ന്യായാധിപന്മാർ 19 - സത്യവേദപുസ്തകം C.L. (BSI)

ലേവ്യനും അവന്റെ ഉപഭാര്യയും

¹ ഇസ്രായേലിൽ രാജാവില്ലാതിരുന്ന ആ കാലത്ത് എഫ്രയീം മലനാട്ടിന്റെ ഉൾപ്രദേശത്തു ഒരു ലേവ്യൻ വന്നു പാർത്തിരുന്നു; യെഹൂദ്യയിലെ ബേത്‍ലഹേംകാരിയായ ഒരു സ്‍ത്രീയെ ഉപഭാര്യയായി അയാൾ സ്വീകരിച്ചിരുന്നു.

² എന്നാൽ അവൾ അയാളോടു പിണങ്ങി ബേത്‍ലഹേമിലുള്ള പിതൃഭവനത്തിൽ പോയി അവിടെ നാലു മാസം പാർത്തു.

³ അവളെ അനുനയപൂർവം മടക്കിക്കൊണ്ടു വരുവാൻ അയാൾ അവളുടെ വീട്ടിലേക്കു പുറപ്പെട്ടു. ഒരു ഭൃത്യനും ഒരു ജോഡി കഴുതകളും കൂടെ ഉണ്ടായിരുന്നു; അവർ അവിടെ ചെന്നപ്പോൾ അവളുടെ പിതാവ് അവരെ സസന്തോഷം സ്വീകരിച്ചു.

⁴ അയാളുടെ നിർബന്ധംകൊണ്ട് ആ ലേവ്യൻ മൂന്നു ദിവസം അവിടെ പാർത്തു. അവർ അങ്ങനെ തിന്നും കുടിച്ചും രാത്രികൾ കഴിച്ചു;

⁵ നാലാം ദിവസം അതിരാവിലെ അയാൾ എഴുന്നേറ്റു യാത്രയ്‍ക്കൊരുങ്ങി. അപ്പോൾ അവളുടെ പിതാവ് പറഞ്ഞു: “അല്പം ഭക്ഷണം കഴിച്ച് ഉന്മേഷവാനായി നിനക്കു പോകാം.”

⁶ അവർ ഒരുമിച്ചിരുന്നു ഭക്ഷിക്കുകയും കുടിക്കുകയും ചെയ്തു. പിന്നീട് അയാൾ ലേവ്യനോടു പറഞ്ഞു: “ഈ രാത്രിയും ഇവിടെ പാർത്ത് നീ സന്തോഷിക്കുക.”

⁷ അയാൾ പോകാൻ എഴുന്നേറ്റെങ്കിലും ആ യുവതിയുടെ പിതാവ് വീണ്ടും നിർബന്ധിച്ചതുകൊണ്ട് അന്നും അവിടെ താമസിച്ചു.

⁸ അഞ്ചാം ദിവസവും പ്രഭാതത്തിൽ അയാൾ പോകാൻ ഒരുങ്ങി; “ഭക്ഷണം കഴിച്ച് ഉന്മേഷവാനായി വെയിലാറിയിട്ടു പോകാം” എന്നു യുവതിയുടെ പിതാവ് പറഞ്ഞു; അവർ ഒന്നിച്ചു ഭക്ഷണം കഴിച്ചു.

⁹ ലേവ്യനും അയാളുടെ ഉപഭാര്യയും ഭൃത്യനും യാത്രയ്‍ക്കായി എഴുന്നേറ്റു. അപ്പോൾ “നേരം സന്ധ്യയായല്ലോ; ഇവിടെത്തന്നെ രാപാർത്ത് ഉല്ലാസമായി കഴിയൂ; നാളെ അതിരാവിലെ എഴുന്നേറ്റു നിന്റെ വീട്ടിലേക്കു പോകാം” എന്ന് അവളുടെ പിതാവു പറഞ്ഞു.

¹⁰ എന്നാൽ അയാൾ അതിനു വിസമ്മതിച്ചു. അവർ യാത്ര പുറപ്പെട്ട് യെബൂസിന് എതിർവശത്തെത്തി. തന്റെ ഉപഭാര്യയും ഭൃത്യനും ജീനിയിട്ട രണ്ടു കഴുതകളും അയാളുടെ കൂടെ ഉണ്ടായിരുന്നു.

