2 രാജാക്കന്മാർ 14 - സത്യവേദപുസ്തകം C.L. (BSI)

യെഹൂദാരാജാവായ അമസ്യാ

¹ ഇസ്രായേൽരാജാവായ യെഹോവാഹാസിന്റെ പുത്രൻ യെഹോവാശിന്റെ രണ്ടാം ഭരണവർഷം യെഹൂദാരാജാവായ യോവാശിന്റെ പുത്രൻ അമസ്യാ യെഹൂദ്യയിൽ രാജ്യഭാരമേറ്റു;

² ഭരണമാരംഭിച്ചപ്പോൾ അദ്ദേഹത്തിന് ഇരുപത്തഞ്ചു വയസ്സായിരുന്നു. അദ്ദേഹം യെരൂശലേമിൽ ഇരുപത്തൊമ്പതു വർഷം ഭരിച്ചു. യെരൂശലേംകാരിയായ യെഹോവദ്ദിൻ ആയിരുന്നു അദ്ദേഹത്തിന്റെ മാതാവ്.

³ പൂർവപിതാവായ ദാവീദിനെപ്പോലെ ആയിരുന്നില്ലെങ്കിലും സർവേശ്വരനു ഹിതകരമായവിധം അദ്ദേഹം ജീവിച്ചു; തന്റെ പിതാവായ യോവാശിനെപ്പോലെയാണ് അദ്ദേഹം പ്രവർത്തിച്ചത്.

⁴ പൂജാഗിരികൾ അദ്ദേഹം നശിപ്പിച്ചില്ല. ജനം അവിടെ യാഗങ്ങളും ധൂപവും അർപ്പിച്ചുവന്നു.

⁵ രാജത്വം ഉറച്ചുകഴിഞ്ഞപ്പോൾ തന്റെ പിതാവിനെ വധിച്ച സേവകന്മാരെ അമസ്യാ കൊന്നുകളഞ്ഞു.

⁶ മോശയുടെ ധർമശാസ്ത്രത്തിൽ എഴുതിയിരുന്നതനുസരിച്ച് അവരുടെ പുത്രന്മാരെ വധിച്ചില്ല. പിതാക്കന്മാർ പുത്രന്മാരുടെ പാപം നിമിത്തമോ പുത്രന്മാർ പിതാക്കന്മാരുടെ പാപം നിമിത്തമോ വധിക്കപ്പെടരുത്. ഓരോരുത്തൻ താന്താങ്ങളുടെ പാപം നിമിത്തമേ വധിക്കപ്പെടാവൂ എന്ന് സർവേശ്വരന്റെ കല്പന അതിൽ രേഖപ്പെടുത്തിയിരുന്നു.

⁷ അമസ്യാ ഉപ്പുതാഴ്‌വരയിൽവച്ച് പതിനായിരം എദോമ്യരെ കൊല്ലുകയും മിന്നലാക്രമണത്തിലൂടെ സേല പിടിച്ചടക്കി അതിന് ‘യൊക്തയേൽ’ എന്ന പേരു കൊടുക്കുകയും ചെയ്തു; അത് ഇന്നും ആ പേരിൽ അറിയപ്പെടുന്നു.

⁸ പിന്നീട് അമസ്യാ യേഹൂവിന്റെ പൗത്രനും യെഹോവാഹാസിന്റെ പുത്രനും ഇസ്രായേൽരാജാവുമായ യെഹോവാശിന്റെ അടുക്കൽ ദൂതന്മാരെ അയച്ച്, “നമുക്കൊന്ന് ഏറ്റുമുട്ടി നോക്കാം” എന്നു പറയിച്ചു.

⁹ അപ്പോൾ ഇസ്രായേൽരാജാവായ യെഹോവാശ് യെഹൂദാരാജാവായ അമസ്യാക്ക് ഇപ്രകാരം മറുപടി അയച്ചു: “ലെബാനോനിലെ ഒരു മുൾച്ചെടി അവിടെയുള്ള ദേവദാരുവിനോട് പറഞ്ഞു: ‘നിന്റെ പുത്രിയെ എന്റെ പുത്രനു ഭാര്യയായി നല്‌കുക.’ ലെബാനോനിലെ ഒരു വന്യമൃഗം ആ വഴി വന്ന് ആ മുൾച്ചെടി ചവിട്ടിക്കളഞ്ഞു.

