യെഹെസ്കേൽ 29 - സത്യവേദപുസ്തകം C.L. (BSI)

ഈജിപ്തിനെതിരെ പ്രവചനം

¹ പ്രവാസത്തിന്റെ പത്താം വർഷം പത്താംമാസം പന്ത്രണ്ടാം ദിവസം സർവേശ്വരന്റെ അരുളപ്പാട് എനിക്കുണ്ടായി:

² “മനുഷ്യപുത്രാ, നീ ഈജിപ്തുരാജാവായ ഫറവോയുടെ നേരെ തിരിഞ്ഞ് അയാൾക്കും ഈജിപ്തിനും എതിരെ പ്രവചിക്കുക;

³ സർവേശ്വരനായ കർത്താവ് അരുളിച്ചെയ്യുന്നു എന്നു പറയുക. ഈജിപ്തുരാജാവായ ഫറവോയേ, ഞാൻ നിനക്ക് എതിരാണ്; നദികളുടെ നടുവിൽ കിടക്കുന്ന മഹാസർപ്പമേ, നൈൽനദി എൻറേതാണ്; ഞാനാണ് അതിനെ സൃഷ്‍ടിച്ചത് എന്നു നീ പറയുന്നുവല്ലോ.

⁴ നിന്റെ താടിയെല്ലിൽ ഞാൻ ചൂണ്ട കോർക്കും; നിന്റെ നദികളിലെ മത്സ്യങ്ങളെ നിന്റെ ചെതുമ്പലിൽ ഒട്ടിക്കും.

⁵ നിന്റെ ചെതുമ്പലിൽ ഒട്ടിപ്പിടിച്ച സർവ മത്സ്യങ്ങളോടുകൂടി നദികളുടെ മധ്യത്തിൽനിന്നു ഞാൻ നിന്നെ വലിച്ചുകയറ്റി നിന്നെയും നിന്റെ നദികളിലെ മത്സ്യങ്ങളെയും ഞാൻ മരുഭൂമിയിലേക്കു വലിച്ചെറിയും; നീ തുറസ്സായ സ്ഥലത്തുചെന്നു വീഴും. ആരും നിന്നെ ഒന്നിച്ചു കൂട്ടുകയോ മറവു ചെയ്യുകയോ ഇല്ല. ഭൂമിയിലെ മൃഗങ്ങൾക്കും ആകാശത്തിലെ പക്ഷികൾക്കും നിന്നെ ഞാനിരയാക്കും.

⁶ ഞാനാണു സർവേശ്വരനെന്ന് ഈജിപ്തിൽ നിവസിക്കുന്ന എല്ലാവരും അപ്പോൾ അറിയും. ഇസ്രായേൽജനത്തിനു നീ ഒരു ഞാങ്ങണവടിയായിരുന്നുവല്ലോ. അവർ നിന്നെ പിടിച്ചപ്പോൾ നീ ഒടിഞ്ഞ് അവരുടെ തോളിൽ കുത്തിക്കയറി.

⁷ അവർ നിന്റെമേൽ ചാരി നിന്നപ്പോൾ നീ ഒടിഞ്ഞുപോകുകയും അവരുടെ നടുവ് ഉളുക്കുകയും ചെയ്തു.

⁸ അതുകൊണ്ട് സർവേശ്വരനായ കർത്താവ് അരുളിച്ചെയ്യുന്നു: “ഞാൻ നിന്റെ നേർക്ക് ഒരു വാളയച്ചു മനുഷ്യരെയും മൃഗങ്ങളെയും നിന്നിൽനിന്നു വിച്ഛേദിക്കും.

⁹ അപ്പോൾ ഈജിപ്തു ശൂന്യവും പാഴുമായിത്തീരും. അങ്ങനെ ഞാനാണ് സർവേശ്വരനെന്ന് അവർ അറിയും. ‘നൈൽനദി എൻറേതാണ് ഞാൻ അതിനെ സൃഷ്‍ടിച്ചു’ എന്നു നീ പറഞ്ഞു.

¹⁰ അതുകൊണ്ട് ഞാൻ നിനക്കും നിന്റെ നദികൾക്കും എതിരാണ്. ഞാൻ ഈജിപ്തിനെ മിഗ്ദോൻ പട്ടണംമുതൽ സെവേനെ പട്ടണംവരെ എത്യോപ്യയുടെ അതിർത്തിയോളം പാഴും ശൂന്യവും ആക്കിത്തീർക്കും.

¹¹ നാല്പതു വർഷത്തോളം അവിടെ മനുഷ്യവാസം ഉണ്ടായിരിക്കുകയില്ല; മനുഷ്യനോ മൃഗമോ അതിലൂടെ സഞ്ചരിക്കുകയുമില്ല.