¹¹ അയാൾ യെബൂസിനു സമീപത്തെത്തിയപ്പോൾ നേരം വളരെ വൈകിയിരുന്നു; ഭൃത്യൻ ലേവ്യനോടു പറഞ്ഞു: “യെബൂസ്യരുടെ ഈ പട്ടണത്തിൽ നമുക്കു രാത്രികഴിക്കാം.”

¹² അയാൾ ഇങ്ങനെ മറുപടി പറഞ്ഞു: “ഇസ്രായേല്യരുടേതല്ലാത്ത ഈ വിജാതീയപട്ടണത്തിൽ നമുക്കു പാർത്തുകൂടാ; നമുക്കു ഗിബെയായിലേക്കു പോകാം.”

¹³ അയാൾ തുടർന്നു “ഈ കാണുന്ന പട്ടണങ്ങളിൽ ഏതിലേക്കെങ്കിലും നമുക്കു പോകാം; ഗിബെയായിലോ, രാമായിലോ രാത്രികഴിക്കാം.”

¹⁴ അവർ യാത്ര തുടർന്നു; ബെന്യാമീന്യരുടെ പട്ടണമായ ഗിബെയായ്‍ക്കു സമീപമെത്തി. അപ്പോൾ സൂര്യൻ അസ്തമിച്ചിരുന്നു.

¹⁵ രാപാർക്കുന്നതിന് അവർ ഗിബെയായിൽ പ്രവേശിച്ചു; അവിടെ ആരും അവരെ സ്വീകരിക്കാഞ്ഞതിനാൽ പട്ടണത്തിലെ തുറസ്സായ ഒരു സ്ഥലത്ത് അവർ ഇരുന്നു.

¹⁶ അപ്പോൾ ഒരു വൃദ്ധൻ വയലിൽനിന്ന് ജോലി കഴിഞ്ഞു മടങ്ങിവന്നു. അയാൾ എഫ്രയീം മലനാട്ടുകാരനും അവിടെ വന്നുപാർക്കുന്നവനുമായിരുന്നു; ബെന്യാമീൻഗോത്രക്കാരാണ് അവിടെ പാർത്തിരുന്നത്.

¹⁷ പട്ടണത്തിലെ തുറസ്സായ സ്ഥലത്ത് ഒരു വഴിയാത്രക്കാരൻ ഇരിക്കുന്നതു കണ്ട് ആ വൃദ്ധൻ ചോദിച്ചു: “താങ്കൾ എവിടേക്കു പോകുന്നു? എവിടെനിന്നു വരുന്നു?”

¹⁸ അയാൾ പറഞ്ഞു: “എഫ്രയീം മലനാട്ടിലേക്കു പോകുകയാണ്. അതാണ് എന്റെ നാട്; ഞാൻ യെഹൂദ്യയിലെ ബേത്‍ലഹേമിലേക്കു പോയിരുന്നു; ഇപ്പോൾ എന്റെ വീട്ടിലേക്ക് മടങ്ങിപ്പോകുകയാണ്. എന്നാൽ ഈ രാത്രി കഴിച്ചുകൂട്ടുന്നതിന് ഇവിടെ ആരും എന്നെ സ്വീകരിക്കുന്നില്ല.

¹⁹ ഞങ്ങളുടെ കഴുതകൾക്കാവശ്യമായ വൈക്കോലും തീറ്റയും ഞങ്ങളുടെ കൈവശമുണ്ട്; എനിക്കും എന്റെ ഉപഭാര്യക്കും ഭൃത്യനും ആവശ്യമായ അപ്പവും വീഞ്ഞും ഞങ്ങളുടെ പക്കലുണ്ട്. ഞങ്ങൾക്ക് ആവശ്യമുള്ളതെല്ലാം ഞങ്ങളുടെ കൈയിലുണ്ട്.”

²⁰ വൃദ്ധൻ പറഞ്ഞു: “വിഷമിക്കേണ്ടാ, നിനക്ക് ആവശ്യമുള്ളതെല്ലാം ഞാൻ നല്‌കാം. ഈ തുറസ്സായ സ്ഥലത്ത് രാപാർക്കരുത്.”