¹⁰ എദോമിനെ നീ തകർത്തു എന്നു വിചാരിച്ച് നീ അഹങ്കരിച്ചിരിക്കുന്നു. നിനക്കു ലഭിച്ച പ്രശംസകൊണ്ട് വീട്ടിൽ അടങ്ങിക്കഴിഞ്ഞുകൊള്ളുക. നിനക്കും യെഹൂദായ്‍ക്കും നീ എന്തിനാണ് അനർഥം വിളിച്ചുവരുത്തുന്നത്.”

¹¹ എന്നാൽ അമസ്യാ അതു കാര്യമാക്കിയില്ല. അതുകൊണ്ട് ഇസ്രായേൽരാജാവായ യെഹോവാശ് യുദ്ധത്തിനു പുറപ്പെട്ടു. യെഹൂദ്യയിലെ ബേത്ത്-ശേമെശിൽ വച്ച് അവർ ഏറ്റുമുട്ടി.

¹² യെഹൂദാ ഇസ്രായേലിനോടു തോറ്റു. അവർ തങ്ങളുടെ കൂടാരങ്ങളിലേക്ക് ഓടിപ്പോയി.

¹³ അഹസ്യായുടെ പൗത്രനും യോവാശിന്റെ പുത്രനുമായ യെഹൂദ്യയിലെ അമസ്യാരാജാവിനെ ഇസ്രായേൽരാജാവ് യെഹോവാശ് ബേത്ത്-ശേമെശിൽവച്ച് ബന്ദിയാക്കി യെരൂശലേമിലേക്കു കൊണ്ടുവന്നു. ഇസ്രായേൽരാജാവ് എഫ്രയീം പടിവാതിൽമുതൽ കോൺപടിവാതിൽവരെ നാനൂറു മുഴം നീളത്തിൽ യെരൂശലേമിന്റെ മതിൽ ഇടിച്ചുനിരത്തി.

¹⁴ അയാൾ സർവേശ്വരന്റെ ആലയത്തിലെയും രാജധാനിയിലെയും ഭണ്ഡാരങ്ങളിൽ സൂക്ഷിച്ചിരുന്ന സ്വർണവും വെള്ളിയും പാത്രങ്ങളും കൊള്ളയടിച്ച് അവയോടൊപ്പം തടവുകാരായി പിടിച്ചവരെ ശമര്യയിലേക്കു കൊണ്ടുപോകുകയും ചെയ്തു.

¹⁵ യെഹോവാശിന്റെ മറ്റു പ്രവർത്തനങ്ങളും അദ്ദേഹത്തിന്റെ വീരപരാക്രമങ്ങളും യെഹൂദാരാജാവായ അമസ്യായുമായുള്ള യുദ്ധവും ഇസ്രായേൽരാജാക്കന്മാരുടെ വൃത്താന്തപുസ്തകത്തിൽ രേഖപ്പെടുത്തിയിട്ടുണ്ട്.

¹⁶ യെഹോവാശ് മരിച്ചു പിതാക്കന്മാരോട് ചേർന്നു. അദ്ദേഹത്തെ ശമര്യയിൽ ഇസ്രായേൽരാജാക്കന്മാരുടെ കല്ലറയിൽ സംസ്കരിച്ചു. പുത്രൻ യെരോബെയാം രാജ്യഭാരമേറ്റു.

അമസ്യായുടെ മരണം

¹⁷ ഇസ്രായേൽരാജാവായ യെഹോവാഹാസിന്റെ പുത്രൻ യെഹോവാശിന്റെ മരണശേഷം യെഹൂദാരാജാവും യോവാശിന്റെ പുത്രനുമായ അമസ്യാ പതിനഞ്ചു വർഷം കൂടി ജീവിച്ചു.

¹⁸ അമസ്യായുടെ മറ്റു പ്രവർത്തനങ്ങൾ യെഹൂദാരാജാക്കന്മാരുടെ വൃത്താന്തപുസ്തകത്തിൽ രേഖപ്പെടുത്തിയിട്ടുണ്ട്.

¹⁹ തനിക്കെതിരെ യെരൂശലേമിൽ ഗൂഢാലോചന നടക്കുന്ന വിവരമറിഞ്ഞ് അയാൾ ലാഖീശിലേക്ക് ഓടിപ്പോയി. എന്നാൽ ശത്രുക്കൾ ലാഖീശിലേക്ക് ആളയച്ച് അദ്ദേഹത്തെ അവിടെവച്ച് വധിച്ചു.

