PAMMUJI 40 - KITTA' MATANGKASA'

Pala' doang sukkuru' siagang pappala'

¹ Untu' pamimping pakelong. Pammujina Daud.

Pala' doang sukkuru'

² Sa'barakka' antayangi bantuanNa Batara; nampa Naparhatikanga' siagang Napilangngeri pakkiokku.

³ Nabesoka' battu lalang ri kali'bong bahayaya, battu lalang ri peo'na binangaya. Nabolika' irate ri bulu' batua, sa'genna baji' dakkaku.

⁴ Naajaraka' angkelongangi lagu berua lagu pammuji untu' Allata'alata. Jai tau anciniki siagang a'jari malla', nampa tappa' mae ri Batara.

⁵ Mate'nei tau matappaka ri Batara, tenaya nanynyomba ri rewata-rewataya, yareka appala' tulung mae ri tau tampoa.

⁶ O, Batara, tamaka jaina bate paretTa mae ri kambe, o, Batara Allata'alaku, iKatte tena sangkammanTa! Tamaka jaina rancana appakalannasatTa mae ri kambe, tena olona lakkulle nicarita ngaseng.

⁷ Passarea siagang koro'bang nipatalaya tena Kingai, koro'bang nitunu siagang koro'bang pammopporang dosa tena Kituntuki. Mingka le'ba'ma' Kisare toli akkullea allangngereki sa'ranTa.

⁸ Nampa kukana, “Annemi kalengku, lalang gulungang kitta' tattulisika untu' inakke:

⁹ Sannanga' anggaukangi erotTa, o, Allata'ala, kuparipa'maiki hukkunTa.”

¹⁰ Lalang pa'rappunganna ummatTa kupabattui kabara' bajika angkanaya iKatte le'ba' ampasalamaki ikambe. Tena ammarina kupabattu anjo passalaka, Kiasseng ngasengi anjo sikammaya, o, Batara.

¹¹ Tena kuboliki anjo kabara' kasalamakkanga ri atingku, tuli kukabarrangi pannulunTa siagang tamamminraTa. Tena ku'mereki ri dallekanna pa'rappunganna ummatTa, mingka tuli kupappiassengangi pangngamaseanTa na tamamminraTa.

¹² O, Batara, teaKi' ammari angkamaseanga'; tuli Kijagaia' siagang pangngamaseanTa na tamamminraTa.

Pala' doang pappala'

¹³ Nikatulunga' ri jai bala lompo, takkulleai nirekeng siapa jaina. Niondanga' ri dosa-dosaku sa'gengku takkulleamo accini'. Jaiangngangi nauu' niaka ri ulungku jaina, sa'gengku tappu' minasa.

¹⁴ O, Batara, Kipasalama' laloa', o, Batara sadia maKi' untu' antulunga'!

¹⁵ Boli'mi kamma anjo tau eroka ambunoa' nibetai na lari a'lingu-lingu. Boli'mi kamma anjo tau anggoraiyai kacilakangku nitunrung ammunduru' na nihina.

¹⁶ Boli'mi kamma anjo tau angkakkalia' a'jari ta'bangka na siri'-siri'.

¹⁷ Poro sikontu tau anynyombaya ri Katte marannu siagang ma'reja-reja, na sikontu tau mangngaia ri kasalamakkang battua ri Katte tuli nakana, “Tojeng, Malompoi Batara!”

¹⁸ Inakke anne kasi-asia' na kulamma, mingka Naparhatikanga' Batara. IKattemi pannulungku siagang Tumappasalamakku, teaKi' salloi, o Allata'alaku!