ഇയ്യോബ് 27 - സത്യവേദപുസ്തകം C.L. (BSI)

¹ ഇയ്യോബ് ഇങ്ങനെ തുടർന്നു:

² “എനിക്കു നീതി നിഷേധിക്കുകയും എന്റെ ജീവിതം കയ്പുള്ളതാക്കുകയും ചെയ്ത സർവശക്തനായ ദൈവത്തെ മുൻനിറുത്തി ഞാൻ പറയുന്നു:

³ എന്നിൽ പ്രാണൻ അവശേഷിക്കുന്നിടത്തോളം, ദൈവത്തിന്റെ ശ്വാസം എന്റെ നാസികയിൽ ഉള്ളിടത്തോളം

⁴ ഞാൻ അസത്യം സംസാരിക്കുകയില്ല; ഞാൻ വഞ്ചന ഉച്ചരിക്കുകയില്ല.

⁵ നിങ്ങൾ പറയുന്നതു ശരിയാണെന്ന് ഒരിക്കലും ഞാൻ സമ്മതിക്കുകയില്ല. മരണംവരെ ഞാൻ നിഷ്കളങ്കത ഉപേക്ഷിക്കുകയില്ല.

⁶ ഞാൻ നീതിനിഷ്ഠ കൈവിടുകയില്ല. ആയുസ്സിന്റെ ഒരു ദിവസത്തെക്കുറിച്ചും മനഃസാക്ഷി എന്നെ കുറ്റപ്പെടുത്തുകയില്ല.

⁷ എന്റെ ശത്രു ദുഷ്ടനെപ്പോലെയും എന്റെ എതിരാളി അധർമിയെപ്പോലെയും ആയിരിക്കട്ടെ.

⁸ അഭക്തനെ ദൈവം നശിപ്പിക്കുമ്പോൾ അവന്റെ പ്രത്യാശ എന്തായിരിക്കും?

⁹ അവനു കഷ്ടതയും പ്രയാസവും നേരിടുമ്പോൾ ദൈവം അവന്റെ നിലവിളി കേൾക്കുമോ?

¹⁰ അവൻ സർവശക്തനിൽ ആനന്ദം കണ്ടെത്തുമോ? എല്ലാ കാലത്തും അവൻ ദൈവത്തെ വിളിച്ചപേക്ഷിക്കുമോ?

¹¹ ദൈവത്തിന്റെ ശക്തിയെക്കുറിച്ചു ഞാൻ നിങ്ങളെ പഠിപ്പിക്കും, അവിടുത്തെ ഉദ്ദേശ്യം എന്തെന്നു ഞാൻ മറച്ചുവയ്‍ക്കുകയില്ല.

¹² നിങ്ങളെല്ലാവരും അതു കണ്ടറിഞ്ഞിരിക്കുന്നുവല്ലോ; പിന്നെ എന്തിന് ഈ വ്യർഥഭാഷണം?

¹³ ഇതാണു ദുഷ്ടനു ദൈവത്തിൽനിന്നു ലഭിക്കുന്ന ഓഹരി; പരദ്രോഹി സർവശക്തനിൽനിന്നു നേടുന്ന അവകാശം.

¹⁴ അവനു സന്താനങ്ങൾ പെരുകുന്നത് വാളിന് ഇരയാകാൻ വേണ്ടിയാണ്. അവന്റെ സന്തതിക്കു വേണ്ടുവോളം ആഹാരം ലഭിക്കുകയില്ല.

¹⁵ അവശേഷിക്കുന്നവർ മഹാമാരിക്ക് ഇരയാകും; അവരുടെ വിധവമാർ അവരെക്കുറിച്ചു വിലപിക്കുകയുമില്ല.

¹⁶ അവർ നിലത്തെ പൂഴിപോലെ വെള്ളി കൂട്ടിവച്ചേക്കാം. മണ്ണുപോലെ വസ്ത്രം വാരിക്കൂട്ടിയേക്കാം.

¹⁷ പക്ഷേ നീതിമാന്മാർ ആയിരിക്കും അവ ധരിക്കുക. നിഷ്കളങ്കരായിരിക്കും വെള്ളി വീതിച്ചെടുക്കുക.

¹⁸ ചിലന്തി തന്റെ വല കെട്ടുന്നതുപോലെയും കാവല്‌ക്കാർ മാടം നിർമ്മിക്കുന്നതുപോലെയും അവൻ വീടു പണിയുന്നു.

¹⁹ അവൻ ഉറങ്ങാൻ പോകുന്നതു ധനവാനായിട്ടായിരിക്കും. പക്ഷേ അതു നീണ്ടുനില്‌ക്കുകയില്ല. ഉണരുമ്പോഴേക്ക് അവന്റെ ധനം നഷ്ടപ്പെട്ടിരിക്കും.

²⁰ പെരുവെള്ളംപോലെ ഭയം അവനെ കീഴ്പെടുത്തും. രാത്രിയിൽ കൊടുങ്കാറ്റ് അവനെ പറപ്പിച്ചു കൊണ്ടുപോകും.

²¹ കിഴക്കൻകാറ്റ് അവനെ പൊക്കി എടുക്കും. പിന്നെ അവനെ കാണുകയില്ല; അവന്റെ സ്ഥാനത്തുനിന്ന് അത് അവനെ തൂത്തുമാറ്റും.

²² നിർദ്ദയം അത് അവനെ ചുഴറ്റിയെറിയും; അതിന്റെ പിടിയിൽനിന്ന് ഒഴിഞ്ഞുമാറാൻ അവൻ നോക്കും.

²³ അത് അവനെ നോക്കി കൈകൊട്ടും, അവന്റെ നേരേ സീൽക്കാരം പുറപ്പെടുവിക്കും.