1 ദിനവൃത്താന്തം 7 - സത്യവേദപുസ്തകം C.L. (BSI)

ഇസ്സാഖാറിന്റെ പിൻഗാമികൾ

¹ ഇസ്സാഖാറിന്റെ പുത്രന്മാർ: തോല, പൂവാ, യാശൂബ്, ശിമ്രോൻ എന്നീ നാലു പേർ.

² തോലയുടെ പുത്രന്മാർ: ഉസ്സി, രെഫായാ, യെരിയേൽ, യഹ്മായി, ഇബ്സാം, ശെമൂവേൽ. ഇവർ തോലയുടെ ഭവനത്തിന്റെ തലവന്മാരും അവരുടെ തലമുറകളിൽ ശൂരന്മാരും ആയിരുന്നു. ദാവീദിന്റെ കാലത്ത് അവർ ഇരുപത്തീരായിരത്തി അറുനൂറു പേരുണ്ടായിരുന്നു.

³ ഉസ്സിയുടെ പുത്രൻ ഇസ്രഹ്യാ; ഇസ്രഹ്യായുടെ പുത്രന്മാർ: മീഖായേൽ, ഓബദ്യാ, യോവേൽ, ഇശ്യാ. ഈ അഞ്ചു പേരും പ്രമുഖന്മാരായി രുന്നു. അവർക്ക് അനേകം ഭാര്യമാരും പുത്രന്മാരും ഉണ്ടായിരുന്നു.

⁴ അവരുടെ കൂട്ടത്തിൽ വംശാവലിപ്രകാരം കുടുംബമനുസരിച്ചു ഗണങ്ങളായി തിരിച്ച മുപ്പത്താറായിരം യോദ്ധാക്കൾ ഉണ്ടായിരുന്നു.

⁵ ഇസ്സാഖാർഗോത്രത്തിൽ വംശാവലിപ്രകാരം ആകെ എൺപത്തേഴായിരം യോദ്ധാക്കൾ ഉള്ളതായി കണക്കാക്കപ്പെട്ടിരിക്കുന്നു.

ബെന്യാമീന്റെയും ദാനിന്റെയും വംശജർ

⁶ ബെന്യാമീന്റെ പുത്രന്മാർ: ബേല, ബേഖെർ, യെദീയയേൽ എന്നീ മൂന്നു പേർ.

⁷ ബേലയുടെ പുത്രന്മാർ: എസ്ബോൻ, ഉസ്സി, ഉസ്സീയേൽ, യെരീമോത്ത്, ഈരി എന്നീ അഞ്ചുപേർ കുലത്തലവന്മാരും വീരയോദ്ധാക്കളും ആയിരുന്നു. വംശാവലിപ്രകാരം ഇവരുടെ കുലങ്ങളിൽ ആകെ ഇരുപത്തീരായിരത്തി മുപ്പത്തിനാലു പേർ.

⁸ ബേഖെരിന്റെ പുത്രന്മാർ: സെമീരാ, യോവാശ്, എലിയേസെർ, എല്യോവേനായി, ഒമ്രി, യെരേമോത്ത്, അബീയാ, അനാഥോത്ത്, ആലേമെത്ത്.

⁹ വംശാവലിപ്രകാരം തലമുറതലമുറയായി അവരുടെ പിതൃഭവനങ്ങൾക്കു തലവന്മാരായിരുന്ന യോദ്ധാക്കൾ ഇരുപതിനായിരത്തി ഇരുനൂറു പേർ.

¹⁰ യെദീയയേലിന്റെ പുത്രൻ ബിൽഹാൻ; ബിൽഹാന്റെ പുത്രന്മാർ: യെവൂശ്, ബെന്യാമീൻ, ഏഹൂദ്, കെനയനാ, സേഥാൻ, തർശീശ്, അഹീശാഹർ.

¹¹ യെദിയയേലിന്റെ കുലത്തിൽ പിതൃഭവനങ്ങൾക്കു തലവന്മാരും യുദ്ധവീരരുമായവർ പതിനേഴായിരത്തി ഇരുനൂറു പേർ.

