ഇയ്യോബ് 26 - സത്യവേദപുസ്തകം C.L. (BSI)

ഇയ്യോബിന്റെ മറുപടി

¹ അപ്പോൾ ഇയ്യോബ് പറഞ്ഞു:

² “ഇങ്ങനെയാണോ നീ ദുർബലനെ സഹായിക്കുന്നത്? ബലഹീനമായ കരങ്ങളെ രക്ഷിക്കുന്നത്?

³ അജ്ഞനു നീ എന്ത് ഉപദേശം നല്‌കി? എത്ര ഉദാരമായിട്ടാണ് നീ വിജ്ഞാനം പകർന്നത്!

⁴ ആരുടെ സഹായത്തോടെയാണു നീ ഈ വാക്കുകൾ ഉച്ചരിച്ചത്? ആരുടെ ആത്മാവാണ് നിന്നിൽനിന്നു പുറത്തുചാടിയത്?

⁵ പാതാളവാസികൾ വിറകൊള്ളുന്നു. ജലവും അതിലെ ജീവികളും നടുങ്ങുന്നു.

⁶ പാതാളം ദൈവമുമ്പാകെ തുറന്നിരിക്കുന്നു; നരകത്തെ ഒന്നും മറയ്‍ക്കുന്നില്ല.

⁷ ഉത്തരദിക്കിനെ ദൈവം ശൂന്യതയുടെമേൽ വിരിക്കുന്നു; ഭൂമിയെ ശൂന്യതയ്‍ക്കുമേൽ തൂക്കിയിട്ടു.

⁸ അവിടുന്നു ജലത്തെ കാർമേഘങ്ങളിൽ ബന്ധിക്കുന്നു; അതു വഹിക്കുന്ന കാർമുകിൽ ചീന്തിപ്പോകുന്നില്ല.

⁹ അവിടുന്നു ചന്ദ്രന്റെ മുഖത്തെ മറയ്‍ക്കുന്നു. അതിനു മീതെ മേഘത്തെ വിരിക്കുന്നു.

¹⁰ ഇരുളും വെളിച്ചവും സന്ധിക്കുന്നു. സമുദ്രമുഖത്ത് അവിടുന്ന് ഒരു വൃത്തം വരച്ചു.

¹¹ ആകാശത്തിന്റെ തൂണുകൾ കുലുങ്ങുന്നു; അവിടുത്തെ ശാസനയാൽ അവ നടുങ്ങുന്നു.

¹² അവിടുന്നു മഹാശക്തിയാൽ സമുദ്രത്തെ നിശ്ചലമാക്കി; അവിടുത്തെ ജ്ഞാനത്താൽ രഹബിനെ തകർത്തു.

¹³ അവിടുത്തെ ശ്വാസത്താൽ ആകാശം ശോഭയുള്ളതായി; അവിടുത്തെ കരങ്ങൾ പാഞ്ഞുപോകുന്ന സർപ്പത്തെ പിളർന്നു.

¹⁴ ഇവയൊക്കെ അവിടുത്തെ നിസ്സാര പ്രവർത്തനങ്ങൾ മാത്രമാണ്; അവിടുത്തെ ഒരു നേരിയ സ്വരമേ നാം കേട്ടിട്ടുള്ളൂ. അവിടുത്തെ ശക്തിയുടെ മുഴക്കം ആർക്കു ഗ്രഹിക്കാൻ കഴിയും?”