PAMMUJI 48 - KITTA' MATANGKASA'

Kota Sion, kotaNa Allata'ala

¹ Pammujina golongang Korah.

² Tojeng, malompoi Batara siagang sanna' nipujina ri kota Allata'alata, ri bulu' matangkasaka.

³ Sion, bulu'Na Allata'ala, ammenteng sassa' sanna' ga'gana kotaNa Karaeng Malompoa ampakarannui sikontu linoa.

⁴ Allata'ala ammantangi ri kamara'-kamara' Balla' LompoNa, ma'nassa KalenNa tonji anjagai.

⁵ Ciniki, a'rappungangi karaeng-karaenga; battui ke'nanga ero' ambunduki.

⁶ Mingka nacini'na anjo buluka, lannasa'mi ke'nanga; gegere'mi ke'nanga nampa lari a'lingu-lingu.

⁷ Anjoreng annekkereki ke'nanga napakamma malla' siagang pa'risi', sanrapang baine eroka ammana',

⁸ sanrapang kappala' je'ne' ancuruka natuju bombang lompo.

⁹ Sangkamma apa le'baka nilangngere', kamma-kamma anne nicini'mi, ri kotaNa Batara Kaminang Makoasaya. Anjo kotaya, kotaNa Allata'alata, Najagai untu' satunggu-tungguna.

¹⁰ Lalang ri BallatTa, nanawa-nawai ikambe pangngamaseanTa, o, Allata'ala.

¹¹ Masahoroki arenTa siagang nipuji ri sikontu linoa, ammarentaKi' siagang adele'.

¹² Boli'mi kamma ra'ya' Sion siagang Yehuda akkio' rannu, lanri Kihukkungi balinna ke'nanga.

¹³ Inroimi Sion, nujappai akkuliling, siagang rekemmi menarana.

¹⁴ Parhatikangi tembo'na, paressai tembo' pattahanganna, sollanna akkulle nucarita mae ri turungannu:

¹⁵ Angkana, “Iami Allata'ala, Allata'alata satunggu-tungguna, Iami lampimpingki' sa'genna mannannungang.”