യെഹെസ്കേൽ 30 - സത്യവേദപുസ്തകം C.L. (BSI)

ഈജിപ്തിനെ ശിക്ഷിക്കും

¹ സർവേശ്വരന്റെ അരുളപ്പാട് എനിക്കുണ്ടായി:

² “മനുഷ്യപുത്രാ, പ്രവചിക്കുക; സർവേശ്വരനായ കർത്താവ് ഇങ്ങനെ അരുളിച്ചെയ്യുന്നു എന്നു പറയുക.

³ ആ ദിവസം എത്ര ദുരിതപൂർണം എന്നു നിലവിളിക്കുക. അത് അടുത്തിരിക്കുന്നു; അതേ, സർവേശ്വരന്റെ ദിവസം ആഗതമായിരിക്കുന്നു. അതു മേഘാവൃതമായ ദിവസമായിരിക്കും; ജനതകളുടെ വിനാശസമയം!

⁴ ഈജിപ്തിന്റെമേൽ ഒരു വാൾ നിപതിക്കും; എത്യോപ്യ കൊടുംവേദനയിൽ അകപ്പെടും. ഈജിപ്തിൽ അനേകംപേർ കൊല്ലപ്പെടും. അതിന്റെ സമ്പത്തു കൊള്ളയടിക്കപ്പെടുകയും അടിസ്ഥാനങ്ങൾ തകർക്കപ്പെടുകയും ചെയ്യും.

⁵ അവരോടൊപ്പം എത്യോപ്യ, പൂത്, ലൂദ്, അറേബ്യ, ലിബിയ എന്നിവയിലെയും സഖ്യ ദേശങ്ങളിലെയും ജനങ്ങൾ സംഹരിക്കപ്പെടും.

⁶ സർവേശ്വരൻ അരുളിച്ചെയ്യുന്നു: “ഈജിപ്തിനു പിന്തുണ നല്‌കുന്നവർ വീഴും. ഈജിപ്തിന്റെ അഹങ്കാരത്തിമർപ്പ് അടങ്ങും. മിഗ്ദോൻമുതൽ സെവേനെവരെയുള്ളവർ വാളിനിരയാകുമെന്നു സർവേശ്വരനായ കർത്താവ് അരുളിച്ചെയ്യുന്നു.

⁷ വിജനമാക്കപ്പെട്ട ദേശങ്ങളുടെ മധ്യേ അവൾ വിജനമായി കിടക്കും. ശൂന്യമാക്കപ്പെട്ട നഗരങ്ങളുടെ നടുവിൽ അവളുടെ നഗരങ്ങളും ശൂന്യമായി കിടക്കും.

⁸ ഞാൻ ഈജിപ്തിനെ അഗ്നിക്കിരയാക്കുകയും അവളുടെ സഹായികളെ തകർക്കുകയും ചെയ്യുമ്പോൾ ഞാനാണു സർവേശ്വരനെന്ന് അവർ അറിയും.

⁹ അന്ന് അപകടഭീതി കൂടാതെ കഴിയുന്ന എത്യോപ്യരെ പരിഭ്രാന്തരാക്കാൻവേണ്ടി എന്റെ അടുക്കൽനിന്നു ദൂതന്മാർ കപ്പൽ കയറി പുറപ്പെടും. ഈജിപ്തിന്റെ വിനാശദിനത്തിൽ എത്യോപ്യർക്കു കഠിനവേദനയുണ്ടാകും. ആ ദിവസം ഇതാ, ആഗതമായിരിക്കുന്നു.

¹⁰ സർവേശ്വരനായ കർത്താവ് അരുളിച്ചെയ്യുന്നു: “ബാബിലോൺരാജാവായ നെബുഖദ്നേസരിന്റെ കൈകളാൽ ഈജിപ്തിന്റെ സമൃദ്ധിക്ക് ഞാൻ അറുതി വരുത്തും.

¹¹ ദേശത്തെ നശിപ്പിക്കാൻ അയാളെയും അയാളോടൊപ്പം ജനതകളിൽ ഏറ്റവും ഭീകരന്മാരായ അയാളുടെ ജനങ്ങളെയും കൊണ്ടുവരും. അവർ ഈജിപ്തിനുനേരെ വാൾ ഊരും; ദേശത്തെ മൃതശരീരങ്ങൾകൊണ്ടു നിറയ്‍ക്കും.

¹² നൈൽ നദി ഞാൻ വറ്റിക്കും; ദേശം ദുഷ്ടജനങ്ങൾക്കു വിറ്റുകളയും. വിദേശീയരുടെ കരങ്ങളാൽ ദേശവും അതിലുള്ള സമസ്തവും ഞാൻ ശൂന്യമാക്കും;” സർവേശ്വരനാണ് ഇതു പറയുന്നത്.