¹² വിജനമായ ദേശങ്ങളുടെ നടുവിൽ ഞാൻ ഈജിപ്തിനെ വിജനമാക്കിയിടും. വിജനമാക്കപ്പെട്ട നഗരങ്ങളുടെ നടുവിൽ ഈജിപ്തിലെ നഗരങ്ങൾ നാല്പതുവർഷം വിജനമായിക്കിടക്കും. ഞാൻ ഈജിപ്തിലെ ജനങ്ങളെ അന്യജനതകളുടെ ഇടയിൽ ചിതറിക്കും. അവരെ രാജ്യാന്തരങ്ങളിലേക്കു ചിന്നിച്ചിതറിപോകുമാറാക്കും.

¹³ അതുകൊണ്ട് സർവേശ്വരനായ കർത്താവ് അരുളിച്ചെയ്യുന്നു: നാല്പതുവർഷം കഴിയുമ്പോൾ ചിതറിപ്പോയ ദേശങ്ങളിൽനിന്ന് ഈജിപ്തുകാരെ ഞാൻ കൂട്ടിവരുത്തും.

¹⁴ അവരുടെ ഐശ്വര്യം ഞാൻ പുനഃസ്ഥാപിക്കും. അവരുടെ ജന്മദേശമായ പത്രോസിലേക്കു ഞാൻ അവരെ തിരിച്ചുകൊണ്ടുവരും. അവിടെ അവർ ഒരു എളിയരാജ്യമായിരിക്കും.

¹⁵ അത് രാജ്യങ്ങളിൽവച്ച് ഏറ്റവും ചെറുതായിരിക്കും. അത് മറ്റു ജനതകളുടെമേൽ പിന്നീട് ഒരിക്കലും ആധിപത്യം ഉറപ്പിക്കുകയില്ല. രാജ്യങ്ങളെ അടക്കി ഭരിക്കാൻ കഴിയാത്തവിധം ഞാൻ അവരെ അത്ര ചെറുതാക്കും.

¹⁶ പിന്നീട് ഇസ്രായേൽ അതിനെ ആശ്രയിക്കുകയില്ല. ഈജിപ്തിന്റെ നേരെ സഹായത്തിനുവേണ്ടി കൈ നീട്ടിയ അപരാധം അവരുടെ ഓർമയിൽ ഉണ്ടായിരിക്കും. ഞാനാണു സർവേശ്വരനെന്ന് അവർ അപ്പോൾ അറിയും.”

നെബുഖദ്നേസർ ഈജിപ്തിനെ പിടിച്ചടക്കും

¹⁷ പ്രവാസത്തിന്റെ ഇരുപത്തിയേഴാം വർഷം ഒന്നാം മാസം ഒന്നാം ദിവസം സർവേശ്വരന്റെ അരുളപ്പാട് എനിക്കുണ്ടായി:

¹⁸ “മനുഷ്യപുത്രാ, ബാബിലോൺ രാജാവായ നെബുഖദ്നേസർ സോരിനു നേരേ ചെന്നു. നെബുഖദ്നേസർ തന്റെ സൈന്യത്തെക്കൊണ്ടു സോരിനെതിരെ കഠിനാധ്വാനം ചെയ്യിച്ചു. അവരുടെ തലയിലെ മുടി മുഴുവൻ പോകുകയും തോളിലെ തൊലി ഉരിയുകയും ചെയ്തെങ്കിലും രാജാവിനോ അദ്ദേഹത്തിന്റെ സൈന്യത്തിനോ സോരിൽനിന്നു പ്രയത്നത്തിനു തക്ക പ്രതിഫലം കിട്ടിയില്ല.

¹⁹ അതുകൊണ്ട് സർവേശ്വരനായ കർത്താവ് അരുളിച്ചെയ്യുന്നു: ഇതാ ബാബിലോൺരാജാവായ നെബുഖദ്നേസറിന് ഞാൻ ഈജിപ്തുദേശം നല്‌കും; അയാൾ കൊള്ളയും കവർച്ചയും നടത്തി ഈജിപ്തിലെ സമ്പത്തു കൈവശമാക്കും. അത് അയാളുടെ സൈന്യത്തിനു പ്രതിഫലമായിരിക്കും.

²⁰ അയാളുടെ പ്രയത്നത്തിനു പ്രതിഫലമായി ഈജിപ്തുദേശം ഞാൻ അയാൾക്കു നല്‌കിയിരിക്കുന്നു. അവർ എനിക്കുവേണ്ടിയാണല്ലോ അധ്വാനിച്ചത് എന്നു സർവേശ്വരൻ അരുളിച്ചെയ്യുന്നു.

²¹ അന്ന് ഇസ്രായേൽജനത്തിന് ഞാൻ കൊമ്പു മുളപ്പിക്കും; യെഹെസ്കേലേ, അന്നു നീ പറയുന്നത് അവർ എല്ലാവരും കേൾക്കും; അപ്പോൾ ഞാനാണ് സർവേശ്വരനെന്ന് അവർ ഗ്രഹിക്കും.”