യെശയ്യാവ് 24 - സത്യവേദപുസ്തകം C.L. (BSI)

ന്യായവിധി

¹ സർവേശ്വരൻ ഭൂമിയെ ശൂന്യവും വിജനവും ആക്കിത്തീർക്കും. ഭൂമുഖത്തെ കീഴ്മേൽ മറിച്ച് അതിലെ നിവാസികളെ ചിതറിക്കും.

² ജനത്തിനും പുരോഹിതനും ദാസനും യജമാനനും ദാസിക്കും യജമാനത്തിക്കും വാങ്ങുന്നവനും വിൽക്കുന്നവനും വായ്പ വാങ്ങുന്നവനും കൊടുക്കുന്നവനും പലിശയ്‍ക്കു പണം വാങ്ങുന്നവനും കൊടുക്കുന്നവനും ഒരേ അനുഭവം ഉണ്ടാകും.

³ ഭൂമി നിശ്ശേഷം ശൂന്യമാകും; പൂർണമായി കൊള്ളയടിക്കപ്പെടും. ഇതു സർവേശ്വരന്റെ വചനം.

⁴ ഭൂമി വിലപിക്കും. അത് ഉണങ്ങിക്കരിയും. ലോകം തളരും, അത് ഉണങ്ങി വരളും.

⁵ ലോകത്തിലെ ഉന്നതന്മാർ തളർന്നുപോകും. ഭൂവാസികൾ നിമിത്തം ഭൂമി മലിനയായിത്തീർന്നിരിക്കുന്നു. അവർ നിയമങ്ങളും ചട്ടങ്ങളും ലംഘിക്കുകയും ശാശ്വതമായ ഉടമ്പടി തകർക്കുകയും ചെയ്തിരിക്കുന്നു.

⁶ അതുകൊണ്ടു ഭൂമി ശാപഗ്രസ്തമായിരിക്കുന്നു. ഭൂവാസികൾ തങ്ങളുടെ അപരാധം നിമിത്തം ദുരിതം അനുഭവിക്കുന്നു. അവർ വെന്തു കരിയുന്നു. ചുരുക്കം ചിലർ അവശേഷിക്കുന്നു. മുന്തിരിവള്ളി വാടുന്നു.

⁷ പുതുവീഞ്ഞ് ദുർലഭമായിത്തീരുന്നു. ആഹ്ലാദചിത്തർ നെടുവീർപ്പിടുന്നു.

⁸ തപ്പുകളുടെ താളമേളവും ആർപ്പുവിളിയുടെ ഘോഷവും കിന്നരത്തിന്റെ ആഹ്ലാദസ്വരവും നിലച്ചു.

⁹ അവർ പാടിക്കൊണ്ട് ഇനി വീഞ്ഞു കുടിക്കുകയില്ല. മദ്യം അവർക്കു കയ്പായിത്തീരും.

¹⁰ താറുമാറായ നഗരം വീണടിഞ്ഞിരിക്കുന്നു. ആർക്കും പ്രവേശിച്ചുകൂടാത്തവിധം വീടുകളെല്ലാം അടയ്‍ക്കപ്പെട്ടിരിക്കുന്നു.

¹¹ വീഞ്ഞില്ലാത്തതിനാൽ വീഥികളിൽ നിലവിളി ഉയരുന്നു. സന്തോഷം അസ്തമിച്ചിരിക്കുന്നു.

¹² ഭൂമിയിൽ ആഹ്ലാദം അപ്രത്യക്ഷമായിരിക്കുന്നു. നഗരവാതിലുകൾ തല്ലിത്തകർക്കപ്പെട്ടിരിക്കുന്നു. നഗരത്തിൽ ശൂന്യത അവശേഷിച്ചിരിക്കുന്നു.

