YEREMIA 47 - KITTA' MATANGKASA'

PasanNa Batara ri sesena pa'rasangang Filistin

¹ Ri tenanapa nabunduki karaeng Mesir anjo kota Gaza, a'bicarai Batara ri nakke, ri sesena pa'rasangang Filistin.

² Nakana Batara, “Ciniki, assolongi je'neka battu wara' siagang allumpai sangkamma binanga a'baya antujui pa'rasanganga siagang bonena, kota-kotaya siagang pandudu'na. Lammarrangi taua appala' tulung siagang sikontu ra'yaka appiraungi.

³ Lallangngereki ke'nanga sa'ra bangkeng jarang, sa'ra reku'na karetaya, siagang a'galutturu'na roda-rodana. Tau toaya la'jari lammai, natenamo nanawa-nawai ana'na.

⁴ Narapi'mi wattunna bansa Filistin nipanraki kabusu', sa'genna tenamo nanggappa bantuang Tirus siagang Sidon. INakke, Batara, ampanraki kabusuki sikontu tu Filistin niaka tassesa battu ri Kreta.

⁵ Tu Gaza nitujui ri susa lompo; pandudu' Askelon a'jari rapangi tau pepe. Siapapi sallona tu Filistin tassesaya tulusu' lasi'na?

⁶ Ammarrangko angkana, ‘Siapapi sallonu la'bundu', he pa'danNa Batara? Ammotere' mako antama' ri banoannu nampa ammantang mako anjoreng siagang sannang!’

⁷ Mingka maka akkullei sannang punna le'ba'mo Kuparentakang untu' ambunduki Askelon siagang pandudu'na ri biring tamparanga?”