PAMMUJI 79 - KITTA' MATANGKASA'

Pappala' doang untu' nipakabebasa'na bansaya

¹ Pammujina Asaf. O, Allata'ala, bansa tenaya naassengKi' naempoimi butta pisakaTa. Nara'massimi BallatTa, napa'jarimi Yerusalem rumbangngang balla'.

² Nabokoi ke'nanga maya'-maya'na sikamma atanTa a'jari kanrena jangang-jangang ri allaka. Nabalang parekangi sikamma maya' tunikamaseanTa a'jari kanrena olo'-olo' liaraka.

³ Ri sikontu kota Yerusalem tattumpa cera'na ke'nanga sanrapang je'ne'; tena antarawangi ke'nanga.

⁴ Nicau-caumi ikambe ri bansa-bansa siampi'na ikambe, nakakkalimi siagang nacau-caumi ikambe.

⁵ O, Batara, maka lasitulusutTa larro, siagang a'rinra kamma pepe' kimburuTa?

⁶ Kitumpami pangngalarroinTa mae ri bansa-bansaya ia tenaya naassengKi', siagang mae ri sikamma kakaraengang tenaya nanynyomba mae ri Katte.

⁷ Saba' le'ba'mi naballassi ummatTa, naancuru' tampa' pammantanganna ke'nanga.

⁸ TeaKi' hukkungi ikambe lanri dosana boe-boena ikambe. Linta' maKi' kamaseangi ikambe, lanri tappu' minasami ikambe.

⁹ Kitulung laloi ikambe o, Allata'ala, Tumappasalama'na ikambe, Kipammopporangi dosa-dosana ikambe siagang Kilappassangi ikambe untu' kalompoang kalenTa.

¹⁰ TeaKi' lappassangi bansa maraenga akkuta'nang ri kambe, angkana, “Kemaeji Allata'alana ke'nanga?” Boli'mi kamma naccini' ikambe pa'balasa' mae ri bansa-bansa ambunoai ata-atanTa.

¹¹ Kipilangngeri laloi kunrarenna sikamma tau nitahanga; poro sikamma tau nipattantua lamate nitallassi lanri koasaTa.

¹² O, Batara, Kibalasaki anjo bansa-bansa a'lappi tuju lanri sikontu panghinaanna mae ri Katte.

¹³ Nampa ikambe ummatTa, gimbala' Kikalawakia, lappala' sukkuruki mae ri Katte sa'genna satunggu-tungguna, siagang mammuji mae ri Katte lalang sikontu turungang.