ദാനീയേൽ 12 - സത്യവേദപുസ്തകം C.L. (BSI)

യുഗാന്ത്യം

¹ അക്കാലത്ത് നിന്റെ ജനത്തെ സംരക്ഷിക്കുന്ന മഹാപ്രഭുവായ മിഖായേൽ പ്രത്യക്ഷനാകും. നിങ്ങൾ ഒരു ജനതയായിത്തീർന്ന നാൾമുതൽ ഇന്നുവരെ ഉണ്ടായിട്ടില്ലാത്ത കഷ്ടതകൾ ഉണ്ടാകും. എന്നാൽ ജീവന്റെ പുസ്തകത്തിൽ പേരെഴുതപ്പെട്ടിട്ടുള്ള തന്റെ ജനം മുഴുവനും രക്ഷിക്കപ്പെടും.

² നിലത്തെ പൊടിയിൽ നിദ്രകൊള്ളുന്നവരിൽ അനേകർ ഉണരും. അവരിൽ ചിലർ നിത്യജീവനും മറ്റുചിലർ നിത്യമായ ലജ്ജയ്‍ക്കും പരിഹാസത്തിനും പാത്രമാകും.

³ ജ്ഞാനികൾ ആകാശമണ്ഡലത്തിന്റെ പ്രഭപോലെയും ജനത്തെ നീതിയുടെ പാതയിൽ നയിക്കുന്നവർ നക്ഷത്രങ്ങളെപ്പോലെയും എന്നെന്നും ശോഭിക്കും.

⁴ ദാനിയേലേ, അന്ത്യകാലംവരെ നീ ഈ വചനം രഹസ്യമായി സൂക്ഷിച്ച് ഗ്രന്ഥത്തിനു മുദ്രവയ്‍ക്കുക. അനേകർ അങ്ങോട്ടും ഇങ്ങോട്ടും നടക്കും. ദുഷ്ടത വർധിക്കും.

⁵ ദാനിയേൽ എന്ന ഞാൻ നോക്കിയപ്പോൾ അതാ രണ്ടുപേർ! ഒരാൾ നദിയുടെ ഒരു കരയിലും മറ്റൊരാൾ മറുകരയിലും നില്‌ക്കുന്നു.

⁶ നദിയുടെ കുറെ മുകളിൽ നിന്നിരുന്ന ലിനൻവസ്ത്രധാരിയായവനോട് ഈ അദ്ഭുതസംഭവങ്ങൾ എല്ലാം എന്ന് അവസാനിക്കും എന്നു നദിക്കരയിൽ നിന്നിരുന്നവരിൽ ഒരാൾ ചോദിച്ചു.

⁷ നദിയുടെ കുറെ മുകളിൽ നിന്നിരുന്ന ലിനൻ വസ്ത്രധാരി ഇരുകരങ്ങളും സ്വർഗത്തേക്ക് ഉയർത്തിക്കൊണ്ട് നിത്യനായ ദൈവത്തിന്റെ നാമത്തിൽ ആണയിട്ടു പറഞ്ഞു: “അതു കാലവും കാലദ്വയവും കാലാർധവും കഴിയുമ്പോൾ ആയിരിക്കും. അപ്പോൾ ദൈവജനത്തെ തകർക്കുന്നവരുടെ ശക്തി ഇല്ലാതാകും.

⁸ അതോടെ ഇതെല്ലാം സംഭവിക്കും.” ആ ദിവ്യപുരുഷൻ പറഞ്ഞത് ഞാൻ കേട്ടെങ്കിലും അതിന്റെ പൊരുൾ എനിക്കു മനസ്സിലായില്ല. “പ്രഭോ, ഇതിന്റെ എല്ലാം അർഥം എന്താണ്?” എന്നു ഞാൻ ചോദിച്ചു.

⁹ അപ്പോൾ അവിടുന്നു പറഞ്ഞു: ദാനിയേലേ, പൊയ്‍ക്കൊള്ളുക. ഈ വചനം അവസാനനാൾവരെയും മുദ്രവയ്‍ക്കപ്പെട്ടിരിക്കുന്നു.

¹⁰ അനേകം ആളുകൾ തങ്ങളെത്തന്നെ ശുദ്ധീകരിച്ചു നിർമ്മലരാക്കും. എങ്കിലും ദുർജനം ദുഷ്ടത പ്രവർത്തിക്കും. അവർ ഒന്നും വിവേചിച്ചറിയുകയില്ല. ജ്ഞാനികളാകട്ടെ അതു ഗ്രഹിക്കും.

¹¹ നിത്യേനയുള്ള ഹോമയാഗങ്ങൾ നിർത്തലാക്കുകയും വിനാശകരമായ മ്ലേച്ഛത പ്രതിഷ്ഠിക്കപ്പെടുകയും ചെയ്യുന്നതുമുതൽ ആയിരത്തി ഇരുനൂറ്റിത്തൊണ്ണൂറു ദിവസങ്ങൾ ഉണ്ടായിരിക്കും.

¹² ആയിരത്തിമുന്നൂറ്റി മുപ്പത്തഞ്ചു ദിവസം ഉറച്ചുനില്‌ക്കുന്നവൻ അനുഗൃഹീതൻ.

¹³ “ദാനിയേലേ, നീ പോയി വിശ്രമിക്കുക. നിനക്കുള്ള പ്രതിഫലം പ്രാപിക്കുന്നതിനായി നീ അവസാനനാളിൽ എഴുന്നേല്‌ക്കും.”