¹³ ഒലിവു തല്ലുന്നതുപോലെയും മുന്തിരി വിള എടുത്തശേഷം കാലാപെറുക്കുന്നതുപോലെയും ആയിരിക്കും ഭൂമിയിൽ ജനതകളുടെ ഇടയിൽ ഇതു സംഭവിക്കുക.

¹⁴ അവർ ആഹ്ലാദത്തോടെ പാടും. പടിഞ്ഞാറുനിന്ന് അവർ ആർത്തുഘോഷിച്ച് സർവേശ്വരന്റെ മഹത്ത്വത്തെ പ്രകീർത്തിക്കും.

¹⁵ അതിനാൽ കിഴക്കുള്ളവർ സർവേശ്വരനെ വാഴ്ത്തിപ്പുകഴ്ത്തട്ടെ. തീരദേശവാസികൾ ഇസ്രായേലിന്റെ ദൈവമായ സർവേശ്വരന്റെ മഹത്ത്വത്തെ പ്രകീർത്തിക്കട്ടെ.

¹⁶ നീതിമാനായ ദൈവത്തെ പ്രകീർത്തിക്കുന്ന ഗാനം ഭൂമിയുടെ അറുതിയിൽനിന്നു നാം കേൾക്കുന്നു. എന്നാൽ ഞാൻ പറയുന്നു: ഞാൻ ക്ഷയിച്ചുപോകുന്നു. ക്ഷയിച്ചു പോകുന്നു. ഹാ! എനിക്കു ദുരിതം! വഞ്ചകർ വഞ്ചിക്കുന്നു. അവർ കൊടിയ വഞ്ചന കാട്ടുന്നു.

¹⁷ ഭൂവാസികളേ, ഭീകരതയും ചതിക്കുന്ന ഗർത്തവും കെണിയും നിങ്ങളെ കാത്തിരിക്കുന്നു.

¹⁸ ഭീകരശബ്ദം കേട്ട് ഓടുന്നവർ കുഴിയിൽ വീഴും. കുഴിയിൽനിന്നും കയറുന്നവർ കെണിയിൽ പെടും. ആകാശജാലകങ്ങൾ തുറന്നിരിക്കുന്നു. ഭൂമിയുടെ അടിസ്ഥാനങ്ങൾ കുലുങ്ങുന്നു.

¹⁹ ഭൂമി തീർത്തും തകർന്നുകഴിഞ്ഞു. അതു വിണ്ടുകീറിയിരിക്കുന്നു. അതു പ്രകമ്പനം കൊള്ളുന്നു.

²⁰ ഭൂമി ഉന്മത്തനെപ്പോലെ ചാഞ്ചാടുന്നു. കാറ്റിൽ കാവൽമാടം എന്നപോലെ ആടി ഉലയുന്നു. അതിന്റെ അകൃത്യഭാരം അത്യധികമാകയാൽ അതു വീഴുന്നു. ഇനി എഴുന്നേല്‌ക്കുകയില്ല.

²¹ അന്നു സർവേശ്വരൻ ആകാശശക്തികളെ ആകാശത്തു വച്ചും, ഭൂപതികളെ ഭൂമിയിൽവച്ചും ശിക്ഷിക്കും.

²² ഇരുട്ടറയിൽ തടവുകാരെ എന്നപോലെ അവരെ ഒരുമിച്ച് ഒരു കുഴിയിൽ ഇടും. അനേകനാളുകൾക്കു ശേഷം അവരെ ശിക്ഷിക്കും. അന്ന് ചന്ദ്രൻ മുഖം മറയ്‍ക്കും. സൂര്യൻ നാണിക്കും.

²³ സർവശക്തനായ സർവേശ്വരൻ സീയോൻപർവതത്തിലും യെരൂശലേമിലും വാണരുളുമല്ലോ. അവിടുന്നു ശ്രേഷ്ഠപുരുഷന്മാരുടെ മുമ്പിൽ തന്റെ മഹത്ത്വം വെളിപ്പെടുത്തും.