യെഹെസ്കേൽ 10 - സത്യവേദപുസ്തകം C.L. (BSI)

ദൈവതേജസ്സ് ദേവാലയം വിട്ടുപോകുന്നു

¹ ഞാൻ നോക്കിയപ്പോൾ, കെരൂബുകളുടെ മീതെയുള്ള വിതാനത്തിൽ ഇന്ദ്രനീല നിർമിതമായ സിംഹാസനംപോലെ ഏതോ ഒന്നു കാണപ്പെട്ടു.

² ചണവസ്ത്രധാരിയോട് അവിടുന്ന് കല്പിച്ചു: “നീ പോയി കെരൂബുകളുടെ കീഴിൽ കറങ്ങിക്കൊണ്ടിരിക്കുന്ന ചക്രങ്ങളുടെ ഇടയിൽനിന്നു ജ്വലിക്കുന്ന തീക്കനൽ കൈ നിറയെ വാരിയെടുത്തു നഗരത്തിനു മീതെ വിതറുക.” ഞാൻ നോക്കിനില്‌ക്കെ അയാൾ പോയി.

³ അയാൾ ഉള്ളിൽ കടന്നപ്പോൾ കെരൂബുകൾ ദേവാലയത്തിന്റെ തെക്കുവശത്തു നില്‌ക്കുകയായിരുന്നു. ഒരു മേഘം അകത്തെ അങ്കണത്തിൽ നിറഞ്ഞുനിന്നു.

⁴ സർവേശ്വരന്റെ തേജസ്സ് കെരൂബുകളിൽ നിന്നു പൊങ്ങി ആലയത്തിന്റെ പടിവാതില്‌ക്കലെത്തി. ആലയം മേഘത്താൽ നിറഞ്ഞു. സർവേശ്വരന്റെ തേജസ്സിന്റെ ശോഭ അങ്കണത്തിൽ നിറഞ്ഞുനിന്നു.

⁵ കെരൂബുകളുടെ ചിറകടിശബ്ദം പുറത്തെ അങ്കണംവരെ കേൾക്കാമായിരുന്നു. അതു സർവശക്തനായ ദൈവം അരുളിച്ചെയ്യുമ്പോഴുള്ള സ്വരംപോലെയായിരുന്നു.

⁶ അവിടുന്നു ചണവസ്ത്രധാരിയോടു കറങ്ങിക്കൊണ്ടിരിക്കുന്ന ചക്രങ്ങളുടെ ഇടയിൽ നിന്നു, കെരൂബുകളുടെ മധ്യത്തിൽ നിന്നു തന്നെ, തീക്കനൽ എടുക്കാൻ ആജ്ഞാപിച്ചപ്പോൾ അയാൾ അകത്തുകടന്നു ചക്രത്തിനു സമീപം നിന്നു.

⁷ ഒരു കെരൂബ് കെരൂബുകൾക്കിടയിലുള്ള അഗ്നിയിലേക്കു കൈ നീട്ടി, അതിൽ കുറെ എടുത്തു ചണവസ്ത്രധാരിയുടെ കൈയിൽ കൊടുത്തു. അയാൾ അതു വാങ്ങി വെളിയിലേക്കു പോയി.

⁸ കെരൂബുകളുടെ ചിറകിൻകീഴിൽ മനുഷ്യകരം പോലെ ഏതോ ഒന്നു പ്രത്യക്ഷമായി.

⁹ കെരൂബുകൾക്കു സമീപം നാലു ചക്രങ്ങൾ ഞാൻ കണ്ടു. ഓരോ കെരൂബിന്റെയും അടുത്ത് ഓരോ ചക്രം. മിന്നിത്തിളങ്ങുന്ന ഗോമേദകംപോലെ അവ ശോഭിച്ചിരുന്നു.

¹⁰ അവ നാലിനും ഒരേ ആകൃതി ആയിരുന്നു. ഒരു ചക്രം മറ്റൊന്നിന്റെ ഉള്ളിലെന്നപോലെ കാണപ്പെട്ടു. ഇടംവലം തിരിയാതെ അവയ്‍ക്ക് ഏതൊരു ദിക്കിലേക്കും പോകാൻ കഴിയുമായിരുന്നു.

