PAMMUJI 56 - KITTA' MATANGKASA'

Manrannuang mae ri Allata'ala lalang ri kasusaang

¹ Untu' pamimping pakelong. Situru' lagu: Bodobangkeng pepea, battu ri daera bella. Pammujina Daud ri wattunna nijakkala' ri tu Filistin ri daera Gat.

² Kamaseanga', o, Allata'ala, lanri nibundukia', tulusu' nijallakkanga' ri musu-musungku.

³ Sila'busu' alloa' nionjo'-onjokang ri balingku; jai ammusua', o, Allata'ala Kaminang Tinggia.

⁴ Ri wattungku malla', manrannuanga' ri Katte.

⁵ Mammujia' ri Allata'ala lanri apa le'baka Napa'janjiang; tappaka' ri Ia, jari tena kumalla', tena pakkullena rupataua mae ri nakke.

⁶ Sila'busu' alloi musua angkacoi parkaraku tulusu' usahana ke'nanga ero' ancilakaia'.

⁷ A'rappungammi ke'nanga ri tampa' taccokkoa, anjannangngi sikontu panggaukangku, siagang a'boya kasampatang untu' ambunoa'.

⁸ Maka nia' kasalamakkang untu' kaja'dallanna ke'nanga? Kiancuru' lalomi ke'nanga lalang larroTa, o, Allata'ala!

⁹ Kibilang-bilangi allo-allo pa'la'bakkangku, na Kiasseng siapa jaina je'ne' matangku; tenaka naKibilangi anjo?

¹⁰ Ri allo akkiokku mae ri Katte, lanitunrungi ammunduru' musua, saba' kuassengi angkana agang mae ri nakke Allata'ala.

¹¹ Mammujia' mae ri Karaeng Allata'ala, lanri apa le'baka Napa'janjiang.

¹² Tappaka' ri Ia, jari tena kumalla', tena pakkullena rupataua mae ri nakke.

¹³ Lakurupai janjingku mae ri Katte, o, Allata'ala, na kuassare koro'bang sukkuru' mae ri Katte.

¹⁴ Saba' iKatte allappassanga' battu ri kamateanga, Kijagaia' sollanna tena kutu'guru'. Jari akkullema' attallasa' lalang ri pa'la'langanNa Allata'ala, lalang caya ansingariai sikontu tallasakku.