PAMMUJI 38 - KITTA' MATANGKASA'

Pappala' doang lalang kasusaang

¹ Pammujina Daud ri wattu assarena koro'bang pappakainga'.

² O, Batara, teaKi' hukkungia' lalang kalarroanTa, teaKi' sessaia' lalang kalarroanTa.

³ Annarrusuki ana' panaTa ambokkaki kalengku, battalaki kusa'ring limanTa anjallakkanga'.

⁴ Garring lompoa' lanri kalarroanTa; tenamo baji' ri tubuku lanri dosaku.

⁵ Tallanga' lalang ri a'ba kasalangku, teai sipato' battala'na eranganna dosaku.

⁶ A'nanai bokka'-bokkakku siagang a'rasa bottoki, lanri dongo'na panggaukangku.

⁷ A'dundua' siagang a'bukkuka', sila'busu' alloa susa siagang si'na.

⁸ Nitunui ri rammusu' tubuku, tenamo baji' ri batangkalengku.

⁹ Ancuru'ma' siagang tenamo kagassingangku, akkunrarenga' lanri lussa'na pa'maikku.

¹⁰ O, Batara, Kiassengi sikontu apa kukaerokia, tena nataccokko kunrarengku mae ri Katte.

¹¹ A'dumba'-dumbaki barambangku, tenamo kagassingangku, tenamo nabaji' paccinikku.

¹² A'lili ngasemmi bela-belaku lanri garringku, ba'lalo bija pammanakangku bella ngasemmi ri nakke.

¹³ Tau eroka ambunoa' natannangngia' sikko'; tau eroka ancilakaia' nagarattaka' lanatumpasa'.

¹⁴ Mingka sanrapanga' tau tongolo' tamallangngera, sanrapanga' tau pepe tamakkanaya.

¹⁵ Tojeng, sanrapanga' tau tamallangngere', lanri kammanami natena kugeakki.

¹⁶ Mingka manrannuanga' ri Katte, o, Batara, na iKatte, Batara Allata'alaku, Kipialia'.

¹⁷ TeaKi' balang parekangi musungku sannang ancinika' susa, teaKi' balang parekangi ke'nanga akkana borro punna ta'lengga'.

¹⁸ Punna a'biringa' tu'guru', tulusu' pa'risi'na kusa'ring.

¹⁹ Kumangakui dosa-dosaku; lussaki pa'maikku annawa-nawai kasalangku.

²⁰ Jai siagang kassaki sikamma tau ambalianga', birisiki ke'nanga anciniki bateku attallasa'.

²¹ Tau ambalasakai kabajikanga siagang kaja'dallanga nabalianga' lanri kugaukanna kabajikanga.

²² O, Batara, teaKi' bokoia', teaKi' bellai ri nakke, o, Batara.

²³ BattuKi' linta' antulunga', O, Batara, Tumappasalamakku.