¹¹ മുൻചക്രം ഏതു ദിക്കിലേക്കു തിരിയുന്നുവോ, അവിടേക്കു മറ്റുള്ള ചക്രങ്ങൾ ഇടംവലം തിരിയാതെ അനുഗമിക്കുമായിരുന്നു.

¹² കെരൂബുകളുടെ ദേഹമാകെ പുറത്തും കൈകളിലും ചിറകുകളിലും ചക്രങ്ങളിലും കണ്ണുകൾ ഉണ്ടായിരുന്നു.

¹³ ആ ചക്രങ്ങളെ ചുഴലിച്ചക്രങ്ങൾ എന്നു വിളിക്കുന്നതു ഞാൻ കേട്ടു.

¹⁴ കെരൂബുകൾക്കോരോന്നിനും നാലു മുഖങ്ങൾ ഉണ്ടായിരുന്നു; ഒന്നാമത്തേതു കാളയുടെ മുഖവും രണ്ടാമത്തേതു മനുഷ്യമുഖവും മൂന്നാമത്തേതു സിംഹത്തിന്റെ മുഖവും നാലാമത്തേതു കഴുകന്റെ മുഖവുംപോലെ ആയിരുന്നു.

¹⁵ കെരൂബുകൾ മുകളിലേക്ക് ഉയർന്നു. കെബാർനദീതീരത്തുവച്ചു ഞാൻ കണ്ട ജീവികൾതന്നെ ആയിരുന്നു അവ.

¹⁶ കെരൂബുകൾ മുന്നോട്ടു നീങ്ങിയപ്പോൾ ചക്രങ്ങൾ അവയുടെ പിന്നാലെ ചെന്നു; ഭൂമിയിൽനിന്നു മുകളിലേക്കുയരാൻ കെരൂബുകൾ ചിറകുകൾ വിടർത്തിയപ്പോൾ അവയുടെ വശങ്ങളിൽനിന്നു ചക്രങ്ങൾ വേർപെട്ടില്ല.

¹⁷ ജീവികൾ നിശ്ചലമായപ്പോൾ ചക്രങ്ങളും നിശ്ചലമായി. ഭൂമിയിൽനിന്ന് ഉയർന്നപ്പോൾ അവയും ഉയർന്നു. കാരണം ജീവികളുടെ ആത്മാവ് ആ ചക്രങ്ങളിലാണു കുടികൊണ്ടിരുന്നത്.

¹⁸ സർവേശ്വരന്റെ തേജസ്സ് ദേവാലയത്തിന്റെ പടിവാതിലിൽനിന്നു പുറപ്പെട്ടു കെരൂബുകളുടെമീതെ ചെന്നു നിന്നു.

¹⁹ കെരൂബുകൾ ചിറകു വിടർത്തി ഭൂമിയിൽനിന്നു മുകളിലേക്ക് ഉയരുന്നതു ഞാൻ കണ്ടു. ചക്രങ്ങളും അവയുടെ കൂടെയുണ്ടായിരുന്നു. ദേവാലയത്തിന്റെ കിഴക്കേ കവാടത്തിൽ ചെന്ന് അവ നിന്നു. ഇസ്രായേലിന്റെ ദൈവത്തിന്റെ തേജസ്സ് അവയുടെ മുകളിൽ നിലകൊണ്ടിരുന്നു.

²⁰ കെബാർ നദീതീരത്ത് ഇസ്രായേലിന്റെ ദൈവത്തിന്റെ കീഴിൽ ഞാൻ കണ്ട അതേ ജീവികളായിരുന്നു ഇവ. ഈ ജീവികൾ കെരൂബുകൾ ആയിരുന്നു എന്നു ഞാൻ മനസ്സിലാക്കി.

²¹ ഓരോന്നിനും നാലു മുഖങ്ങളും നാലു ചിറകുകളും ചിറകുകളുടെ കീഴ്ഭാഗത്തിനു മനുഷ്യകരങ്ങൾ പോലെയുള്ള രൂപവും ഉണ്ടായിരുന്നു.

²² കെബാർനദീതീരത്തുവച്ചു ഞാൻ കണ്ട ജീവികളുടെ മുഖംപോലെ തന്നെ ആയിരുന്നു അവയുടെ മുഖങ്ങൾ. അവ ഓരോന്നും നേരെ മുമ്പോട്ടു പോയി.