YEHEZKIEL 15 - KITTA' MATANGKASA'

Pangngebarang ri sesena kayu poko' anggoro'

¹ Nakana Batara ri nakke,

² “He tau, apa kala'bianna kayu anggoroka battu ri kayu maraenga ri romang? Apa la'bi baji'na poko' anggoroka battu ri poko'-poko' kayua ri romanga?

³ Maka akkullei nipake kayunna untu' appare' se'reang apa-apa? Maka akkullei nipa'jari panggentungang untu' pappasaikang pakkakasa'?

⁴ Tena matu-matunna pantaranganna nipa'jaria kayu tunuang. Siagang punna cappu' pimbalimo cappa'na nakanre pepe', siagang bageang tangngana a'jari cumi' tommi, maka nia' ija matu-matunna?

⁵ Tenamo! Ba'lalo ri tenanapa nanitunui tena todong nakkulle nipa'matu-matu. La'biangampa punna le'ba'mi nitunu siagang nipammutung ri pepe'!”

⁶ Lanri kammana anjo Nakanamo Batara Kaminang Tinggia, “Rapang kayu poko' anggoro' niallea battu ri romanga nampa nitunu, kammatommi anjo laKugaukangi pandudu'na Yerusalem!

⁷ LaKuhukkungi ke'nanga. Manna pole ta'lappasa'mi ke'nanga battu ri pepeka, mingka ia tonji anjo pepeka lampanraki ke'nanga. Na Naassemmo ke'nanga angkanaya iNakke Batara.

⁸ Tena namajarre' pa'mai'na ke'nanga mae ri Nakke, lanri kammana anjo, anjo buttaya laKupa'jari parang lompo. INakke, Batara Kaminang Tinggia, anne akkana.”