PAMMUJI 44 - KITTA' MATANGKASA'

Pappala' doang appala' nijagai

¹ Pammujina golongang Korah. Kelong pangngajarang. Untu' pamimping pakelong.

² O, Allata'ala, kalenna ikambe allangngereki, riwaya' nacaritaya boe-boena ikambe ri passala' gau' malompo le'baka Kigaukang ri jammang riolo.

³ IKatte kalenTa ambongkai bansa-bansaya sollanna ammantang ummatTa ri pa'rasanganna ke'nanga. Bansa-bansa maraenga Kicilakai, mingka ummatTa Kilappassang a'bakka'-bakka'.

⁴ Anjo buttaya tena naalle passai ke'nanga siagang pa'dang; teai lanri kagassingang kalenna nammeta ke'nanga, mingka lanri koasana siagang cayana kahaderanTa, saba' mangngellaiKi' mae ri ummatTa.

⁵ IKattemi Karaengku siagang Allata'alaku, assareai pammetang ummatTa.

⁶ Lanri koasaTa nanabeta musunna ikambe, siagang napatundu' ikambe tau a'bakkaya ri kambe.

⁷ Saba' tena kupattoangi panaku, manna pa'dangku talanapasalamaka'.

⁸ Mingka iKatte ampasalamaki ikambe battu ri balinna ikambe, siagang ambetai tau birisika mae ri kambe.

⁹ Jari tuli lanipakalompo maKi', ri kambe, siagang tulusu' appala' sukkuru' mae ri Katte.

¹⁰ Mingka kamma-kamma anne Kibokoimi ikambe siagang Kibalang parekang nibeta ikambe tenamo Kimaju siagang ikambe lalang ri barisanna ikambe.

¹¹ Kibalang parekangi ikambe lari battu ri musunna ikambe, nampa narampasa' ke'nanga pa'barang-baranganna ikambe.

¹² Kibalang parekangi ikambe nisamballe sanrapang gimbala', siagang nipasisa'la'-sa'la' ri alla'na bansa-bansaya.

¹³ Kibalukangi ummatTa natena siapa anggaranna, siagang tena apa-apa passawallang Kigappa.

¹⁴ Kipa'jarimi ikambe tunicau-cau ri siampi'-ampi' balla'na ikambe nicau-caumi siagang nikakkalimi ikambe ri ke'nanga.

¹⁵ Kipa'jarimi ikambe tunipianderi ri bansa-bansaya; napammenggong ulunna ke'nanga siagang nahinai ikambe.

¹⁶ Sila'busu' alloa' nicalla, angkasiaki sirika siagang kapala' rupaya,

¹⁷ lanri kulangngere'na paccau-caua siagang kana-kana pahinaya battu ri bawana musua siagang tau ammoli' lalanga.

¹⁸ Yangasennami anjo antujui ikambe manna natenaja natakkaluppa ikambe mae ri Katte yareka angkaluppai parjanjianTa siagang ikambe.

¹⁹ Tena natakkaluppa atinna ikambe mae ri Katte; tena nadakkai ikambe parentaTa.

²⁰ Mingka Kibokoi ikambe lalang ri sassanga; tena pakkullena ikambe ri alla'na olo'-olo' sekkeka.

²¹ Ebara' angkana tenamo nanynyomba ikambe ri Allata'ala, passangalinna appala' doammi ri allata'ala maraeng,

²² mattantu laNaassengi Allata'ala, saba' Naassengi rahasiana atinna ikambe.

²³ Lanri iKatte natuli tattuju kamateanga mae ri kambe na nigau' sanrapang gimbala' lanisamballea.

²⁴ Ambangung maKi', o, Batara! Angngapa Kitinro? Ammenteng maKi'! TeaKi' tollaki ikambe satunggu-tungguna.

²⁵ Angngapa naKiaccokko, na Kikaluppai sessana siagang susana ikambe?

²⁶ Tu'guru'mi ikambe ancuru' ri buttaya, attinro naung ri limbu'buka lanri nibeta.

²⁷ Ammenteng maKi', siagang battu maKi' antulungi ikambe, pasalamaki ikambe lanri pangngamaseanTa.