PAMMUJI 65 - KITTA' MATANGKASA'

Pammuji siagang sukkuru'

¹ Untu' pamimping pakelong. Pammujina Daud. Kelong.

² Siratangi ikambe mammuji ri Katte ri Sion, o, Allata'ala, na narupai janjinna ikambe mae ri Katte.

³ Saba' iKatte ampilangngeri pappala' doanga; battu ngasengi taua mae ri Katte lanri dorakanamo.

⁴ Teai sipato' battala'na dosa-dosaku, mingka iKatte ampammopporanga'.

⁵ Mate'nei tau Kipilea, siagang tau Kikioka untu' ammantang ri BallatTa. Lanipassukkuki ikambe ri sikamma apa baji' ri BallatTa, ri pammantangngang matangkasatTa.

⁶ Kipiali ikambe iamintu Kisarei ikambe pammetang, Kigaukangi apa-apa appakalannasaka untu' ampasalamaki ikambe! IKattemi panrannuanna sikontu bansaya sa'genna mange ri tamparang bellaya.

⁷ Lanri kagassinganTa nakipaenteng sikamma monconga, untu' ampappicinikangi koasa malompoTa.

⁸ Kipakasannangi arrunna tamparanga siagang jallo'na bombanga, na Kipakasannang kagegeranna bansa-bansaya.

⁹ Sikontu pandudu'na linoa mallaki siagang appakalompoi anciniki sikamma gau' heba' Kigaukanga. Sikontu linoa battu ri cappa' se'rea mange ri cappa' maraenga Kipa'jari rannu ma'reja-reja.

¹⁰ Anjo buttaya Kiparakai siagang Kisarei bosi, Kipa'jari coppongi sa'genna alla'bi-la'bi wassele'na. Kibonei sikamma binangaya sa'genna rassi je'ne', Kipasadiangi ke'nanga gandung, iye', kammaminjo bateTa ampasadiangi.

¹¹ Kipalo'lori je'ne' bate pa'jekona Kibasai pa'gompoang-pa'gompoang buttana. Kipa'jari coppongi buttaya siagang bosi, nampa Kitanggongi copponna sikamma cu'la' lamung-lamunna.

¹² Lanri kabajikanTa, taung-taungi Kipasadia kattoanga; kemaeKi' battu, anjorengi kala'bianga.

¹³ Parang lompoa rassi bembe siagang gimbala', sikontu bulu'na ma'rannu-rannui.

¹⁴ Sikamma parang rukuka nikalimbuki ri gimbala', sikamma ka'bunna rassi gandung. Sikontuna marannui siagang mammuji ma'reja-reja.