുന്നില്ല.

¹⁶ തന്റെ കുഞ്ഞുങ്ങളാണെന്നു വിചാരമില്ലാതെ അത് അവയോടു ക്രൂരമായി വർത്തിക്കുന്നു.

¹⁷ തന്റെ ഈറ്റുനോവു പാഴായിപ്പോകുമെന്ന് അതു ഭയപ്പെടുന്നില്ല. കാരണം ദൈവം അതിനു ജ്ഞാനമോ വിവേകമോ നല്‌കിയിട്ടില്ല.

¹⁸ അതു ചിറകു വിടർത്തി ഓടിയകലുമ്പോൾ കുതിരയെയും കുതിരക്കാരനെയും പിൻതള്ളി നാണംകെടുത്തുന്നു.

¹⁹ ഇയ്യോബേ, കുതിരയ്‍ക്കു ശക്തി കൊടുക്കുന്നതു നീയാണോ? അതിന്റെ കഴുത്തിനു ബലം വരുത്തുന്നതും നീയാണോ?

²⁰ അതിനെ വെട്ടുക്കിളിയെപ്പോലെ ചാടിക്കുന്നതു നീയോ? അതിന്റെ ശക്തിയേറിയ ചീറ്റൽ ഭയജനകമല്ലേ?

²¹ താഴ്‌വരയിൽ ചുരം മാന്തി അതു സ്വന്തശക്തിയിൽ ഊറ്റംകൊള്ളുന്നു. യുദ്ധഭൂമിയിലേക്ക് അതു പാഞ്ഞുചെല്ലുന്നു.

²² ഭയത്തെ അതു പരിഹസിച്ചുതള്ളുന്നു. ഭീതികൊണ്ട് അതു തളരുന്നില്ല. വാളു കണ്ടു പിന്തിരിഞ്ഞോടുന്നില്ല.

²³ അതിന്റെമേൽ യോദ്ധാക്കളുടെ ആയുധങ്ങളുടെ കിലുകിലധ്വനി ഉയരുന്നു. കുന്തവും ചാട്ടുകുന്തവും വെട്ടിത്തിളങ്ങുന്നു.

²⁴ അത് ഉഗ്രതയും കോപവുംപൂണ്ട് ബഹുദൂരം പിന്നിടുന്നു. കാഹളധ്വനി ഉയരുമ്പോൾ അടങ്ങിനില്‌ക്കാൻ അതിനു കഴിയുകയില്ല.

²⁵ കാഹളധ്വനി കേട്ട് അതു ഹാ, ഹാ ശബ്ദം പുറപ്പെടുവിക്കുന്നു. യുദ്ധത്തിന്റെ ഗന്ധം അതിനു ദൂരത്തുനിന്നേ കിട്ടുന്നു. പടനായകരുടെ അട്ടഹാസവും ആർപ്പുവിളിയും അകലെവച്ചുതന്നെ അറിയുന്നു.

²⁶ നിന്റെ ജ്ഞാനം കൊണ്ടാണോ പരുന്ത് ഉയർന്നു പറക്കുകയും തെക്കോട്ടു ചിറകു വിടർത്തുകയും ചെയ്യുന്നത്?

²⁷ നിന്റെ കല്പനയനുസരിച്ചാണോ കഴുകൻ മുകളിലേക്കു പറന്നുയരുന്നത്? ഉയരത്തിൽ കൂടുകെട്ടുന്നത്?

²⁸ കടുംതൂക്കായ പരുക്കൻ പാറയിലെ സുരക്ഷിതമായ സ്ഥാനങ്ങളിൽ അതു കൂടുവച്ചു പാർക്കുന്നു.

²⁹ അവിടെയിരുന്നുകൊണ്ട് അത് ഇരയെ തിരയുന്നു. അതു ദൂരെയുള്ള ഇരയെ കാണുന്നു.

³⁰ കഴുകന്റെ കുഞ്ഞുങ്ങൾ രക്തം വലിച്ചുകുടിക്കുന്നു; ശവമുള്ളിടത്ത് കഴുകനുമുണ്ട്.”