PAMMUJI 99 - KITTA' MATANGKASA'

Allata'ala, Karaeng Malompoa

¹ Batarami Karaeng; annekkereki bansa-bansaya. Ammempoi ri empoang kala'biranNa irate ri malaeka' akka'nyi', ta'goccangi buttaya.

² Tamaka makoasaNa Batara ri Sion; malompoi irateanganna sikontu bansaya.

³ Boli'mi kamma mammuji ke'nanga ri areng mala'biri'Na. Iami matangkasa'!

⁴ Ri Kattemi kakoasanga, o, Karaeng mangngaia ri hukkung; iKatte ampaentengi katojenganga; iKatte ampajappai hukkunga siagang kaadelanga ri Israel.

⁵ Pakala'biriki Batara Allata'alata, su'jukki' ri dallekang empoang kala'biranNa, Iami matangkasa'!

⁶ Musa siagang Harun antamaki imang-imanna, Samuel kalase'renna tau appala' doanga mae ri Ia. Akkioki ke'nanga mae ri Batara, siagang appialimi.

⁷ Battu ri benteng rammanga Na'bicara mae ri ke'nanga, mannuruki ke'nanga ri sikontu hukkunTa siagang parentaTa.

⁸ O, Karaeng Allata'alana ikambe, Kipilangngeri ummatTa; iKatte Allata'ala mangngaia ampamopporangi ke'nanga, manna naKihukkung ke'nanga lanri kasalanna ke'nanga.

⁹ Pakala'biriki Karaeng Allata'alata, sombai ri bulu' matangkasa'Na, saba' matangkasaki Karaeng Allata'alata.