²¹ വൃദ്ധൻ അവരെ വീട്ടിൽ കൂട്ടിക്കൊണ്ടുപോയി; കഴുതകൾക്കു തീറ്റകൊടുത്തു; അവർ കൈകാലുകൾ കഴുകി ഭക്ഷണപാനീയങ്ങൾ കഴിച്ചു.

²² അവർ ഉല്ലാസഭരിതരായിരിക്കുമ്പോൾ പട്ടണത്തിലെ ചില നീചന്മാർ വീടു വളഞ്ഞു. വാതിലിൽ തട്ടി. അവർ വൃദ്ധനായ വീട്ടുടമയോടു പറഞ്ഞു: “നിന്റെ വീട്ടിൽ വന്നിരിക്കുന്ന പുരുഷനെ പുറത്തുവിടുക; ഞങ്ങൾ അവനോടൊത്തു രമിക്കട്ടെ.”

²³ വൃദ്ധൻ പുറത്തുവന്ന് അവരോടു പറഞ്ഞു: “എന്റെ സഹോദരന്മാരേ, അങ്ങനെയരുത്; ഈ തിന്മ നിങ്ങൾ ചെയ്യരുത്; ഈ മനുഷ്യൻ എന്റെ അതിഥിയാണ്. ഇയാളോടു നീചമായി പ്രവർത്തിക്കരുത്.

²⁴ ഇതാ, എന്റെ കന്യകയായ പുത്രിയും ഈ മനുഷ്യന്റെ ഉപഭാര്യയും. നിങ്ങളുടെ ഇഷ്ടംപോലെ ഇവരോടു പ്രവർത്തിച്ചുകൊള്ളുക; ഈ മനുഷ്യനോടു ഹീനമായി പെരുമാറരുത്.”

²⁵ എന്നാൽ അയാൾ പറഞ്ഞത് അവർ ശ്രദ്ധിച്ചില്ല; ലേവ്യൻ തന്റെ ഉപഭാര്യയെ അവർക്കു വിട്ടുകൊടുത്തു; രാത്രി മുഴുവൻ അവർ അവളെ ബലാൽക്കാരം ചെയ്തു.

²⁶ പ്രഭാതമായപ്പോൾ അവർ അവളെ വിട്ടയച്ചു; ഉടനെ അവൾ തന്റെ ഭർത്താവു പാർത്തിരുന്ന വൃദ്ധന്റെ വീട്ടുപടിക്കൽ വന്നു തളർന്നു കിടന്നു.

²⁷ രാവിലെ എഴുന്നേറ്റു യാത്രയ്‍ക്കുവേണ്ടി ലേവ്യൻ വാതിൽ തുറന്നപ്പോൾ അവൾ കട്ടിളപ്പടിമേൽ കൈ വച്ചു കിടക്കുന്നതു കണ്ടു.

²⁸ അവൻ അവളോടു പറഞ്ഞു: “എഴുന്നേല്‌ക്കൂ, നമുക്കു പോകാം.” എങ്കിലും ഒരു മറുപടിയും ഉണ്ടായില്ല. അയാൾ അവളെ എടുത്തു കഴുതപ്പുറത്തുവച്ചു സ്വദേശത്തേക്കു പോയി.

²⁹ വീട്ടിൽ എത്തിയ ഉടൻതന്നെ ഒരു കത്തിയെടുത്ത് അവൻ തന്റെ ഉപഭാര്യയുടെ അവയവങ്ങൾ ഛേദിച്ച് പന്ത്രണ്ടു കഷണങ്ങളാക്കി ഇസ്രായേലിൽ എല്ലായിടത്തേക്കും കൊടുത്തയച്ചു.

³⁰ അതു കണ്ടവരെല്ലാം പറഞ്ഞു: “ഇസ്രായേൽജനം ഈജിപ്തിൽനിന്നു പോന്നതിനുശേഷം ഇതുപോലൊരു സംഭവം കണ്ടിട്ടില്ല, ഉണ്ടായിട്ടുമില്ല; ആലോചിച്ച് എന്താണ് ചെയ്യേണ്ടതെന്നു പറയൂ.”