PAMMUJI 88 - KITTA' MATANGKASA'

Pala' doang appala' pannulung

¹ Kelong. Pammujina golongan Korah. Untu' pamimping pakelong. Situru' lagu: Mahalat Leanot. Kelong pangngajara' battu ri Heman, tu Ezrahi.

² O, Batara, Allata'ala Tumappasalamakku, ri wattu allo kumakkio' mae ri Katte, ri wattu bangngi kumandallekang mae ri Katte,

³ Poro ta'rapi' lalo pappala' doangku mae ri Katte, Kipilangngeri laloi pakkiokku.

⁴ Nitujua' ri jai kasusaang; nia'mi ri pakke'buka kamateanga.

⁵ Sanrapanga' tau lanaunga ri kali'bong kuburuka, tau tenayamo kagassinganna.

⁶ Nibokoia' ri alla'na tau matea, sanrapang tunibuno, anra'ba lalang ri kuburuka, sanrapang tau Kikaluppai duduamo, tenayamo naKitulungi.

⁷ Kipasambila' antama' ri kali'bong kuburuka, ri leang kuburu' lantanga siagang sassanga.

⁸ Battalaka' nijallakkang ri pangngalarroinTa, ancurukka' nijallakkang ri larroTa.

⁹ Kipakabella ngasengi sikontu passiassengangku battu ri Nakke, Kipa'jari tau appakaringikka' mae ri ke'nanga. Takkurunga' siagang takkullea' assulu',

¹⁰ a'jari tabajikai paccinikku napakamma ballasa'. Allo-alloa' makkio' mae ri Katte, o, Batara, ampatarai limangku appala' doang.

¹¹ Apaka untu' tau matea naKigaukang gau' appakalannasaka? Maka ambangungi ke'nanga nampa mammuji mae ri Katte?

¹² Apaka lalangi ri kuburuka nikabarrang pangngamaseanTa, siagang tamamminraTa lalang ri tampa' tau possoka?

¹³ Niakka tau angngassengi gau' appakalannasatTa lalang ri sassanga, yareka kabajikanTa ri pa'rasanganna tau nikaluppaia?

¹⁴ Mingka appalakka' pannulung, o, Batara, bari'-bari'basaka' appanai' pappala' doangang mae ri Katte.

¹⁵ O Batara, angngapa Kitollaka'? Angngapa Kiallei rupanTa battu ri nakke?

¹⁶ Battu ri ca'diku inji kuballasa' siagang niodo' ri kamateang, dodonga' ampisa'ringi hukkunganTa.

¹⁷ Niancurukka' ri pangngalarroi lompoTa; possoka' ri pa'bakka hebatTa mae ri nakke.

¹⁸ Sikabusu'na alloa sanrapangi a'ba pangngalarroinTa angkulilingia', antammulilia' battu ri kere-keremae.

¹⁹ Kipakabellai battu ri nakke bela-bela bajikku, sassanga mami angngaganga'.