PAMMUJI 6 - KITTA' MATANGKASA'

Pappala' doang lalang kasusaang

¹ Untu' pamimping pakelonga. Nirurungangi ri kacapi. Situruki lagu makasagantujua. Pammujina Daud.

² O, Batara, teaKi' kapallakkia' lalang pangngalarroinTa, teaKi' hukkungia' lalang kalussakkangku.

³ Kikamaseanga', o Batara, lanri tenamo kagassingangku, Kipakajarreka' lanri dodongku.

⁴ Tamaka linguna atingku; sa'ge kerea' wattu laKibokoi, o Batara?

⁵ Battu poleang maKi', Batara, naKilappassanga', Kipasalamaka' lanri pangngamaseanTa.

⁶ Saba' lalang ri lino kamateang taniu'rangia maKi'; tenamo tau mammuji ri Katte lalang linona tu matea.

⁷ Posoa' na kudodong akkunrareng; bangngi-bangngi ammatti' je'ne' matangku ambasai tampa' katinroangku.

⁸ Tabajikami paccinikku napakamma si'na nanremeng-remeng lanri musu-musungku.

⁹ Bella ngasengko, he ikau tu ja'dalaka, saba' Nalangngere'mi Batara karrukku.

¹⁰ Napilangngeri Batara pappalakku na natarima sambayangku.

¹¹ Sikontu musungku lata'bangkai na siri'-siri' nammunduru' linta' ammakkala' kacci.