ഇയ്യോബ് 19 - സത്യവേദപുസ്തകം C.L. (BSI)

ഇയ്യോബിന്റെ മറുപടി

¹ അപ്പോൾ ഇയ്യോബ് പറഞ്ഞു:

² “എത്രകാലം നിങ്ങൾ എന്നെ വാക്കുകൾകൊണ്ടു പീഡിപ്പിക്കുകയും പിച്ചിചീന്തുകയും ചെയ്യും?

³ ഇപ്പോൾ പത്തു തവണ നിങ്ങൾ എന്നെ നിന്ദിച്ചു; എന്നെ ഇങ്ങനെ ദ്രോഹിക്കാൻ നിങ്ങൾക്കു ലജ്ജയില്ലേ?

⁴ ഞാൻ തെറ്റു ചെയ്താൽത്തന്നെ അത് എന്റെ കൂടെ ഇരിക്കട്ടെ;

⁵ എന്റെ ദുർഗതി ചൂണ്ടി എന്നെക്കാൾ വലിയവരെന്നു നിങ്ങൾ ഭാവിക്കയാണ്.

⁶ എങ്കിൽ ദൈവം ആണ് എന്നെ ആ തെറ്റിൽ വീഴ്ത്തിയതെന്നും, വലയിൽ കുടുക്കിയതെന്നും അറിഞ്ഞുകൊള്ളുക.

⁷ ‘അതിക്രമം’ എന്നു ഞാൻ വിളിച്ചു പറഞ്ഞാലും, എനിക്കു മറുപടി കിട്ടുന്നില്ല; ഞാൻ ഉറക്കെ നിലവിളിച്ചാലും എനിക്കു നീതി ലഭിക്കുന്നില്ല.

⁸ കടന്നുപോകാനാകാത്തവിധം എന്റെ വഴി അവിടുന്ന് അടച്ചുകളഞ്ഞു; എന്റെ പാതകളിൽ അവിടുന്ന് ഇരുൾ പരത്തി.

⁹ അവിടുന്ന് എന്റെ മഹത്ത്വം എന്നിൽനിന്ന് ഉരിഞ്ഞെടുത്തു; എന്റെ ശിരസ്സിൽനിന്നു കിരീടം എടുത്തുകളഞ്ഞു.

¹⁰ എല്ലാ വശത്തുകൂടെയും അവിടുന്ന് എന്നെ തകർക്കുന്നു; എന്റെ കഥ കഴിഞ്ഞിരിക്കുന്നു. വൃക്ഷത്തെ എന്നപോലെ എന്റെ പ്രത്യാശയെ പിഴുതെറിഞ്ഞിരിക്കുന്നു;

¹¹ അവിടുത്തെ ക്രോധം എന്റെ നേരേ ജ്വലിച്ചിരിക്കുന്നു. അവിടുന്ന് എന്നെ ശത്രുവായി എണ്ണുന്നു.

¹² അവിടുത്തെ സൈന്യം എനിക്കെതിരെ അണിയായി വരുന്നു; അവർ എനിക്കെതിരെ ഉപരോധമുയർത്തി, എന്റെ കൂടാരത്തിനു ചുറ്റും പാളയമടിച്ചിരിക്കുന്നു.

¹³ ദൈവം എന്റെ സഹോദരന്മാരെ എന്നിൽനിന്ന് അകറ്റി എന്റെ പരിചയക്കാരെ അന്യരാക്കിത്തീർത്തു.

¹⁴ ബന്ധുജനങ്ങളും മിത്രങ്ങളും എന്നെ ഉപേക്ഷിച്ചു.

¹⁵ എന്റെ വീട്ടിൽ ആതിഥ്യം ആസ്വദിച്ചവർ എന്നെ മറന്നിരിക്കുന്നു; എന്റെ ദാസികൾ എന്നെ അപരിചിതനായി ഗണിക്കുന്നു. അവരുടെ ദൃഷ്‍ടിയിൽ ഞാനൊരു പരദേശി മാത്രം.

¹⁶ എന്റെ ഭൃത്യൻ വിളിച്ചാൽ വിളി കേൾക്കുന്നില്ല; എനിക്ക് അവനോടു യാചിക്കേണ്ടിവരുന്നു.

¹⁷ എന്റെ ഭാര്യ എന്നോട് അറപ്പുകാട്ടുന്നു. എന്റെ കൂടപ്പിറപ്പുകൾ എന്നെ വെറുക്കുന്നു.

¹⁸ കൊച്ചുകുട്ടികൾകൂടി എന്നെ നിന്ദിക്കുന്നു. എന്നെ കാണുമ്പോൾ അവർ പരിഹസിക്കുന്നു;

¹⁹ എന്റെ പ്രാണസ്നേഹിതന്മാർ എന്നെ വെറുക്കുന്നു. എന്റെ ഉറ്റസ്നേഹിതർ ശത്രുക്കളായി മാറിയിരിക്കുന്നു;

²⁰ എന്റെ ശരീരം എല്ലും തൊലിയുമായി, എന്റെ പല്ലും കൊഴിഞ്ഞിരിക്കുന്നു.

²¹ എന്റെ സ്നേഹിതരേ, എന്നോടു കരുണ കാട്ടുവിൻ! എന്നോടു കരുണ കാട്ടുവിൻ! ദൈവത്തിന്റെ കരം എന്നെ തകർത്തിരിക്കുന്നു.

²² ദൈവത്തെപ്പോലെ, നിങ്ങളും എന്നെ വേട്ടയാടുന്നതെന്ത്? ഞാൻ എല്ലും തോലുമായിട്ടും നിങ്ങൾക്ക് തൃപ്തിയായില്ലേ?

²³ എന്റെ വാക്കുകൾ എഴുതിവച്ചിരുന്നെങ്കിൽ! അവ ഒരു പുസ്തകത്തിൽ രേഖപ്പെടുത്തിയിരുന്നെങ്കിൽ!

²⁴ എന്നേക്കും നിലനില്‌ക്കത്തക്കവിധം നാരായവും ഈയവുംകൊണ്ട് അതു പാറയിൽ വരഞ്ഞുവച്ചിരുന്നെങ്കിൽ!

²⁵ എന്റെ വീണ്ടെടുപ്പുകാരൻ ജീവിക്കുന്നെന്നും അവിടുന്ന് അവസാനം എനിക്കു ന്യായം നടത്തിത്തരാൻ എഴുന്നേല്‌ക്കുമെന്നും ഞാനറിയുന്നു.

²⁶ എന്റെ ചർമം ഇങ്ങനെ നശിച്ചാലും ഞാൻ ദേഹരഹിതനായി ദൈവത്തെ കാണും.

²⁷ ഞാൻതന്നെ അവിടുത്തെ കാണും; എന്റെ കണ്ണുകൾ അവിടുത്തെ കാണും; എന്റെ ഹൃദയം കാത്തിരുന്നു തളരുന്നു;

²⁸ ‘നാം എങ്ങനെ അയാളെ പിന്തുടരും; അയാളിൽ നാം എങ്ങനെ കുറ്റം ആരോപിക്കും’ എന്നു നിങ്ങൾ പറയുന്നുവെങ്കിൽ

²⁹ വാളിനെ ഭയപ്പെടുക; ദൈവകോപം നിങ്ങളെ വെട്ടും; അങ്ങനെ ന്യായവിധിയുണ്ടെന്നു നിങ്ങൾ അറിയും”