PAMMUJI 60 - KITTA' MATANGKASA'

Pappala' doang appala' tulung

¹ Untu' pamimping pakelong. Situru' lagu: Bunga bakung kasa'biang. Kelong pangngajara' battu ri Daud,

² ri wattunna nabunduki tu Aram Mesopotamia siagang tu Aram-Zoba, siagang ri wattunna ammotere' Yoab nanabeta 12.000 tu Edom ri Ka'bung Asin.

³ Kitollaki ikambe, o, Allata'ala, siagang Kibalang parekangi ikambe nibeta. LarroKi' mae ri kambe; kamma-kamma anne Kibajiki lalomi ammotere' ikambe.

⁴ Kigoccangi linoa sa'genna a'jari te'ngere'; Kipakabajiki sikamma reppeka, saba' ta'lenggai linoa.

⁵ Kibalang parekangi ummatTa angkasiaki pa'risi' lompoa; ta'royong-royongi ikambe sanrapang tau nasa'ring.

⁶ Kipakaingaki tau mappilangngeria, sollanna ta'lappasa' ke'nanga battu ri hukkunganga.

⁷ Kipasalama' laloi ikambe siagang koasaTa, Kipiali laloi pappala' doanna ikambe, sollanna nipasalama' sikamma tau Kikamaseanga.

⁸ Battu ri pammantangang matangkasa'Na Nakana Allata'ala, “EroKa' akkio' rannu siagang ambage-bagei butta Sikhem; la'goccangA' nomoro' untu' ka'bung Sukot.

⁹ Gilead siagang Manasye iNakke pata, Efraim topi bajaKu, na Yehuda takkang kakaraengangKu.

¹⁰ Mingka Moab tampa' pa'bissang bangkengKu; akkio' rannuA' ri pammetangKu mae ri Filistea. Kupasambilai pa'lapa' bangkengKu a'jari pammatei angkana iNakke pata anjo.”

¹¹ Inai langngeranga' mange ri Edom? Inai langngulua' mange ri anjo kota niaka pattahanganna?

¹² O, Allata'ala, tenaka Kimminawang siagang ikambe? Tenaka Kimaju siagang tantarana ikambe?

¹³ Kitulung laloi ikambe battu ri musua, saba' tena matu-matunna bantuanna rupataua.

¹⁴ Punna a'rurungki' Allata'ala, lasanna' baranita siagang poreta, Iami ambetai musunta.