1 ദിനവൃത്താന്തം 15 - സത്യവേദപുസ്തകം C.L. (BSI)

ദൈവത്തിന്റെ പെട്ടകം യെരൂശലേമിലേക്ക്

¹ ദാവീദിന്റെ നഗരം എന്നറിയപ്പെടുന്ന യെരൂശലേമിൽ അദ്ദേഹം തനിക്കായി കൊട്ടാരങ്ങൾ പണിതു. ദൈവത്തിന്റെ പെട്ടകം സ്ഥാപിക്കാൻ ഒരു സ്ഥലം ഒരുക്കി. അതിന് ഒരു കൂടാരം നിർമ്മിച്ചു.

² പിന്നീട് ദാവീദു പറഞ്ഞു: “ലേവ്യർ മാത്രമേ പെട്ടകം ചുമക്കാവൂ; പെട്ടകം ചുമക്കാനും തനിക്കു ശുശ്രൂഷ ചെയ്യാനും സർവേശ്വരൻ അവരെയാണല്ലോ നിയമിച്ചിരിക്കുന്നത്.”

³ പെട്ടകം സ്ഥാപിക്കാൻ ഒരുക്കിയിരിക്കുന്ന സ്ഥലത്തേക്ക് അതു കൊണ്ടുവരുന്നതിനു ദാവീദ് സകല ഇസ്രായേല്യരെയും യെരൂശലേമിൽ വിളിച്ചുകൂട്ടി.

⁴ അഹരോന്റെ പുത്രന്മാരെയും ലേവ്യരെയും വിളിച്ചു വരുത്തിയിരുന്നു. ലേവ്യഗോത്രത്തിൽനിന്നു വന്നവർ:

⁵ കെഹാത്യകുലത്തിൽപ്പെട്ട നൂറ്റിരുപതു പേരും അവരുടെ നേതാവായ ഊരിയേലും;

⁶ മെരാരികുലത്തിൽപ്പെട്ട ഇരുനൂറ്റി ഇരുപതു പേരും അവരുടെ നേതാവായ അസായായും;

⁷ ഗേർശോംകുലത്തിൽപ്പെട്ട നൂറ്റിമുപ്പതു പേരും അവരുടെ നേതാവായ യോവേലും;

⁸ എലീസാഫാൻകുലത്തിൽപ്പെട്ട ഇരുനൂറു പേരും അവരുടെ നേതാവായ ശെമയ്യായും;

⁹ ഹെബ്രോൻകുലത്തിൽപ്പെട്ട എൺപതു പേരും അവരുടെ നേതാവായ എലീയേലും;

¹⁰ ഉസ്സീയേൽകുലത്തിൽപ്പെട്ട നൂറ്റിപന്ത്രണ്ടു പേരും അവരുടെ നേതാവായ അമ്മീനാദാബും.

¹¹ സാദോക്ക്, അബ്യാഥാർ എന്നീ പുരോഹിതന്മാരെയും ഊരിയേൽ, അസായാ, യോവേൽ, ശെമയ്യാ, എലീയേൽ, അമ്മീനാദാബ് എന്നീ ലേവ്യരെയും ദാവീദ് വിളിപ്പിച്ചു.

¹² അദ്ദേഹം അവരോടു പറഞ്ഞു: “നിങ്ങൾ ലേവ്യരുടെ പിതൃഭവനത്തലവന്മാർ ആണല്ലോ. ഇസ്രായേലിന്റെ ദൈവമായ സർവേശ്വരന്റെ പെട്ടകം കൊണ്ടുവന്ന് അതിനുവേണ്ടി ഞാൻ ഒരുക്കിയിരിക്കുന്ന സ്ഥലത്തു സ്ഥാപിക്കാൻ നിങ്ങളും സഹോദരന്മാരും നിങ്ങളെത്തന്നെ ശുദ്ധീകരിക്കുക.

¹³ ആദ്യം അതു ചുമന്നത് നിങ്ങൾ അല്ലല്ലോ. വിധിപ്രകാരം അന്നു പ്രവർത്തിക്കാതിരുന്നതിനാൽ സർവേശ്വരൻ നമ്മെ ശിക്ഷിച്ചു.”

¹⁴ പിന്നീട്, ഇസ്രായേലിന്റെ ദൈവമായ സർവേശ്വരന്റെ പെട്ടകം കൊണ്ടുവരാൻ പുരോഹിതന്മാരും ലേവ്യരും സ്വയം ശുദ്ധീകരിച്ചു.

¹⁵ മോശയിലൂടെ സർവേശ്വരൻ കല്പിച്ചിരുന്നതുപോലെ പെട്ടകം തണ്ടിന്മേലേറ്റി ലേവ്യർ ചുമന്നു.

¹⁶ പിന്നീട് വീണ, കിന്നരം, കൈത്താളം എന്നീ വാദ്യോപകരണങ്ങൾ ഉച്ചത്തിൽ ധ്വനിപ്പിച്ച് സന്തോഷാരവം മുഴക്കാൻ ലേവ്യരെ ചുമതലപ്പെടുത്തുന്നതിനു ദാവീദ് ലേവ്യകുലത്തലവന്മാരോട് ആജ്ഞാപിച്ചു.

