PAMMUJI 77 - KITTA' MATANGKASA'

Panynyaleori ri wattu susa

¹ Untu' pamimping pakelong. Situru': Yedutun. Pammujina Asaf.

² Assa'ra lompoa' akkio' mae ri Allata'ala; assa'ra lompoa' akkio', na napilangngeria'.

³ Ri wattungku kasukkarrang appala' doanga' mae ri Batara; sila'busu' bangngi tena kulanre ampatarai limangku, mingka taerokai nisaleori pa'maikku.

⁴ Punna kuu'rangi Allata'ala, akkunrarenga', punna kunawa-nawa, pila' la'bai pa'maikku.

⁵ Takkullea' napatinro Batara punna bangngi, lussaki pa'maikku sa'gengku takkullea akkana.

⁶ Kunawa-nawai allo-allo le'ba' allaloa, kuu'rangi nakunawa-nawa taung-taung a'bokoa.

⁷ Ri wattunna bangngi kunawa-nawai, siagang akkuta'nang lalang pa'mai', angkana,

⁸ “Untu' situlusu'naka Batara antollaka' siagang tenamo Napassiratanga'?

⁹ Maka ammarimi angkamaseangi ikambe? Tenamoka Narupai pole janjinNa?

¹⁰ Nakaluppaimika Allata'ala untu' angngamaseang? Larroika, sa'genna tenamo pangngamaseanNa?”

¹¹ Nampa kukanamo, “Iaminne ampa'risi pa'maikku, angkanaya tenamo namakoasa Kaminang Tinggia.”

¹² Erokka' angngu'rangi sikamma panggaukanNa Batara, angngu'rangi sikamma gau' appakalannasa'Na ri jammang riolo.

¹³ Erokka' angngu'rangi sikamma apa le'baka Kigaukang, nakunawa-nawa sikamma bate pare' hebatTa.

¹⁴ O, Allata'ala, sikontu panggaukanTa matangkasaki, inaika sallompona Allata'alana ikambe?

¹⁵ IKattemi Allata'ala anggaukangai gau' appakalannasaka, le'ba'mi Kipa'nyata koasaTa ri alla'na bansa-bansaya.

¹⁶ Lalang kagassinganTa naKipakabebasa' ummatTa, turunganna Yakub siagang Yusuf.

¹⁷ Punna nicinikKi', o, Allata'ala, a'jari mallaki je'neka, iye', manna dapara' tamparanga annekkere' todong.

¹⁸ Rammanga appaturungi bosi, a'gamarrungi gunturuka; akkilaki kilaka ri kere-keremae.

¹⁹ A'gamarrungi gunturuka, akkilaki kilaka, ta'goccangi siagang annekkereki buttaya.

²⁰ A'jappaKi' mannete bombang, anjappai tamparang, mingka takabateangai bate bangkenTa.

²¹ Sanrapang pakalawaki Kirurungangi ummatTa, tete ri Musa siagang Harun.