PAMMUJI 96 - KITTA' MATANGKASA'

Allata'ala Kaminang lompoa

¹ Akkelongko lagu beru mae ri Batara! Akkelongko mae ri Batara, he sikontu linoa!

² Akkelongko mae ri Batara siagang Ia nupuji; allo-allona pa'la'bangi kabara' nikarannuanga angkanaya le'ba' maki' Napasalama'.

³ Caritai kalompoanNa mae ri bansa-bansaya, siagang panggaukang-panggaukang poreNa mae ri umma' rupataua.

⁴ Saba' malompoi Batara, siagang sanna' nipujiNa, musti nikamallakkangi la'biangngang nasikontu rewataya.

⁵ Sikontu rewatana bansa maraenga poro patung barhalaji bawang, mingka Batara, Iami ampareki sikontu apa niaka.

⁶ Nikalimbuki ri kalompoang siagang kala'birang, Balla'Na rassi kakoasang siagang kaga'gang.

⁷ Pujimi Batara, he umma' rupataua, pujimi kalompoanNa siagang kagassinganNa!

⁸ Pujimi arenNa mala'birika, siagang angngerangko koro'bang antama' ri Balla'Na.

⁹ Ammakeko pakeang ibada na nusomba Batara! Annekere' mako ri dallekanNa, he sikontu linoa!

¹⁰ Kabarrangi mange ri bansa-bansaya angkana, “Anjo Batara Karaeng! Jarreki linoa takkulleai ta'lengga; Iami langngadeli bansa-bansaya siagang adele'.”

¹¹ Rannu mako, he langika siagang buttaya! Ammarrung mako, he tamparanga siagang sikontu bonena!

¹² Rannu mako, he paranga siagang sikontu lamung-lamunna! Akkio' rannuko sikamma poko'-pokoka ri romanga.

¹³ Saba' Batara battu ammarenta ri lino, laNaadeli bansa-bansaya siagang adele' na lambusu'.