1 ദിനവൃത്താന്തം 10 - സത്യവേദപുസ്തകം C.L. (BSI)

ശൗൽരാജാവിന്റെ മരണം

¹ ഫെലിസ്ത്യർ ഇസ്രായേലിനോടു യുദ്ധം ചെയ്തു. ഫെലിസ്ത്യരുടെ മുമ്പിൽനിന്നു തോറ്റോടിയ ഇസ്രായേല്യരിൽ പലരും ഗിൽബോവാ മലയിൽവച്ചു കൊല്ലപ്പെട്ടു.

² ശൗലിനെയും പുത്രന്മാരെയും ഫെലിസ്ത്യർ പിന്തുടർന്നു; ശൗലിന്റെ പുത്രന്മാരായ യോനാഥാനെയും അബീനാദാബിനെയും മല്‌ക്കീശൂവയെയും അവർ വധിച്ചു.

³ ശൗലിനെതിരെ ഉണ്ടായ യുദ്ധം ഉഗ്രമായിരുന്നു. വില്ലാളികൾ അദ്ദേഹത്തെ മുറിവേല്പിച്ചു.

⁴ അപ്പോൾ ശൗൽ തന്റെ ആയുധവാഹകനോടു പറഞ്ഞു: “പരിച്ഛേദനം ഏല്‌ക്കാത്തവർ വന്ന് എന്നെ അപമാനിക്കാതിരിക്കാൻ നീ വാൾ ഊരി എന്നെ വെട്ടിക്കൊല്ലുക.” എന്നാൽ ഭയപരവശനായ അവൻ അങ്ങനെ ചെയ്തില്ല. അതുകൊണ്ട് ശൗൽ സ്വന്തം വാൾ എടുത്ത് അതിന്മേൽ വീണു മരിച്ചു.

⁵ ശൗൽ മരിച്ചു എന്നു കണ്ട് ആയുധവാഹകനും തന്റെ വാളിന്മേൽ വീണു മരിച്ചു.

⁶ അങ്ങനെ ശൗലും മൂന്നു പുത്രന്മാരും ഭവനം മുഴുവനും ഒരുമിച്ചു മരിച്ചു.

⁷ ശൗലും പുത്രന്മാരും മരിക്കുകയും കൂടെ ഉണ്ടായിരുന്ന സൈനികർ ഓടിപ്പോകുകയും ചെയ്ത വിവരം കേട്ടപ്പോൾ ജെസ്രീൽ താഴ്‌വരയിലുള്ള ഇസ്രായേൽജനം തങ്ങളുടെ പട്ടണങ്ങൾ വിട്ട് ഓടിപ്പോയി; ഫെലിസ്ത്യർ വന്ന് അവിടെ വാസം ഉറപ്പിച്ചു.

⁸ കൊല്ലപ്പെട്ടവരെ കൊള്ളയടിക്കാൻ ഫെലിസ്ത്യർ പിറ്റേദിവസം വന്നപ്പോൾ ശൗലും പുത്രന്മാരും ഗിൽബോവാ മലയിൽ മരിച്ചുകിടക്കുന്നതു കണ്ടു.

⁹ അവർ ശൗലിന്റെ വസ്ത്രം ഉരിയുകയും തല വെട്ടിയെടുക്കുകയും ചെയ്തു; ആയുധങ്ങളും കവചവും അഴിച്ചെടുത്തു; തങ്ങളുടെ വിഗ്രഹങ്ങളോടും ജനത്തോടും ഈ സദ്‍വാർത്ത അറിയിക്കാൻ ഫെലിസ്ത്യർ ദേശത്തെല്ലാം ദൂതന്മാരെ അയച്ചു.

¹⁰ ശൗലിന്റെ ആയുധങ്ങൾ അവർ തങ്ങളുടെ ദേവന്മാരുടെ ക്ഷേത്രത്തിൽ സമർപ്പിച്ചു; അദ്ദേഹത്തിന്റെ തല ദാഗോന്റെ ക്ഷേത്രത്തിൽ തൂക്കിയിട്ടു.

¹¹ ഫെലിസ്ത്യർ ശൗലിനോടു ചെയ്തതെല്ലാം ഗിലെയാദിലെ യാബേശ്നിവാസികൾ കേട്ടപ്പോൾ,

¹² അവരിൽ ശൂരന്മാരായ ആളുകൾ പോയി ശൗലിന്റെയും പുത്രന്മാരുടെയും മൃതദേഹങ്ങൾ യാബേശിൽ കൊണ്ടുവന്നു; അവിടെയുള്ള കരുവേലകത്തിന്റെ ചുവട്ടിൽ സംസ്കരിച്ചു. അവർ ഏഴു ദിവസം ഉപവസിക്കുകയും ചെയ്തു.

¹³ തന്റെ അവിശ്വസ്തതമൂലം ശൗൽ മരിച്ചു. സർവേശ്വരന്റെ കല്പന അദ്ദേഹം ലംഘിക്കുകയും അവിടുത്തെ ഹിതം അന്വേഷിക്കാതെ ആഭിചാരകന്മാരുടെ ഉപദേശം തേടുകയും ചെയ്തു.

¹⁴ അതുകൊണ്ട് സർവേശ്വരൻ അദ്ദേഹത്തെ കൊല്ലുകയും രാജ്യം യിശ്ശായിയുടെ പുത്രനായ ദാവീദിനെ ഏല്പിക്കുകയും ചെയ്തു.