PAMMUJI 84 - KITTA' MATANGKASA'

Nakku' ri Balla'Na Allata'ala ri Yerusalem

¹ Untu' pamimping pakelong. Situru' lagu: Gitit. Pammujina golongang Korah.

² Tamaka appakasannanna tampa' pammantanganTa, o, Allata'ala Kaminang Koasaya!

³ Tamaka nakku'na pa'maikku ri BallatTa, akkio' rannui nyawaku siagang batangkalengku mae ri Allata'ala mattallasaka.

⁴ Ba'lalo manna cui-cuia anggappa todong balla' jangang-jangang ri allaka anggappa ru'mung, tampa' pammolikang ana'na ri ampi' tampa' pakkoro'bangnganTa, o, Batara Kaminang Koasa, Karaengku siagang Allata'alaku.

⁵ Tamaka mate'nena tau ammantanga ri BallatTa, na tuli makkelong lagu pammuji mae ri Katte.

⁶ Mate'nei tau anggappaya kagassingang battu ri Katte, eroka mange assiara ri Bulu' Sion.

⁷ Lalang a'jappana ke'nanga numalo ri Ka'bung Baka, napinrai anjo tampaka a'jari timbuseng je'ne', uru bosia angngerang barakka' alla'bi-la'bi.

⁸ Pila' katambang kagassinganna ke'nanga, wattu a'jappana mange ri Sion, mange ri tampa' Allata'alana sikontu rewataya ampappicinikangi kalenna.

⁹ Kipilangngeri laloi pappala' doangku, o, Karaeng Allata'ala Kaminang Koasaya, Kipilangngeri laloi, o, Allata'alana Yakub.

¹⁰ Kibarakkaki karaenna ikambe, o, Allata'ala, Kijagai laloi tau le'baka Kipile.

¹¹ Bajikangngangi sialloa ri BallatTa nasisa'bu allo ri tampa' maraenga. Kualleangangi a'jaria pajaga ri pakke'bu' lompona Balla'Na Allata'alaku naia ammantanga ri balla' tau ja'dalaka.

¹² Saba' Karaeng Allata'ala pa'la'langanta siagang Karaeng Malompo, assidakkiaki' pangngamaseang siagang kalompoang. Tale'bakai Natolla' apa bajika mae ri tau tenaya callanna ri tallasa'na.

¹³ O, Batara Kaminang Koasaya, mate'nei tau tappaka mae ri Katte.