യെഹെസ്കേൽ 19 - സത്യവേദപുസ്തകം C.L. (BSI)

ഒരു വിലാപഗാനം

¹ ഇസ്രായേലിലെ രാജകുമാരന്മാരെക്കുറിച്ചു നീ ഒരു വിലാപഗാനം ആലപിക്കുക.

² സിംഹങ്ങളുടെ ഇടയ്‍ക്ക് ഒരു സിംഹിയായിരുന്നു നിന്റെ അമ്മ! യുവസിംഹങ്ങളുടെ ഇടയിൽ അവൾ തന്റെ കുട്ടികളെ വളർത്തി.

³ അവയിൽ ഒന്നിനെ ഒരു യുവസിംഹമായി അവൾ വളർത്തി. അത് ഇരപിടിക്കാൻ ശീലിച്ചു; മനുഷ്യരെ കടിച്ചുതിന്നു.

⁴ ജനതകൾ അവനെപ്പറ്റി കേട്ടു; അവർ അവനെ കുഴിയിൽ അകപ്പെടുത്തി; തുടലിൽ കൊളുത്തി വലിച്ച് ഈജിപ്തിലേക്കു കൊണ്ടുപോയി.

⁵ അവനെ കാത്തിരുന്ന അവളുടെ ആശയറ്റു, പിന്നീട് അവൾ തന്റെ മറ്റൊരു കുട്ടിയെ യുവസിംഹമായി വളർത്തി.

⁶ സിംഹക്കൂട്ടത്തിൽ അവൻ ഒരു യുവസിംഹമായി നടന്നു. അവൻ ഇരപിടിക്കാൻ ശീലിച്ചു; മനുഷ്യരെ കടിച്ചു തിന്നു.

⁷ അവൻ അവരുടെ കോട്ടകൾ നശിപ്പിച്ചു; നഗരങ്ങൾ ശൂന്യമാക്കി, അവന്റെ ഗർജനം കേട്ടു ദേശവും ദേശവാസികളും നടുങ്ങി.

⁸ ചുറ്റുപാടുമുള്ള ജനതകൾ അവനെതിരെ വന്നു അവർ അവന്റെമേൽ വല വീശി; അവൻ അവരുടെ കെണിയിൽ അകപ്പെട്ടു.

⁹ അവർ അവനെ കൊളുത്തിൽ കുടുക്കി കൂട്ടിലാക്കി ബാബിലോൺരാജാവിന്റെ അടുക്കൽ കൊണ്ടുപോയി. ഇസ്രായേൽഗിരികളിൽ അവന്റെ ശബ്ദം ഇനി കേൾക്കാതിരിക്കാൻ അവർ അവനെ ബന്ധനസ്ഥനാക്കി.

¹⁰ ജലാശയത്തിനരികിൽ നട്ട മുന്തിരി വള്ളിപോലെയാണു നിന്റെ അമ്മ; ധാരാളം വെള്ളം ലഭിച്ചതിനാൽ അതു നിറയെ ശാഖകൾ നീട്ടി, ഏറെ ഫലം കായ്ച്ചു.

¹¹ ഭരണാധികാരികളുടെ ചെങ്കോലിന് ഉപയോഗിക്കാവുന്ന ബലമുള്ള ശാഖകൾ അതിനുണ്ടായി, ഇടതൂർന്നു വളർന്ന ചില്ലകൾക്കിടയിലൂടെ അതു തല ഉയർത്തി നിന്നു. അനവധി ശാഖകളോടുകൂടി വളർന്ന് അതു വളരെ ഉയർന്നു കാണപ്പെട്ടു.

¹² എന്നാൽ ഉഗ്രരോഷത്തോടെ ആ മുന്തിരിവള്ളി പിഴുതെറിയപ്പെട്ടു. കിഴക്കൻകാറ്റ് അതിനെ ഉണക്കിക്കളഞ്ഞു. അതിന്റെ കായ്കൾ കൊഴിഞ്ഞു. അതിന്റെ കരുത്തുറ്റ തണ്ട് ഉണങ്ങിപ്പോയി അഗ്നി അതിനെ ദഹിപ്പിച്ചു.

¹³ ഉണങ്ങി വരണ്ട മരുഭൂമിയിൽ അതിനെ ഇപ്പോൾ നട്ടിരിക്കുന്നു.

¹⁴ അതിന്റെ തണ്ടിൽനിന്നു തീ പടർന്ന് ചില്ലകളും കായ്കളും ദഹിപ്പിച്ചു; അതിൽ ഭരണാധിപനു ചെങ്കോൽ നിർമിക്കാനുതകുന്ന കമ്പുകളൊന്നും ശേഷിച്ചില്ല. ഇത് ഒരു വിലാപമാണ്. ഇതൊരു വിലാപഗാനമായി തീർന്നിരിക്കുന്നു.