PAMMUJI 42 - KITTA' MATANGKASA'

KITTA' MAKARUA: PAMMUJI 42–72 Pappala' doang ri pa'rasangang pammelakkang

¹ Untu' pamimpin pakelong. Kelong pangngajarang golongang Korah.

² Sanrapang jonga nakku' ri je'ne' binanga, kammaminjo nakku'na nyawaku ri Katte, o, Allata'ala.

³ Nakkuka' ri Allata'ala mattallasaka, angngapapi kunampa akkulle mange assambayang ri Balla'Na?

⁴ Allo bangngia' angngarru', je'ne' mata mami kanre-kanreangku. Sila'busu'na alloa akkuta'nang musungku angkana, “Kemaeji Allata'alanu?”

⁵ Punna kuu'rangi wattu riolo si'nai pa'maikku, ri wattungku mange ri Balla'Na Batara ri Yerusalem siagang tau jaia appare' passua'-suarrang. A'jappa' ri dallekanna barisang tau jaia akkio' rannu akkelong lagu pammuji.

⁶ Angngapa nasi'na siagang lussa' pa'maikku? Manrannuanga' ri Allata'ala. Na kulappala' sukkuru' pole mae ri Ia, ri Allata'alaku siagang Tumappasalamakku.

^7-8 Ancuruki pa'maikku anrinni ri pa'rasangang pammelakkanga anne, lanri kammanami kungngu'rangi ri Batara. Ammanyuki nyawaku nalo'lorang kasi'nang, natujua' a'bana karicuang; sanrapang arrunna je'ne' tu'guru'na Binanga Yordan battu ri Moncong Hermon siagang Moncong Mizar.

⁹ Poro Napappicinikang lalo pangngamaseanNa Batara ri wattu allo sollanna kukkulle akkelong ri wattu bangngi appala' doang ri Allata'ala kabattuanna tallasakku.

¹⁰ Kukana ri Allata'ala, mappatojengku, “Angngapa naKikaluppaia? Angngapa kumusti tulusu' pa'risi', lanri nijallakkang ri musu-musungku?”

¹¹ Ancuru' taba sikali pa'maikku lanri nicau-cau ri musu. Tulusu' akkuta'nanna ke'nanga angkana, “Kemaeji Allata'alanu?”

¹² Angngapa nasi'na siagang lussa' pa'maikku? Manrannuanga' ri Allata'ala. Na kulappala' sukkuru'mo pole mae ri Ia, ri Allata'alaku siagang Tumappasalamakku.