²⁰ മൃതദേഹം കുതിരപ്പുറത്തു കൊണ്ടുവന്ന് ദാവീദിന്റെ നഗരമായ യെരൂശലേമിൽ അദ്ദേഹത്തിന്റെ പിതാക്കന്മാരുടെ കല്ലറയിൽ സംസ്കരിച്ചു.

²¹ പിന്നീട് യെഹൂദാജനങ്ങൾ പതിനാറു വയസ്സുള്ള ഉസ്സിയാരാജകുമാരനെ പിതാവായ അമസ്യാക്കു പകരം രാജാവാക്കി.

²² പിതാവിന്റെ മരണശേഷം ഉസ്സിയാ ഏലത്ത് വീണ്ടെടുത്ത് പുതുക്കിപ്പണിത് യെഹൂദായോടു ചേർത്തു.

യെരോബെയാം രണ്ടാമൻ

²³ യെഹൂദാരാജാവായ യോവാശിന്റെ പുത്രൻ അമസ്യായുടെ പതിനഞ്ചാം ഭരണവർഷം ഇസ്രായേൽരാജാവായ യെഹോവാശിന്റെ പുത്രൻ യെരോബെയാം രാജാവായി. അദ്ദേഹം ശമര്യയിൽ നാല്പത്തൊന്നു വർഷം ഭരിച്ചു.

²⁴ അദ്ദേഹം സർവേശ്വരന് അഹിതകരമായവിധം ജീവിച്ചു. നെബാത്തിന്റെ പുത്രൻ യെരോബെയാമിന്റെ പാതകൾ പിന്തുടർന്ന് ഇസ്രായേലിനെക്കൊണ്ടു തിന്മ ചെയ്യിച്ചു.

²⁵ ഗത്ത്-ഹേഫർകാരനായ അമിത്ഥായിയുടെ പുത്രനും സർവേശ്വരന്റെ ദാസനുമായ യോനാപ്രവാചകനിലൂടെ ഇസ്രായേലിന്റെ ദൈവമായ സർവേശ്വരൻ അരുളിച്ചെയ്തതുപോലെ വടക്കു ഹാമാത്തു മുതൽ തെക്ക് അരാബാ കടൽവരെ ഇസ്രായേലിന്റെ വകയായിരുന്ന പ്രദേശം മുഴുവൻ യെരോബെയാം വീണ്ടെടുത്തു.

²⁶ ഇസ്രായേലിന്റെ അതികഠിനമായ ദുരിതം സർവേശ്വരൻ കണ്ടു. സ്വതന്ത്രനോ അടിമയോ ആയി ഒരാൾപോലും ഇസ്രായേലിനെ സഹായിക്കാൻ ഉണ്ടായിരുന്നില്ല.

²⁷ എങ്കിലും ഇസ്രായേലിനെ ഭൂമുഖത്തുനിന്നും തുടച്ചുമാറ്റണമെന്നു സർവേശ്വരൻ ഉദ്ദേശിച്ചിരുന്നില്ല. അതിനാൽ അവിടുന്നു യെഹോവാശിന്റെ പുത്രനായ യെരോബെയാമിലൂടെ ഇസ്രായേലിനെ രക്ഷിച്ചു.

²⁸ യെരോബെയാമിന്റെ മറ്റു പ്രവൃത്തികളും വീരപരാക്രമങ്ങളും യുദ്ധങ്ങളും യെഹൂദ്യയുടെ കൈവശത്തിലായിരുന്ന ദമാസ്ക്കസും ഹാമാത്തും വീണ്ടെടുത്ത് ഇസ്രായേലിനോടു ചേർത്തതുമെല്ലാം ഇസ്രായേൽരാജാക്കന്മാരുടെ വൃത്താന്തപുസ്തകത്തിൽ രേഖപ്പെടുത്തിയിട്ടുണ്ട്.

²⁹ യെരോബെയാം മരിച്ച് ഇസ്രായേൽരാജാക്കന്മാരായ തന്റെ പിതാക്കന്മാരോടു ചേർന്നു. പുത്രൻ സെഖര്യാ പകരം രാജാവായി.