YEHEZKIEL 10 - KITTA' MATANGKASA'

Nabokoi Batara Balla'Na

¹ Nampa accinika' mae ri pattongko' niaka irateanna ulunna anjo sikamma malaeka' akka'nyika, na nia'mo kucini' apa sangkamma empoang kakaraengang nipareka battu ri batu nilang.

² Nampa Nakana Allata'ala ri anjo tau ammakeang lenanga, “Antamakko ri alla'na roda-roda niaka irawanganna anjo malaeka'-malaeka' akka'nyika siagang angngalleko sikangkang bara pepe'. Nampa pakioroki anjo bara pepeka mae ri kotaya.” Mannurukimi, siagang kuparhatikangi anjo tau ammakeang lenanga.

³ Ri wattunna antama, anjo sikamma malaeka' akka'nyika sitabangi ammenteng ri timboranna Balla'Na Batara. Nia' sipa'gompoang rammang antongkoki paranglakkeng bageang lalanga siagang sikontu Balla'Na Batara.

⁴ Caya accilla', iamintu pammatei kahaderanNa Batara, tassioroki battu ri anjo sikamma malaeka' akka'nyika siagang a'letteki mange ri pakke'bu' antamaya ri Balla'Na Batara, sa'genna a'jari singara' sikali paranglakkenna.

⁵ Sa'ra pakkape'na ka'nyi'na anjo sikamma malaeka' akka'nyika kalangngerangi sa'genna ri paranglakkeng pantaranga, rapang sa'ranna Allata'ala Kaminang Koasaya.

⁶ Le'baki Nasuro Batara anjo tau ammakeang lenanga angngalle sikangkang bara pepe' battu ri alla'na roda-roda rawanganna anjo sikamma malaeka' akka'nyika, antama'mi anjo taua nampa ammenteng ri sa'rinna kalase'renna anjo roda-rodaya.

⁷ Nampa kalase'renna anjo malaeka' akka'nyika napantamaki limanna ri pepe' niaka ri tangnga-tangngana ke'nanga, anrappung pirang polong are bara pepe', nampa napassareang mae ri anjo tau ammakeang lenanga. Anjo taua naallemi anjo bara pepeka nampa a'lampa.

⁸ Kuciniki irawanganna tunggala' ka'nyi'na anjo malaeka' akka'nyika nia' apa kamma lima tau.

^9-10 Kucini' tongi angkanaya anjo malaeka' akka'nyika massing nia' tasse'renna roda ri sa'rinna. Anjo appaka roda sangkammai tanja'na, accillaki rapang paramata ga'ga. Massing nia' roda maraenna, ia tappalanga ri tangnga-tangngana.

¹¹ Lanri kammana anjo, akkullei anjo malaeka'-malaeka' akka'nyika a'lampa mange ri appa' sulapa'. Akkullei ke'nanga a'lampa kemae-kemae situru' pangngainna, natanagilinga kalenna.

¹² Sibatu kalenna ke'nanga, salangganna, limanna, ka'nyi'na siagang roda-rodana, rassi kabusuki mata.

¹³ Kulangngereki angkanaya anjo roda-rodaya niarengi “anging tapputara'”.

¹⁴ Tunggala' anjo malaeka' akka'nyika massing appa' rupanna, tenaya nasangkamma-kamma rupanna. Rupanna uru-urua iamintu attanja' kammai sapi liara', makaruaya attanja' sangkammai tau, makatallua attanja' sangkammai singa, siagang makaappaka attanja' sangkammai jangang-jangang rajawali.

^15-17 Iaminjo malaeka'-malaeka' akka'nyi' kucinika riolo ri birinna Binanga Kebar. Punna a'gio' yareka napaka'rang ka'nyi'na anjo malaeka'-malaeka' akka'nyika, nai' ri allaka siagang anri'ba' mae ri dallekang yareka ammantang, tuli amminawangi anjo roda-rodaya, lanri nikoasai ri anjo malaeka'-malaeka' akka'nyika.

¹⁸ Nampa caya accillaka, iamintu pammatei kahaderanNa Batara, nabokoi pakke'bu' antamaka ri Balla'Na Batara siagang a'letteki nai' ri anjo malaeka'-malaeka' akka'nyika.

¹⁹ Kuciniki anjo malaeka'-malaeka' akka'nyika napaka'rang ka'nyi'na siagang anri'ba' ambokoi buttaya nampa a'lampa, siagang amminawangi roda-rodana. Nampa ammantang ke'nanga ri ampi'na pakke'bu' lompona balla'Na Batara ri bageang iraya; nampa anjo caya accillaka tuli nia'na irateanna ke'nanga.

²⁰ Kuu'rangimi angkanaya iaminjo malaeka'-malaeka' akka'nyi' kucinika riolo, niaka irawanganna Allata'alana Israel, ri biranna Binanga Kebar.

²¹ Anjo malaeka'-malaeka' akka'nyika massing appa' rupanna, ruampasang ka'nyi'na, siagang massing nia' nicini' kamma lima tau irawanganna anjo ka'nyi'na.

²² Rupanna ke'nanga sangkamma tongi siagang rupanna anjo malaeka'-malaeka' akka'nyi' kucinika ri birinna Binanga Kebar. Massing a'jappa lambusuki mae ri dallekang.