YUNUS 3 - KITTA' MATANGKASA'

Yunus naturuki Batara

¹ Untu' makapinruanna Batara a'bicara mae ri Yunus.

² Nakana, “A'lampako mange ri Niniwe, anjo kota lompoa, siagang pabattui mae ri ra'yaka, pasang Kupassareanga mae ri kau.”

³ Jari naturukimi Yunus kananNa Batara siagang a'lampami mange ri Niniwe, se're kota sannaka lompona; sa'genna tallungallopi nampa la'busu' nijappai ngaseng.

⁴ Antama'mi Yunus ri anjo kotaya, na le'baki a'jappa siallo bujuru', appakkaramulami akkato'ba nakana, “Patampulo allopi, nalaancuru' Niniwe!”

⁵ Tappaki pandudu'na Niniwe ri anjo pasanNa Allata'ala. Sikontu ra'yaka napattantumi untu' appuasa, na sikontu taua, lompo ca'di, ammake kabusu' kaeng karung untu' ampa'nassai angkanaya assesse' lalang kabusuki ri dosana ke'nanga.

⁶ Ri wattunna nalangngere' karaeng Niniwe anjo kabaraka, karo-karomi naung battu ri empoang kakaraenganna. Nala'gasa'mi juba kakaraenganna siagang ammakemi kaeng karung, nampa ammempo irate ri aua.

⁷ Napasiara' tommi anne parentaya angkana, “Anne parentaya nipasuluki ri Niniwe battu ri kaputusanna karaenga siagang sikamma tumailalanga: Sikontu taua, sapia, gimbalaka siagang olo'-olo' maraengannaya tanipa'biangngai angnganre siagang angnginung.

⁸ Rupataua siagang olo'-oloka musti ammakei kaeng karung. Salaku tanra assesse' lalang sikontu taua musti appala' doang tojeng-tojengi mae ri Allata'ala. Musti napakabajiki ke'nanga panggaukang ja'dala'na siagang panggaukang dosana.

⁹ Barang ero'ji Allata'ala ampinrai ero'Na siagang tenamo Nalarro sa'genna tenamo ninjari panra'!”

¹⁰ Nacini'mi Allata'ala panggaukanna ke'nanga; Naciniki angkanaya nabokoimi ke'nanga panggaukang ja'dala'na. Jari Napinrami kaputusanNa, siagang tanjariami Nahukkung ke'nanga.