PAMMUJI 58 - KITTA' MATANGKASA'

Pappala' doang appala' pa'balasa' mae ri tau ja'dalaka

¹ Untu' pamimping pakelong. Situru' lagu: TeaKi' papossoki. Pammujina Daud.

² He, sikamma tukoasaya, apaka adeleki kaputusannu? Apaka lambusukko ri wattunna nuadeli rupataua?

³ Tena, ikau apa ja'dala' nurancana ngaseng, siagang katerassang nugaukang ri anne pa'rasanganga.

⁴ Tau ja'dalaka lingu memammi baku' lalanna ri battang annipu memammi ke'nanga baku' nilassukanna.

⁵ Nia' racunna ke'nanga sanrapang racunna ularaka, natongkoki tolinna ke'nanga sanrapang ulara' le'leng tongolo'

⁶ tenaya nalangngereki sa'ranna tumangngajara' cara'de'na, yareka sa'ranna sanro cara'deka.

⁷ O, Allata'ala, Kitepo' laloi gigi-giginna ke'nanga, Kibi'bu' laloi gigi ri dallekanna anjo singa rungkaya, o, Batara.

⁸ Boli'mi kamma lanynya' ke'nanga sanrapang je'ne' a'rumbua, sanrapang ana' pana pokkolokamo.

⁹ Boli'mi kamma ke'nanga sangkamma biku assolonga sangkamma urusu', sangkamma ana' lolo matea ri tenanapa naccini' singara'.

¹⁰ Ri tenanapa nangngu'rangi, naposso'mo ke'nanga, sanrapang rompo' moncongbulo iji na tenapa nalompo mingka la'busu'mi niri'bakang ri anging, sanrapang lamung-lamung kalotoro'.

¹¹ Rannui tau lambusuka anciniki tau ja'dalaka nihukkung, na nabissai bangkenna lalang cera'na tau dorakaya.

¹² Lanakanamo taua, “Tau bajika anggappai pahala, tojeng, nia' Allata'ala angngadeli ri lino.”