PAMMUJI 75 - KITTA' MATANGKASA'

Allata'ala, haking kaminang tinggi

¹ Untu' pamimping pakelong. Situru' lagu: TeaKi' papossoki. Pammujina Asaf. Kelong-kelong.

² Manynyombai ikambe mae ri Katte, o, Allata'ala, appala' sukkuruki ikambe mae ri Katte na nakabarrang bate pare' malompoTa.

³ Nakana Allata'ala, “Ri wattu le'bakamo Kupattantu, laKuadeli taua siagang adele'.

⁴ Punna ta'goccang linoa siagang sikontu pandudu'na iNakke lampakajarreki sikamma bentenna.”

⁵ Mae ri tau nangaia akkana borro laKupauangi sollanna tenamo nakkana borro pole.

⁶ Siagang mae ri tau ja'dalaka, sollanna tenamo natampo sipa'na. Teami napattampoangi kalenna yareka a'bicara borro.

⁷ Saba' tena nabattu raya yareka battu lau' pangngadelanga tena todong nabattu wara' yareka battu timboro'.

⁸ Mingka KalenNa Allata'ala angngadeli, Ia ampanaungi tau se'rea na napakatinggi maraenga.

⁹ Anjo larroNa Allata'ala sanrapangi cangkiri' pangnginungang ri limanNa, anjo cangkirika anggoro' terasa' bonena. Natumpai Allata'ala bonena, sikontu tau ja'dalaka ri lino musti nainungi sa'genna la'busu'.

¹⁰ Mingka latuli kukabarrangi Allata'alana Yakub, kukelongangi lagu-lagu pammujia mae ri Ia.

¹¹ LaNatepoki kagassinganna tau ja'dalaka, nampa a'jari pila' gassing tau bajika.