PAMMUJI 8 - KITTA' MATANGKASA'

KalompoanNa Allata'ala siagang kaporeanna rupataua

¹ Untu' pamimping pakelong. Situru' lagu Gitit. Pammujina Daud.

² O, Batara, Allata'alana ikambe, masahoroki koasaTa ri sikontu linoa! KalompoanTa natompoki langika

³ nikelongang ri ana'-ana' siagang ana' loloa. Majarreki pamarentahanTa tamakkulle nilengga untu' antongkoki bawana musua siagang balia.

⁴ Punna kuciniki langi' le'baka Kipa'jari, bulanga siagang bintoeng le'baka Kitannang,

⁵ apa todong rupataua, nasiratang laKiu'rangi, inai todong ke'nanga, nasiratang Kiparakai?

⁶ Mingka Kiangka'mi ke'nanga la'biring sinrapang Allata'ala, Kipipakei kalompoang siagang kala'birang.

⁷ Kisarei koasa ri sikontu linoa, Kipadundui sikontu bate paretTa mae ri ia:

⁸ gimbala', sapi, na yangasenna olo'-oloka, kammayatompa olo'-olo' niaka ri parang lompoa;

⁹ jangang-jangang siagang sikamma jukuka, sikontu apa attallasaka lalang tamparang.

¹⁰ O, Batara, Batarana ikambe, masahoroki kalompoanTa ri sikontu linoa!