ഇയ്യോബ് 13 - സത്യവേദപുസ്തകം C.L. (BSI)

¹ “ഇതാ ഞാൻ ഇവയെല്ലാം കാണുകയും കേൾക്കുകയും ഗ്രഹിക്കുകയും ചെയ്തിരിക്കുന്നു.

² നിങ്ങൾ അറിയുന്നതു ഞാനും അറിയുന്നു; നിങ്ങളെക്കാൾ ഞാൻ ഒട്ടും കുറഞ്ഞവനല്ല.

³ സർവശക്തനോടു ഞാൻ സംസാരിക്കാൻ പോകുകയാണ്; ദൈവത്തോട് എന്റെ കാര്യം വാദിക്കാൻ ഞാൻ ആഗ്രഹിക്കുന്നു.

⁴ നിങ്ങളാകട്ടെ, വ്യാജംകൊണ്ടു വെള്ളപൂശുന്നവർ; നിങ്ങളെല്ലാവരും മുറിവൈദ്യന്മാർതന്നെ.

⁵ മൗനം ഭജിച്ചിരുന്നെങ്കിൽ അതു നിങ്ങൾക്കു ജ്ഞാനമാകുമായിരുന്നു

⁶ ഇപ്പോൾ എന്റെ ന്യായവാദം കേട്ടുകൊള്ളുക, എന്റെ വ്യവഹാരം ശ്രദ്ധിക്കുക.

⁷ നിങ്ങൾ ദൈവത്തിനുവേണ്ടി വ്യാജം പറയുമോ? അവിടുത്തേക്കുവേണ്ടി വഞ്ചനാപൂർവം സംസാരിക്കുമോ?

⁸ നിങ്ങൾ പക്ഷം പിടിച്ച് ദൈവത്തിനുവേണ്ടി വാദിക്കുന്നുവോ?

⁹ അവിടുന്നു നിങ്ങളെ പരിശോധിച്ചാൽ നിങ്ങളിൽ നന്മ കണ്ടെത്തുമോ? മനുഷ്യനെ കബളിപ്പിക്കുന്നതുപോലെ, നിങ്ങൾക്കു ദൈവത്തെ കബളിപ്പിക്കാൻ കഴിയുമോ?

¹⁰ നിങ്ങൾ ഗൂഢമായി പക്ഷപാതം കാണിച്ചാൽ ദൈവം നിശ്ചയമായും നിങ്ങളെ ശാസിക്കും.

¹¹ അവിടുത്തെ മഹത്ത്വം നിങ്ങളെ സംഭീതരാക്കുകയില്ലേ? അവിടുത്തെക്കുറിച്ചുള്ള ഭീതി നിങ്ങളിൽ നിപതിക്കുകയില്ലേ?

¹² നിങ്ങളുടെ സൂക്തങ്ങൾ കരിഞ്ഞ പഴമൊഴികളാണ്. നിങ്ങളുടെ വാദങ്ങൾ മൺമതിലുകൾ മാത്രം!

¹³ മിണ്ടാതിരിക്കൂ, ഞാൻ സംസാരിക്കട്ടെ, എനിക്ക് എന്തും സംഭവിച്ചുകൊള്ളട്ടെ.

¹⁴ എന്റെ ശരീരം അപകടത്തിൽപ്പെടുത്താനും, ജീവൻ പണയപ്പെടുത്താനും ഞാൻ ഒരുക്കമാണ്.

¹⁵ ആശ കൈവിട്ട എന്നെ അവിടുന്ന് നിഗ്രഹിച്ചാൽത്തന്നെ എനിക്കെന്ത്? ഞാൻ അവിടുത്തെ മുഖത്തുനോക്കി വാദിക്കും.

¹⁶ അധർമി തിരുമുമ്പിൽ വരികയില്ല; അതാണ് എന്റെ രക്ഷ.

¹⁷ എന്റെ വാക്കുകൾ ശ്രദ്ധാപൂർവം കേൾക്കുക; എന്റെ പ്രഖ്യാപനം നിങ്ങളുടെ കാതിൽ മുഴങ്ങട്ടെ

¹⁸ ഇതാ, ഞാൻ എന്റെ ന്യായവാദങ്ങൾ ഒരുക്കിയിരിക്കുന്നു. ഞാൻ നിർദ്ദോഷിയായി വിധിക്കപ്പെടുമെന്ന് എനിക്കറിയാം.

¹⁹ ദൈവമേ, അവിടുന്ന് എന്നോടു വാദിക്കാൻ ഒരുങ്ങുകയാണോ? എങ്കിൽ ഞാൻ നിശ്ശബ്ദനായി മരിച്ചുകൊള്ളാം.

²⁰ രണ്ടു കാര്യം മാത്രം എനിക്കു അനുവദിച്ചു തരിക; എന്നാൽ ഞാൻ തിരുമുമ്പിൽനിന്ന് ഒളിക്കുകയില്ല.

²¹ എന്നെ ശിക്ഷിക്കുന്നതു മതിയാക്കിയാലും അവിടുത്തെ ഭയങ്കരത്വത്താൽ എന്നെ സംഭ്രാന്തനാക്കാതിരുന്നാലും.

²² പിന്നീട് എന്നെ വിളിക്കുക; ഞാൻ ഉത്തരം പറയാം; അല്ലെങ്കിൽ ഞാൻ സംസാരിക്കാം; അങ്ങ് ഉത്തരം അരുളിയാലും;

²³ എന്റെ പാപങ്ങളും അകൃത്യങ്ങളും എത്രയാണ്? എന്റെ അതിക്രമങ്ങളും പാപങ്ങളും എന്നെ ബോധ്യപ്പെടുത്തിയാലും.

²⁴ തിരുമുഖം എന്നിൽനിന്നു മറയ്‍ക്കുന്നത് എന്തുകൊണ്ട്? എന്നെ അവിടുന്നു ശത്രുവായി കരുതുന്നതെന്ത്?

²⁵ കൊഴിഞ്ഞുവീഴുന്ന ഇലയെ അങ്ങു ഭയപ്പെടുത്തുമോ? ഉണക്കപ്പതിരിനെ അങ്ങു പിന്തുടരുമോ?

²⁶ കയ്പേറിയ അനുഭവങ്ങൾ എനിക്കുവേണ്ടി അവിടുന്ന് എഴുതിവയ്‍ക്കുന്നു. എന്റെ യൗവനത്തിലെ അകൃത്യങ്ങളുടെ ഫലം അനുഭവിക്കുമാറാക്കുന്നു.

²⁷ എന്റെ കാലുകൾ അവിടുന്ന് ആമത്തിലിട്ടു; എന്റെ വഴികളെല്ലാം അങ്ങു സൂക്ഷിച്ചുനോക്കുന്നു. എന്റെ കാലടികൾക്ക് അങ്ങ് പരിധി വച്ചിരിക്കുന്നു.

²⁸ ചീഞ്ഞഴുകിയ വസ്തുപോലെയും ചിതലരിച്ച വസ്ത്രംപോലെയും മനുഷ്യൻ നശിച്ചുപോകുന്നു.