PAMMUJI 53 - KITTA' MATANGKASA'

Kaja'dallanna rupataua

¹ Untu' pamimping pakelong. Situru' lagu Mahalat. Kelong pangngajara'na Daud.

² Tau dongoka nakana lalang ri pa'mai'na, “Tena Allata'ala.” Panggaukanna ke'nanga ja'dalaki siagang rantasaki; tena nia' anggaukangi bajika.

³ Battu ri suruga Naciniki Batara umma' rupataua, untu' amboyai tau annabaya siagang anynyombaya ri Ia.

⁴ Mingka sikontu taua sala gau' ngasemmi siagang panra'mi, manna sitau tania' a'gau' baji'.

⁵ Nakana Batara, “Tenaka nangngu'rangi anjo sikamma tau ja'dalaka? Lalang tallasa'na narampasaki ke'nanga apa-apanna ummakKu siagang tena le'bakai appala' doang mae ri Nakke.”

⁶ Tau ja'dalaka lasanna' malla'na, natenaja apa appakamalla', saba' Napasiaraki Allata'ala buku-bukunna tau angkatulungiako; nitolla'mi ke'nanga ri Allata'ala, jari lanubetami ke'nanga.

⁷ Poro battu ri Sion battu kasalamakkanga untu' tu Israel. Na larannu sikamma turunganna Yakub punna napoterang kaadaang baji'na umma'Na.