PAMMUJI 76 - KITTA' MATANGKASA'

Allata'ala ammeta

¹ Untu' pamimping pakelong. Nirurungang ri kacapi. Pammujina Asaf. Kelong-kelong.

² Alla'bangi niasseng Allata'ala ri Yehuda; masahoroki arenNa ri Israel.

³ Yerusalem tampa' pammantanganNa; Bulu' Sion tampa' empoanNa.

⁴ Anjorengi Naancuru' sikontu pakkakasa' pa'bundukanga, sikontu pana accillaka, pa'lapa' barambang siagang pa'dang.

⁵ Tamaka malompoTa siagang accayaTa, la'bi namoncong-moncong marioloa.

⁶ Sikamma tubarania nialleammi apa-apanna; tattappasa'mi naung talambangunga pole. Sikamma surudadu porena tappela' ngasemmi kagassinganna.

⁷ Sikontu jaranga siagang tuma'baena tu'guru' ngasemmi na mate ri pangga'garatTa, o, Allata'alana Yakub!

⁸ Tamaka hebatTa iKatte! Punna larroKi' maka inai akkulle attahang?

⁹ Battu ri langika Kipa'nyata kaputusanTa; mallaki linoa na'mereki.

¹⁰ Ri wattunTa ammenteng ero' angngadeli untu' ampasalamaki tau nijallakkanga ri lino.

¹¹ Manna tau sannaka palla'na mammuji todong ri Katte, siagang tau larroaija ammake kaeng karung tanra susana.

¹² Rupaimi janjinnu mae ri Karaeng Allata'alanu. Sikamma bansa a'reppeseka ammantang siratangi angngerang passare mae ri Allata'ala nikamallakkanga.

¹³ Natepoki sumanga'na sikamma tukoasaya; malla' ngasengi sikamma karaenga mae ri Ia.