¹⁷ യോവേലിന്റെ പുത്രൻ ഹേമാൻ, അവന്റെ ചാർച്ചക്കാരനും ബേരെഖ്യായുടെ പുത്രനുമായ ആസാഫ്, മെരാരികുലത്തിലെ കൂശായുടെ പുത്രൻ ഏഥാൻ എന്നിവരെ ലേവ്യർ നിയമിച്ചു.

¹⁸ അവരെ സഹായിക്കുന്നതിനു തങ്ങളുടെ ചാർച്ചക്കാരായ സെഖര്യാ, യാസീയേൽ, ശെമീരാമോത്ത്, യെഹീയേൽ, ഉന്നി, എലീയാബ്, ബെനായാ, മയസേയാ, മത്ഥിഥ്യാ, എലീഫെലേഹൂ, മിക്നേയാ എന്നിവരെയും വാതിൽ കാവല്‌ക്കാരായി ഓബേദ്-എദോം, യെയീയേൽ എന്നിവരെയും നിയമിച്ചു.

¹⁹ ഗായകരായ ഹേമാൻ, ആസാഫ്, ഏഥാൻ എന്നിവർ ഓടുകൊണ്ടുള്ള ഇലത്താളങ്ങൾ കൊട്ടി.

²⁰ സെഖര്യാ, അസീയേൽ, ശെമീരാമോത്ത്, യെഹീയേൽ, ഉന്നി, എലീയാബ്, മയസേയാ, ബെനായാ എന്നിവർ അലാമോത്ത് രാഗത്തിൽ വീണവായിച്ചു.

²¹ മത്ഥിഥ്യാ, എലീഫെലേഹൂ, മിക്നേയാ, ഓബേദ്-എദോം, യെയീയേൽ, അസസ്യാ എന്നിവർ ശെമീനീത്ത് രാഗത്തിൽ കിന്നരം വായിച്ചു.

²² ലേവ്യനായ കെനന്യാ ഗാനനിപുണനായിരുന്നതുകൊണ്ട് അവനെ ഗായകസംഘത്തിന്റെ നേതാവായി നിയമിച്ചു.

²³ ബേരെഖ്യായും എല്‌ക്കാനയും ആയിരുന്നു പെട്ടകത്തിന്റെ കാവല്‌ക്കാർ.

²⁴ പുരോഹിതന്മാരായ ശെബന്യാ, യോശാഫാത്ത്, നെഥനയേൽ, അമാസായി, സെഖര്യാ, ബെനായാ, എലെയാസാർ എന്നിവർ ദൈവത്തിന്റെ പെട്ടകത്തിനു മുമ്പിൽ കാഹളം ഊതി; ഓബേദ്-എദോം, യെഹീയാ എന്നിവരും പെട്ടകത്തിന്റെ കാവല്‌ക്കാരായിരുന്നു.

നിയമപെട്ടകം യെരൂശലേമിലേക്ക്

²⁵ ഓബേദ്-എദോമിന്റെ ഭവനത്തിൽനിന്നു നിയമപെട്ടകം കൊണ്ടുവരാൻ ദാവീദും, ഇസ്രായേൽനേതാക്കന്മാരും സഹസ്രാധിപന്മാരും ആഹ്ലാദപൂർവം പുറപ്പെട്ടു.

²⁶ നിയമപെട്ടകം ചുമന്നുകൊണ്ടുവരുന്ന ലേവ്യരെ ദൈവം സഹായിച്ചതിനാൽ ഏഴു കാളകളെയും ഏഴു മുട്ടാടുകളെയും അവർ യാഗം അർപ്പിച്ചു.

²⁷ ദാവീദും പെട്ടകം വഹിച്ചിരുന്ന ലേവ്യരും ഗായകസംഘവും ഗായകസംഘത്തിന്റെ നേതാവായ കെനന്യായും നേർത്ത ലിനൻവസ്ത്രം ധരിച്ചിരുന്നു. ദാവീദ് ലിനൻകൊണ്ടുള്ള ഏഫോദ് ധരിച്ചിരുന്നു.

²⁸ ഇസ്രായേൽജനം ആർപ്പുവിളിയോടും കാഹളം, കുഴൽ, ഇലത്താളം, കിന്നരം, വീണ എന്നീ വാദ്യങ്ങളുടെ ഘോഷത്തോടുംകൂടി സർവേശ്വരന്റെ നിയമപെട്ടകം കൊണ്ടുവന്നു.

²⁹ പെട്ടകം ദാവീദിന്റെ നഗരത്തിലെത്തിയപ്പോൾ ശൗലിന്റെ മകൾ മീഖൾ, ദാവീദുരാജാവ് നൃത്തം ചെയ്ത് ആഹ്ലാദിക്കുന്നതു ജനാലയിലൂടെ കണ്ടു; അവൾ രാജാവിനെ മനസ്സാ നിന്ദിച്ചു.