PAMMUJI 39 - KITTA' MATANGKASA'

Pangakuanna tau lalang kapa'risanga

¹ Untu' pamimping pakelong. Pammujina Daud. Untu' Yedutun.

² Nakana nawa-nawangku, “Eroki kujagai kalengku sollanna tena kudoraka lanri lilaku. Taeroka' a'bicara lalang a'reppese'na ija tau ja'dalaka.”

³ A'mereki tojenga' naung, sa'genna kupa'rugi kalengku napila' katambang pa'risikku kusa'ring;

⁴ niaccekanga' ri kalussakkang sanna' dudua. Pila' kunawa-nawai, pila' susai pa'maikku; kala'busanna kukanamo,

⁵ “O, Batara, Kipauanga' ringngapanna wattu a'jalakku sollanna kuasseng antekamma bodona tallasakku.”

⁶ Antekamma bodona umurukku Kipattantua! Untu' iKatte tena siapa la'buna tallasakku. Tojeng, rupataua sanrapanji sipa'maikang nappasa' bawang,

⁷ tallasa'na allalo kammaji bayang-bayang bawang. Sikontu resona sia-siaji bawang; appatambungi barang-barang, mingka tanaassengai angkana inai lampakei.

⁸ Anne kamma apa kutayang, o, Batara? Ri Kattemi panrannuangku.

⁹ Kilappassang laloa' battu ri sikontu dosaku, TeaKi' balang parekangia' nicau-cau ri tau dongoka.

¹⁰ A'merekia' siagang tena nakusungke bawaku, saba' iKatte angngajarakka'.

¹¹ Kialle laloi hukkunganTa battu ri kalengku, saba' a'birimma' mate napakamma pannunrunTa.

¹² Lanri kasalanna rupataua, Kihukkungi siagang Kiajaraki sanrapang bu'bu' Kiancuruki apa lompoa anggaranna mae ri ke'nanga. Tojeng, rupataua sanrapanji sipa'maikang nappasa' bawang.

¹³ Kipilangngeri pappala' doangku, o, Batara, Kiparhatikangi pappalakku; teaKi' ammantangngi a'mereki punna angngarruka'. Sangkamma sikontu boe-boeku, sinampe'ja' bawang annumpang ri Katte.

¹⁴ TeaKi' gangguia', sollangku sannang sike'de', ri tenanapa ku'lampa na kutaenamo.