PAMMUJI 59 - KITTA' MATANGKASA'

Pappala' doang appala' nijagai

¹ Untu' pamimping pakelong. Situru' lagu: TeaKi' papossoki. Pammujina Daud, ri wattunna nasuro Saul taua anjannangngi balla'na untu' ambunoi.

² O, Allata'alaku, Kipasalama' laloa' battu ri musu-musungku, Kijagaia' battu ri tau eroka ambakkaia'.

³ Kilappassanga' battu ri tau a'gau' ja'dalaka, pakabella' battu ri tau pabunoa.

⁴ Ciniki, naadanga' ke'nanga ero' ambunoa', asse'rei tau pallaka ambalianga'; nateai passabakkang le'ba'na kugaukang dosaya yareka passabakkang nia'na kudakkai, o, Batara.

⁵ Teai tongi lanri kasalangku, napparuru siagang sadia-sadia ngaseng ke'nanga.

⁶ Ammenteng maKi', Allata'ala Kaminang Tinggia, naKitulunga'. O, Allata'alana Israel, kalenTa anjari sa'bi. Ambangung maKi' siagang Kihukkummi bansa-bansaya, TeaKi' kamaseangi tau ja'dalaka, a'jari balia.

⁷ Ri wattu karuenna ammotereki ke'nanga, nakantisi' giginna sanrapang kongkong angkulilingi kotaya.

⁸ Tulusu' appiandere'na siagang nahinai taua ke'nanga; tarangi kana-kananna ke'nanga sanrapang pa'dang, nakana kapang ke'nanga tena allangngereki.

⁹ Mingka Kikakkali ke'nanga, o, Batara, sikontu bansaya anjo Kicallai.

¹⁰ IKattemi kagassingangku, manrannuanga' mae ri Katte, iKatte tampa' palariangku, o, Allata'ala.

¹¹ Lanri kabajikanNa Nabattu Allata'alaku mae ri nakke, Nalappassanga' anciniki musungku nibeta.

¹² TeaKi' bunoi ke'nanga, o, Batara, sollanna bansaku tena nakaluppai. Kipasimbungi siagang Kibetai ke'nanga siagang koasaTa, o, Batara, pa'la'langanna ikambe.

¹³ Saba' dorakai ke'nanga lanri kana-kananna; boli'mi kamma nialle ke'nanga ri sikko' lalang katampoanna, lanri nangaina ke'nanga attunra siagang a'balle-balle.

¹⁴ Kipossoki ke'nanga lalang pangngalarroinTa, o, Allata'ala, Kipossoki ke'nanga sa'genna cappu'. Namassing naasseng taua angkanaya Allata'ala ammarenta Israel, siagang pamarentahanNa a'la'bang ri sikontu linoa.

¹⁵ Ri wattu karuenna ammotereki ke'nanga, pakantisi' giginna sanrapang kongkong angkulilingi kotaya.

¹⁶ A'la'bangi ke'nanga a'boya kanre, nappilollong la'bu punna tabassora.

¹⁷ Mingka inakke akkelonga' ri passala'na kagassinganTa; bari'-bari'basaka' akkelong lompo sa'rangku ri passala'na pangngamaseanTa siagang tamamminraTa. Saba' iKattemi tampa' palariangku, tampa' pa'la'langangku ri wattungku susa.

¹⁸ O, Allata'ala, kagassingangku, akkelonga' mammuji-muji mae ri Katte, saba' iKattemi tampa' pa'la'langangku, o, Allata'ala, mangngaiku.