¹³ സർവേശ്വരനായ കർത്താവ് ഇങ്ങനെ അരുളിച്ചെയ്യുന്നു: ഞാൻ വിഗ്രഹങ്ങൾ നശിപ്പിക്കും. മെംഫീസിലെ പ്രതിമകൾ ഇല്ലാതാക്കും. ഈജിപ്തിൽ ഇനിമേൽ ഒരു രാജാവും ഉണ്ടായിരിക്കുകയില്ല. ഈജിപ്തിലെങ്ങും ഞാൻ ഭീതി പരത്തും.

¹⁴ ഞാൻ പത്രോസ് ശൂന്യമാക്കും; സോവാൻ അഗ്നിക്കിരയാക്കും. തേബസിൽ ഞാൻ ന്യായവിധി നടത്തും.

¹⁵ ഈജിപ്തിന്റെ ശക്തിദുർഗമായ സീൻപട്ടണത്തിന്മേൽ ഞാൻ എന്റെ ക്രോധം ചൊരിയും. തേബസിലെ ജനങ്ങളെ സംഹരിക്കും.

¹⁶ ഈജിപ്തിനു ഞാൻ തീ വയ്‍ക്കും. സീൻ അതിവേദനയിൽ അമരും. തേബസ് ഭേദിക്കപ്പെടും. അതിന്റെ മതിലുകൾ ഇടിഞ്ഞുവീഴും.

¹⁷ ആവെനിലെയും പിബേസെത്തിലെയും യുവാക്കൾ വാളിനിരയാകും. മറ്റുള്ളവർ തടവുകാരാക്കപ്പെടും.

¹⁸ തഹഫ്നേഹെസിൽ ഈജിപ്തിന്റെ ആധിപത്യം തകർക്കുമ്പോൾ അവിടെ പകൽ ഇരുണ്ടുപോകും. അവളുടെ അഹങ്കാരത്തിനു ഞാൻ അറുതി വരുത്തും. ഒരു മേഘം അവളെ മൂടും; അവളുടെ പുത്രിമാർ തടവുകാരാക്കപ്പെടും.

¹⁹ അങ്ങനെ ഈജിപ്തിന്റെമേൽ ഞാൻ ന്യായവിധിനടത്തും. അപ്പോൾ ഞാനാണു സർവേശ്വരനെന്ന് അവർ ഗ്രഹിക്കും.”

ഫറവോയുടെ ബലം തകരും

²⁰ പ്രവാസത്തിന്റെ പതിനൊന്നാം വർഷം ഒന്നാംമാസം ഏഴാം ദിവസം സർവേശ്വരന്റെ അരുളപ്പാട് എനിക്കുണ്ടായി:

²¹ “മനുഷ്യപുത്രാ, ഈജിപ്തിലെ രാജാവായ ഫറവോന്റെ കൈ ഞാൻ ഒടിച്ചിരിക്കുന്നു. വാൾ പിടിക്കത്തക്കവിധം ആ ഭുജം ആരും വച്ചുകെട്ടുകയോ ചികിത്സിക്കുകയോ ചെയ്കയില്ല.

²² അതുകൊണ്ടു സർവേശ്വരനായ കർത്താവ് അരുളിച്ചെയ്യുന്നു: ഇതാ, ഞാൻ ഈജിപ്തിലെ രാജാവായ ഫറവോയ്‍ക്ക് എതിരാണ്. അവന്റെ ഇരുകൈകളും ബലമുള്ളതും ഒടിഞ്ഞതും ഞാൻ തകർത്തുകളയും. അവന്റെ കൈയിൽനിന്ന് ഞാൻ വാൾ താഴെ വീഴുമാറാക്കും.

²³ ഈജിപ്തുകാരെ ഞാൻ ജനതകളുടെ ഇടയിൽ ചിതറിക്കും. രാജ്യാന്തരങ്ങളിൽ ഞാൻ അവരെ നടും.

²⁴ ബാബിലോൺരാജാവിന്റെ ഭുജങ്ങൾ ഞാൻ ബലിഷ്ഠമാക്കും. അവന്റെ കൈയിൽ എന്റെ വാൾ കൊടുക്കും. ഫറവോയുടെ ഭുജങ്ങൾ ഞാൻ ഒടിക്കും. മാരകമായ ക്ഷതമേറ്റവനെപ്പോലെ അയാൾ ഞരങ്ങും.

²⁵ ബാബിലോൺ രാജാവിന്റെ ഭുജങ്ങൾ ഞാൻ ബലപ്പെടുത്തും. എന്നാൽ ഫറവോയുടെ കൈകൾ നിർജീവമായിത്തീരും. അപ്പോൾ ഞാനാണു സർവേശ്വരനെന്ന് അവർ ഗ്രഹിക്കും. ബാബിലോൺ രാജാവിന്റെ കൈയിൽ എന്റെ വാൾ കൊടുക്കും.

²⁶ അയാൾ ഈജിപ്തിന്റെ നേരെ അതു വീശും. ഞാൻ ജനതകളുടെ ഇടയിൽ ഈജിപ്തുകാരെ ചിതറിക്കും. രാജ്യാന്തരങ്ങളിൽ അവരെ നടും. അപ്പോൾ ഞാനാകുന്നു സർവേശ്വരനെന്ന് അവർ അറിയും.”