¹² ഈരിന്റെ പുത്രന്മാർ: ശുപ്പീം, ഹുപ്പീം, അഹേരിന്റെ പുത്രൻ ഹുശീം.

നഫ്താലിയുടെ പിൻഗാമികൾ

¹³ നഫ്താലിയുടെ പുത്രന്മാർ: യഹ്സിയേൽ, ഗൂനി, യേസെർ, ശല്ലൂം. ഇവർ ബിൽഹായുടെ സന്തതികൾ.

മനശ്ശെയുടെ പിൻഗാമികൾ

¹⁴ മനശ്ശെയുടെ പുത്രന്മാർ: ഉപഭാര്യയായ അരാമ്യസ്‍ത്രീ പ്രസവിച്ച അസ്രീയേലും മാഖീറും. മാഖീർ ഗിലെയാദിന്റെ പിതാവാണ്.

¹⁵ മാഖീർ ഹുപ്പീമിനും ശൂപ്പീമിനും ഭാര്യമാരെ നല്‌കി. മാഖീറിന്റെ സഹോദരിയാണ് മയഖാ. മാഖീറിന്റെ രണ്ടാമത്തെ പുത്രൻ സെലോഫഹാദിന് പുത്രിമാരെ ഉണ്ടായിരുന്നുള്ളൂ.

¹⁶ മാഖീറിന്റെ ഭാര്യ മയഖാ, പേരെശ് എന്ന പുത്രനെ പ്രസവിച്ചു. പേരെശിന്റെ സഹോദരൻ ഗേരെശിന്റെ പുത്രന്മാരാണ് ഊലാമും രേക്കെമും.

¹⁷ ഊലാമിന്റെ പുത്രൻ ബദാൻ. ഇവരെല്ലാമാണ് മനശ്ശെയുടെ പുത്രനായ മാഖീരിന്റെ പുത്രൻ ഗിലെയാദിന്റെ സന്തതികൾ.

¹⁸ അവന്റെ സഹോദരിയായ ഹമ്മോലേഖെത്തിന്റെ പുത്രന്മാർ: ഈശ്-ഹോദ്, അബീയേസെർ, മഹ്ലാ.

¹⁹ ശെമീദയുടെ പുത്രന്മാർ: അഹ്യാൻ, ശേഖെം, ലിക്കഹി, അനീയാം.

എഫ്രയീമിന്റെ വംശജർ

²⁰ എഫ്രയീമിന്റെ പുത്രന്മാർ തലമുറക്രമത്തിൽ: ശൂഥേലഹ്, ബേരെദ്, തഹത്ത്, എലാദാ, തഹത്ത്, സബാദ്.

²¹ ശൂഥേലഹിന്റെ പുത്രന്മാരായ ഏസെർ, എലാദാ എന്നിവർ തദ്ദേശവാസികളായ ഗത്യരുടെ കന്നുകാലികളെ അപഹരിക്കാൻ ചെന്നപ്പോൾ കൊല്ലപ്പെട്ടു.

²² അവരുടെ പിതാവായ എഫ്രയീം വളരെനാൾ വിലപിച്ചുകൊണ്ടിരുന്നു. സഹോദരന്മാർ അയാളെ ആശ്വസിപ്പിക്കാൻ വന്നു.

²³ പിന്നീട് എഫ്രയീം തന്റെ ഭാര്യയെ പ്രാപിക്കുകയും അവൾ ഗർഭം ധരിച്ച് ഒരു പുത്രനെ പ്രസവിക്കുകയും ചെയ്തു. തന്റെ കുടുംബത്തിന് ഉണ്ടായ അനർഥം നിമിത്തം അവനു ബെരീയാ എന്നു പേരിട്ടു.

²⁴ അവന്റെ പുത്രി ശെയെരാ താഴെയും മുകളിലും ഉള്ള ബേത്ത്-ഹോരോൻ പട്ടണങ്ങളും ഉസ്സേൻ-ശെയെര എന്ന പട്ടണവും നിർമ്മിച്ചു.

