PAMMUJI 49 - KITTA' MATANGKASA'

Sia-siaji nipattoang kakalumanynyanganga

¹ Pammujina golongang Korah. Untu' pamimping pakelong.

² Pilangngeri, he sikontu bansaya, tannangi tolinnu, he pandudu'na linoa,

³ baji' na tu biasaya, kammayatompa tupamimpinga, baji' na tu kasi-asia, kammayatompa tu kalumanynyanga.

⁴ Lakupabattuangko kana-kana baji', pikkirang mailalang sikaliku.

⁵ Lakuparhatikangi paruntu' kanaya, nakupakasingara' battuanna lalang akko'bikku kacapi.

⁶ Tena kumalla' ri wattu kasukkarranga, ri wattungku nikatulung ri musu ja'dalaka.

⁷ Anjo ke'nanga kakalumanynyangnganna napattoang, siagang napattampo-tampoang pa'barang-baranganna.

⁸ Sitojenna tena manna sitau akkulle ampasalamaki sari'battanna, yareka a'bayara' ampasuluki battu ri Allata'ala.

⁹ Manna apa nasareangi talagannaki; ta'lalo ka'jala'na lanipasulukangi nyawana,

¹⁰ sollanna akkulle a'lili battu ri kamateanga nakkulle attallasa' satunggu-tungguna.

¹¹ Tena, ia lanaciniki angkanaya manna tau annabaya mate tonji. Tau dongoka siagang tau toloa para lapossoki, na nabokoi barang-baranna untu' tau maraenga.

¹² Lammantangi ke'nanga ri jera'na satunggu-tungguna; iaminjo pammantanganna ke'nanga untu' situlusu'na, manna riolo jai tanana ke'nanga.

¹³ Takkulleai rupataua tulusu' lattallasa' assannang-sannang; sanrapang olo'-olo', laposso' tongi.

¹⁴ Kammaminjo sarenna tau ampattoangiai kalenna, siagang allo ri bokona tau sukkuka nasa'ring ri kana-kananna.

¹⁵ Sanrapang gimbala', nipattantui ke'nanga untu' mate; kamateang langkalawaki ke'nanga. Ri bari'basa' iji nibetami ke'nanga ri tau lambusuka linta'mi botto' tubuna ke'nanga lalang ri linona tu matea, bella battu ri pammantanganna tau assannang-sannanga.

¹⁶ Mingka laNalappassanga' Allata'ala, laNalappassanga' battu ri koasana kamateanga.

¹⁷ Teako mallakki punna nia' tau a'jari kalumanynyang, na pila' katambang pa'barang-baranganna.

¹⁸ Saba' ri wattunna mate takkulleai angngerang apa-apa, talanaerang tongi pa'barang-baranganna naung ri kiburuka.

¹⁹ Ba'lalo punna upa' taua lalang tallasa'na, nanipalece lanri a'jarina wassele'na,

²⁰ lanapinawang tonji boe-boena mae ri tampa' sassanga satunggu-tungguna.

²¹ Takkulleai rupataua tulusu' lattallasa' assannang-sannang, sanrapang olo'-olo', laposso' tongi.