²⁵ എഫ്രയീമിന്റെ പുത്രൻ രേഫഹിന്റെ സന്തതികൾ തലമുറക്രമത്തിൽ: രേശെഫ്, തേലഹ്,

^26-27 തഹൻ, ലദാൻ, അമ്മീഹൂദ്, എലീശാമാ, നൂൻ, യെഹോശുവാ.

²⁸ അവർക്ക് അവകാശമായി ലഭിച്ച പാർപ്പിടങ്ങൾ: ബേഥേലും അതിനു ചുറ്റുമുള്ള ഗ്രാമങ്ങളും, കിഴക്ക് നയരാനും, പടിഞ്ഞാറ് ഗേസെരും അതിനു ചുറ്റുമുള്ള ഗ്രാമങ്ങളും, ഗസ്സയും ശെഖേമും അതിന് ചുറ്റുമുള്ള ഗ്രാമങ്ങളും,

²⁹ മനശ്ശെയുടെ ദേശത്തിനരികെയുള്ള ബേത്ത്-ശെയാനും അതിനു ചുറ്റുമുള്ള ഗ്രാമങ്ങളും, താനാക്കും മെഗിദ്ദോയും ദോരും അതിനോടു ചേർന്ന ഗ്രാമങ്ങളും ആയിരുന്നു. ഈ സ്ഥലങ്ങളിൽ ഇസ്രായേലിന്റെ പുത്രനായ യോസേഫിന്റെ പുത്രന്മാർ പാർത്തു.

ആശേരിന്റെ പിൻഗാമികൾ

³⁰ ആശേരിന്റെ പുത്രന്മാർ: ഇമ്നാ, ഇശ്വാ, ഇശ്വി, ബെരീയാ; ഇവരുടെ സഹോദരി സേരഹ്.

³¹ ബെരീയായുടെ പുത്രന്മാർ: ഹേബെർ, ബിർസയീത്തിന്റെ പിതാവായ മല്‌ക്കീയേൽ.

³² ഹേബെറിന്റെ പുത്രന്മാർ: യഹ്ലേത്ത്, ശേമേർ, ഹോഥാ.

³³ ഇവരുടെ സഹോദരി ശുവ. യഹ്ലേത്തിന്റെ പുത്രന്മാർ: പാസാക്, ബിംഹാൽ, അശ്വാത്ത്.

³⁴ ശേമേരിന്റെ പുത്രന്മാർ: അഹീ, രൊഹ്ഗാ, യെഹൂബ്ബാ, അരാം.

³⁵ അയാളുടെ സഹോദരനായ ഹേലെമിന്റെ പുത്രന്മാർ: സോഫഹ്, ഇമ്നാ, ശേലെശ്, ആമാൽ.

³⁶ സോഫഹിന്റെ പുത്രന്മാർ: സൂഹാ, ഹർന്നേഫെർ, ശുവാൽ,

³⁷ ബേരി, ഇമ്രാ, ബേസെർ, ഹോദ്, ശമ്മാ, ശിൽശാ, ഇഥ്രാൻ, ബെയേരാ.

³⁸ യേഥെരിന്റെ പുത്രന്മാർ, യെഫുന്നെ, പിസ്പാ, അര.

³⁹ ഉല്ലയുടെ പുത്രന്മാർ: ആരഹ്, ഹന്നീയേൽ, രിസ്യാ.

⁴⁰ ഇവർ ആശേർഗോത്രത്തിലെ കുലത്തലവന്മാരും പ്രസിദ്ധരായ വീരയോദ്ധാക്കളും പ്രഭുക്കന്മാരിൽ പ്രമുഖരും ആയിരുന്നു. വംശാവലിപ്രകാരം ഇവരിൽ സൈന്യസേവനത്തിനു പ്രാപ്തരായ ഇരുപത്താറായിരം പേർ ഉണ്ടായിരുന്നു.